ƗMbombo ɨzya Bhasontwa 16

ɄTiimoti abhala nʉ Paulo nʉ Siila

ɄPaulo nʉ Siila bhahafiha hwi‑ibooma ɨlyɨ Deelibe, pamandɨ bhahafiha mwi‑ibooma ɨlyɨ Lisitila. Ʉmwoziwa ʉmo ahakhalaga mwi‑ibooma ɨlyo, ʉyo itaawa lyakwe ahali yʉ Tiimoti. Ʉnyina waakwe ahali Nʼnyahuudi wa‑amʼmwɨtɨɨshe ʉYeesu, leelo ʉyise waakwe ahali Nʼnyunaani. 2 Abhooziwa abhamwabho abha hu mabooma agɨ Lisitila nɨ Ikoniya bhahamʼmwamihaga ʉTiimoti hu njendo ɨnyinza. 3 ɄPaulo ahanzaga huje, bhabhale peeka nʉ Tiimoti mu nshʉʉla. Ɨpo ahanʼtenda ɨngoola ɨya hwitagaalila ɨyɨ lume, hu nongwa ya hubhasʉngwɨzye aBhayahuudi abha hu mabooma gaala aje, bhasahanʼkhaane ʉTiimoti. Ahabhombile ɨsho, pɨpo bhonti bhahamɨɨnye huje, ʉyise waakwe ʉTiimoti ahali Nʼnyunaani. 4 Ɨpo ʉPaulo na bhamwabho bhahashilaga mu mabooma agʉ‑ʉhwo. Bhahabhabhʉzyaga abhooziwa ʉlugamulo lwa lubhɨhwɨlwe na bhasontwa bha Yeesu na bhagoosi abhɨ shibhanza ɨsha hu Yelusaleemu huje, bhalulondolezyaje. 5 Ɨsho, abhooziwa bhahajendelelaga ajine mu lwɨtɨho, nantele bha bhahamʼmwɨtɨhaga ʉYeesu bhahonjelaga shila lisiku.

ɄPaulo alola ɨndoleshelo

6 ɄMʼpepo ʉMʼfinjile ahanʼkhaana ʉPaulo na bhamwabho huje, bhasahasheele alʉmbɨɨlɨle ɨNongwa ɨNyinza ɨzya Mwɨnɨ ʉYeesu mu mukowa ʉgwɨ Aasiya. Ɨpo bhahashila mu mukowa ʉgwɨ Filigiya nʉ gwɨ Galatiya. 7 Lwa bhaafiha paahati pa mpaho ɨya mu mukowa ʉgwɨ Miisiya nʉ gwɨ Bisiniya, bhahalɨnga atʉʉshe mu mukowa ʉgwɨ Bisiniya. Leelo ʉMʼpepo ʉwa Yeesu saga ahabhɨtɨshɨla. 8 Ɨpo bhahashila mu mukowa ʉgwɨ Miisiya, bhahabhala mwi‑ibooma ɨlyɨ Tolowa. 9 Nʉsiku ʉPaulo ahalola ɨndoleshelo. Mu ndoleshelo ɨyo ahanʼnola ʉnʼsahaala ʉwa hu mukowa ʉgwɨ Makedoniya, ayɨmɨlɨɨye, ahunʼnaabha haani huje, “Lobhoha, ʉyɨnze hu Makedoniya, ʉtaavwe.” 10 ɄPaulo lwa waalola ɨndoleshelo ɨyo, tahamanya huje, ʉNgʉlʉbhɨ atikwiziizye hubhalʉmbɨɨlɨle abhantu bhaala ɨNongwa ɨNyinza ɨzya Yeesu. Ɨpo tahahwilɨngaanya nalinaali abhale hu Makedoniya.

ɄLidiya ahumʼmwɨtɨha ʉYeesu

11 Ɨpo tahasogola pa Tolowa nɨ meeli, tahashizanya nyɨɨma, tahafiha mu nsi ɨyɨ Samotilaake yɨ‑ɨli paahati yɨ nsʉmbi. Lwa hwasha, tahajendeelela ashʉʉle, tahafiha hwi‑ibooma ɨlyɨ Neyapooli. 12 Ɨpo tahayileha ɨmeeli, tahajenda, tahafiha hwi‑ibooma ɨlyɨ Filiipi. Ɨli lyahali libooma lya limanyiishe haani mu mukowa ʉgwɨ Makedoniya, nantele aBhaluumi bhahali bhakhala ʉhwo na hulilongozye ibooma ɨlyo. Tahakhɨɨye mwi‑ibooma ɨlyo ɨnsiku nyishe.

13 Pi‑isiku ɨlyɨ Sabaato tahafuma hwʉnzɨ yi‑ilyango ɨli‑ibooma, tahabhala panshɨnjɨ yi‑isooho, tahasʉbhɨɨye huje, tigapaaga ɨpo abhantu bhahumʼpuuta ʉNgʉlʉbhɨ. Ɨpo tahakhala, tahayanga na bhashɨ bha bhahabhʉngɨɨne paala hu nongwa ya humʼpuute ʉNgʉlʉbhɨ. 14 Mwa bhaala bha bhahatitejeleziizye, ahali ʉnʼshɨ ʉmo ʉwa mwi‑ibooma ɨlyɨ Siyaatila wa saga Nʼnyahuudi leelo wa‑ahunʼtiniha ʉNgʉlʉbhɨ. Itaawa lyakwe ahali yʉ Lidiya. Ʉnʼshɨ ʉnʉ ahabhombaga ɨmbombo ɨya‑akazye amenda amavuutu. ɄPaulo lwa‑ahabhabhʉzyaga ɨNongwa ɨNyinza ɨzya Yeesu ʉKilisiti, ʉMwɨnɨ ʉYeesu ahiigula ʉmwoyo gwa Lidiya, wope ahɨɨtɨha. 15 Ɨpo ahoozewa peeka na bhantu abha mu nyumba yaakwe, ahatilaabha ahaga, “Nanshi mwandola huje, ɨmʼmwɨtɨɨshe ʉMwɨnɨ ʉYeesu, saali, mukhale mu nyumba yaanɨ.” Ahatikʉndɨɨlɨzya haani.

ɄPaulo nʉ Siila bhapinywa mu hoobhe

16 Isiku limo, lwa tibhala paala abhantu pa bhahamʼpuutaga ʉNgʉlʉbhɨ, ahɨnza ʉnʼkalwe ʉmo ʉnʼnɨndu, wa‑ahali ni‑ikololo. Ikololo ɨlyo lya lyahamʼpeelaga ikhone huje, alagulaje zya zihwɨnza hwitagaalila. Ashilile hwa nʼnɨndu ʉyo, abhagoosi bhaakwe bhahambɨlɨlaga ɨmpɨɨya zinyinji. 17 Ʉnʼnɨndu ʉyo ahatilondolezyaga atɨ nʉ Paulo. Ahabwagaga ibwago ahagaga, “Abhantu ɨbha bhabhomvi bha Ngʉlʉbhɨ wa‑ali Nʼgoosi hu vintu vyonti! Nantele bhahubhalʉmbɨɨlɨla amwɨ idala ɨlya‑afyʉlwe!” 18 Ahabhombaga ɨsho ɨnsiku zinyinji. Leelo isiku limo, ʉPaulo ahaviitwa haani, ahashebhela, ahalibhʉʉzya ikololo liila huje, “Ɨhulajizya hwi‑itaawa lya Yeesu ʉKilisiti, fuma mwa nʼnɨndu ʉnʉ!” Nalinaali ikololo lyahamʼmwepa ʉnʼnɨndu ʉla.

19 Ɨshi, abhagoosi bha nʼnɨndu ʉla lwa bhaalola huje, idala lya bhahasʉbhɨlaga huzyaje ɨmpɨɨya lyananjiha, ɨpo bhahanʼkhata ʉPaulo nʉ Siila. Bhahabhadendemula, bhahabhatwala hu lembuka hwilongolela lya bhagoosi abhi‑ibooma. 20 Bhahabhataaka hu bhagoosi abhi‑ikoloti bhahaga, “Abhalume ɨbha Bhayahuudi, bhaleeta ibho igoosi mwi‑ibooma lyetu ɨli. 21 Bhamanyizya huje, tigalondolezyaje amiiho gaabho ɨgo atɨ tiBhaluumi saga tihwanziwa hugɨɨtɨshe, hwope na hugalondolezye.”

22 Ɨmpʉga ɨya bhantu yahabha peeka na bhaala bha bhahunʼtaaka ʉPaulo nʉ Siila, bhahabhaguba. Ɨpo abhagoosi bhahaamula huje, abhalwi bhamʼmwawule amenda ʉPaulo nʉ Siila, na hubhashete nɨ nsanzʉ. 23 Lwa bhabhasheta haani, bhahabhabunshiilizya mu hoobhe. Ɨpo abhagoosi bhahanʼnajizya ʉnʼnɨndɨɨlɨli ʉnʼgoosi huje, abhalɨndɨɨlɨle shinza. 24 Lwa bhanʼnajizya ɨsho, wope ʉnʼnɨndɨɨlɨli ʉyo ahabhatʉʉsya hu mpanda ɨya muuhati haani. Ahagapinyila amanama gaabho mu mazinga huje, bhagandi aselenje.

25 Lwa hwafiha nʉsiku paahati, ʉPaulo nʉ Siila bhahamʼpuutaga ʉNgʉlʉbhɨ na‑ateele ɨnteelo ɨzya humʼmwamishe. Abhakʉngwe abhamwabho bhahabhatejelezyaga. 26 Pɨnɨɨpo lwene intensya igoosi haani lyahashila mu nsi, lyahayinzanya ʉlwalo ʉlwɨ hoobhe. Ɨnyiiji zyonti ɨzyɨ hoobhe zyahiiguha zyene, na manyololo gonti ga bhahabhapinyiiye gahasatuuhana. 27 Ʉnʼnɨndɨɨlɨli ʉyo ʉwɨ hoobhe ahadaamula. Lwa waalola huje, ɨnyiiji nyiigule, aheega ipanga lyakwe huje, ahwigoje. Ahanzaga ahwigoje, pɨpo ahasɨɨbhaga huje, abhakʉngwe bhonti bhaselenjile. 28 Nalinaali ʉPaulo ahanʼkwizya hwi‑izwi igoosi ahamʼmʉʉzya huje, “Ʉsahahwigoje! Tenti tili sha tilɨɨho ʉmu.”

29 Ʉnʼnɨndɨɨlɨli ʉnʼgoosi ʉyo ahabhalajizya abhabhomvi huje, bhanʼneetele ʉlukhozyo. Lwa bhanʼneetela ʉlukhozyo, ahatʉʉha lubhilo mu mpanda yɨ hoobhe, ahasugamila pa nsi pitagaalila lya Paulo nʉ Siila ʉhwu ayinga hu wooga. 30 Ɨpo ahabhafumya hwʉnzɨ, ahabhabhʉzɨɨlɨzya ahaga, “Mwɨ bhagoosi bhaanɨ, ɨmbombe bhʉlɨ huje, ɨmfyʉlwe?” 31 Bhahamʼmʉʉzya bhahaga, “Ʉmʼmwɨtɨshe ʉMwɨnɨ ʉYeesu, anza hufyʉle peeka na bhantu abha mu khaaya yaaho.” 32 ɄPaulo nʉ Siila bhahamʼmanyizya ɨNongwa ɨNyinza ɨzya Mwɨnɨ ʉYeesu peeka na bhantu bhonti abha mu khaaya yaakwe. 33 Ahabhaazyo hahaala aha nʉsiku, ʉnʼnɨndɨɨlɨli ʉla ahabheega, ahabhoozya ʉPaulo nʉ Siila amabhamba gaabho. Ɨpo ahoozewa peeka na bhonti abha mu khaaya yaakwe. 34 Lwa bhoozewa, ahanʼtwala ʉPaulo nʉ Siila hu khaaya yaakwe, ahabhapeela ɨshalye. Ahasha haani peeka na bhonti abha mu khaaya yaakwe hu nongwa ya‑aje, bhamʼmwɨtɨha ʉNgʉlʉbhɨ.

35 Lwa hwasha, abhagoosi abhi‑ikoloti bhahabhasonteelezya abhagoosi bha bhalwi hwa nʼnɨndɨɨlɨli ʉwɨ hoobhe ʉla, bhahamʼmʉʉzya bhahaga, “Bhigulile abhantu bhaala.” 36 Ʉnʼnɨndɨɨlɨli ʉyo ahamʼmʉʉzya ʉPaulo huje, “Abhagoosi abhi‑ikoloti bhasonteleziizye ɨntumi huje, ɨmbigulile. Ɨshi fumi hwʉnzɨ, bhalaji hu tengaanu.”

37 Leelo ʉPaulo ahabhabhʉʉzya abhagoosi bha bhalwi huje, “Abhagoosi abhi‑ikoloti bhahabhabhʉzɨɨzye huje, bhatishete haani pitagaalila lya bhantu na hutipinye mu hoobhe sinta hutitaake awe hutibhʉzɨɨlɨzye, poshe atɨ tili Bhaluumi. Ɨshi heenu bhahwanza hutigulile hu mfiso? Saga zigabha ɨsho, ndaali! Bhɨnze bhɨɨbho, bha bhatigulile.” 38 Abhagoosi bha bhalwi bhahabhabhʉʉzya ɨzyo abhagoosi abhi‑ikoloti. Abhagoosi abhi‑ikoloti lwa bhʉmvwa huje, ʉPaulo nʉ Siila Bhaluumi, bhahakhatwa nʉ wooga ʉgoosi. 39 Bhahabhala hubhalambe huje, bhabhakhobhoshele, bhahabhafumya mu hoobhe, bhahabhalaabha huje, bheepe afume mwi‑ibooma liila. 40 ɄPaulo nʉ Siila lwa bhaafuma mu hoobhe, bhahabhala hu khaaya ya Lidiya. Ʉhwo bhahakhomaana na bhooziwa abhamwabho, bhahabhajinjizya amooyo, bhahasogola.