ɄPaulo alʉmbɨɨlɨla hwi‑ibooma ɨlyɨ Tesaloniike
17
ɄPaulo nʉ Siila lwa bhasogola hwi‑ibooma ɨlyɨ Filiipi,
bhahashila hwi‑ibooma ɨlyɨ Amfupooli nɨ lyɨ Apoloniiya,
bhahafiha mwi‑ibooma ɨlyɨ Tesaloniike.
Ɨpo pahali nɨ nyumba ɨya‑apuutile na‑amanyiilile ɨya Bhayahuudi.
2 Ʉhwo ʉPaulo ahatʉʉha mu nyumba ɨya‑apuutile na‑amanyiilile,
nanshi sha gahali amiiho gaakwe.
ƗSabaato zitaatu ahapanjilanaga nabho afume mu Nsimbo ɨMfinjile,
3 sha‑ahubhalangaanyizya na hubhalolesye pa pazelu huje,
ʉKilisiti ahanziwaaga alabhe,
afwe na‑azyʉshe mu bhafwe.
Nantele ahabhabhʉzyaga huje,
“ɄYeesu ʉnʉ wɨ‑ɨhunʼnʉmbɨɨlɨla huliimwɨ,
yʉ Mʼfyʉli.”
4 Bhamo mwa Bhayahuudi bhaala bhahagɨɨtɨha amazwi ga Paulo.
Bhope abhinji bha saga Bhayahuudi leelo bha bhahunʼtiniha ʉNgʉlʉbhɨ,
peeka na bhashɨ abhinji abhɨ nshɨnshɨ,
bhahagɨɨtɨha,
bhahabha peeka nʉ Paulo nʉ Siila.
5 Leelo,
ɨjɨɨla yahabhakhata aBhayahuudi bha saga bhahamʼmwɨtɨɨshe ʉPaulo.
Bhahabhala hu lembuka,
bhahabhaana abhantu abhabhiibhi.
Ɨbho bhahabhabhʉngaanya abhantu abhinji,
bhahanda abhombe ʉlwese ʉlugoosi mwi‑ibooma lyonti.
Bhahabhala pa khaaya ya muntu ʉmo wa bhayiga Yaasoni,
bhahatʉʉha mu nyumba hwi‑ikhone humʼmwanze ʉPaulo nʉ Siila huje,
bhabhakhate na hubhatwale pilongolela lya bhantu abha pi‑ibooma.
6 Lwa saga bhahabhaaga,
bhahanʼkhata yʉʉyo ʉYaasoni peeka na bhooziwa bhamo,
bhahabhadendemula afishe hwa bhagoosi abhi‑ibooma,
bhahabwagaga ibwago bhahagaga,
“Abhantu bha bhahaleetaga ʉlwese ʉlugoosi mu nsi ɨzyɨnjɨ zyonti,
ɨshi bhɨnzɨle ɨpa pi‑ibooma lyetu.
7 ɄYaasoni ʉnʉ abhambɨlɨɨye mu nyumba yaakwe.
Ɨbha bhonti bhasyonshela ɨndajizyo ɨzyo ʉmwɨnɨ ʉnʼgoosi ʉKayisali azibhɨɨshɨle,
bhayiga,
alɨɨho ʉmwɨnɨ ʉwɨnjɨ,
ʉyo itaawa lyakwe yʉ Yeesu.”
8 Abhagoosi abhi‑ibooma liila peeka nɨ mpʉga ɨya bhantu lwa bhʉmvwa ɨnongwa ziila,
bhahaviitwa haani.
9 Bhahanʼsomvya ʉYaasoni na bhamwabho huje,
bhahwigombole.
Ɨpo bhahabhɨtɨshɨla huje,
bhabhalaje humwabho.
ɄPaulo nʉ Siila hwi‑ibooma ɨlyɨ Belooya
10 Lwa hwabha siku,
nalinaali abhooziwa bhahamʼmʉʉzya ʉPaulo nʉ Siila huje,
bhasogole,
bhabhalaje hwi‑ibooma ɨlyɨ Belooya.
Lwa bhaafiha huula,
bhahatʉʉha mu nyumba ɨya‑apuutile na‑amanyiilile ɨya Bhayahuudi.
11 Abhantu abhʉ‑ʉhwo hu Belooya bhahali bhantu bha bhatejeelezya ashile abha hu Tesaloniike.
Bhahazyambɨlɨlaga ɨNongwa ɨNyinza ɨzya Mwɨnɨ ʉYeesu hu mwoyo gwonti.
Nantele bhahajendeelela abhaazye ɨNsimbo ɨMfinjile ɨnsiku zyonti huje,
bhasimishizye huje,
amazwi ɨgo ʉPaulo ga‑ayanga gɨ lyoli.
12 ABhayahuudi abhinji,
peeka na bhalume na bhashɨ abhagoosi bha saga Bhayahuudi bhabhinji bhahamʼmwɨtɨha ʉYeesu.
13 Leelo,
aBhayahuudi abha hwi‑ibooma ɨlyɨ Tesaloniike lwa bhaamanya huje,
ʉPaulo alʉmbɨɨlɨla ɨNongwa ɨNyinza ɨzya Yeesu na hwi‑ibooma ɨlyɨ Belooya,
bhahabhala hwope,
bhahabhomba ʉlwese ʉlugoosi na‑asonsheelezye ɨmpʉga ɨya bhantu.
14 Abhooziwa abha hu Belooya bhahamʼmwega ʉPaulo lubhilo,
bhahanʼtwala hu nsʉmbi,
leelo ʉSiila nʉ Tiimoti abheene bhahasyala hwʉhwo.
15 Bhaala bha bhahamʼmwejile ʉPaulo,
bhahamʼfisya hwi‑ibooma ɨlyɨ Aseene.
Hu habhaazyo ha bhaweela,
ʉPaulo ahabhasonteelezya nɨ nongwa ɨzya hunʼtwalile ʉTiimoti nʉ Siila huje,
bhasahaakhale,
bhamʼmɨnjɨlɨzyaje lubhilo.
ɄPaulo ayanga na bhantu abha hwi‑ibooma ɨlyɨ Aseene
16 Hu habhaazyo ʉPaulo lwa wanʼgʉʉlɨla ʉTiimoti nʉ Siila hu Aseene,
ahalola huje,
mwi‑ibooma liila lyonti mumemile ɨvifwani ɨvya bhangʉlʉbhɨ.
Ɨpo ʉmwoyo gwakwe gwahazugumila haani.
17 Ahanda atʉʉshe mu nyumba ɨya‑apuutile na‑amanyiilile.
Ʉmwo ahajehanaga na Bhayahuudi na bha saga Bhayahuudi leelo bha bhahunʼtiniha ʉNgʉlʉbhɨ.
Nantele,
ahajehanaga pa pazelu ɨnsiku zyonti na bhantu ɨbho ahakhomaanaga nabho hu lembuka.
18 Hu lembuka ʉhwo ahakhomaanaga na bhantu bhamo bha bhahali nɨ njeele tee bha bhahakwiziwaaga Bhaepukuleewoa na Bhasitoyiki.
b Ɨbho bhope bhahanda adaliihane nʉ Paulo.
Bhamo bhahaga,
“Ahwanza ayanje yeenu ʉnʼnyanzi ʉnʉ?”
Bhamo bhahaga,
“Ɨloleha huje,
alʉmbɨɨlɨla ɨnongwa ɨzya bhangʉlʉbhɨ abhɨ shijenu.”
Bhahayanjile ɨsho,
pɨpo ʉPaulo ahabhalʉmbɨlɨlaga ɨNongwa ɨNyinza ɨzya Yeesu na‑azyʉshe hwakwe.
19 Ɨpo abhɨ njeele bhaala bhahanʼtwala ʉPaulo hwi‑ikoloti igoosi ɨlya bhamanyiihanyi ɨlyo lyahakwiziwaaga Aleyopago.
Abhagoosi abhi‑ikoloti bhahamʼmʉʉzya bhahaga,
“Ʉtibhʉʉzye natɨ ɨmanyizyo ɨnjenu zyʉ‑ʉmanyizya abhantu,
20 pɨpo tʉmvwɨzye huje,
ʉleetile ɨmanyizyo ɨnjenu.
Ɨshi tisʉngwa huje,
tizimanye aje,
zili bhʉlɨ.”
21 Bhahayanjile ɨsho,
pɨpo abhantu abha huula hu Aseene,
peeka na bhajenu abha hutali bha bhahakhalaga ʉhwo,
bhahasʉngwaga atejeelezye lwene ɨnongwa ɨnjenu,
na huziyanje.
22 Ɨpo ʉPaulo ahɨmɨɨlɨla mwi‑ikoloti liila ɨlyɨ Aleyopago,
ahaga,
“Mwɨ bhantu bha hu Aseene!
Naamanya huje,
amwɨ muli nʉ lwɨtɨho ʉlugoosi haani hwa bhangʉlʉbhɨ.
23 Lwa nahashilaga mwi‑ibooma ɨli,
nahalolile sha mupuuta abhangʉlʉbhɨ.
Nahalolile nɨ shipuuto ɨsha‑afumizye ɨnsangu sha shisimbwilwe amazwi ga gayiga,
Hwa Ngʉlʉbhɨ wa saga amanyiha
ɄNgʉlʉbhɨ ʉyo wa muhumʼpuuta sinta humʼmanye,
ya yʉʉyo anɨ ɨhwanza aje,
ɨmbalʉmbɨɨlɨle.
24 ɄNgʉlʉbhɨ ʉyo ya yʉʉyo wa‑ahapelile ɨnsi nɨ vyonti vya vilɨɨho ʉmwo,
nantele yʉ Mwɨnɨ ʉwɨ mwanya nɨ nsi.
Ʉmwene saga akhala mu nyumba ɨmfinjile zya zizengwilwe na bhantu.
25 Saga abhombelwa na bhantu nkati ahwanza ahantu hwa bheene.
Ʉmwene wa‑ahubhapeela abhantu bhonti ʉwʉʉmi,
ʉmwoyi nɨ vintu vyonti.
26 Afume hwa muntu weeka,
ahapelile ɨvikholo vyonti ɨvya bhantu huje,
bhanyampaane mu nsi zyonti.
Afume halɨ,
ʉmwene ahabhabhɨshɨɨye nzɨɨla huje,
bhahayikhalaga hwi na hu habhaazyo bhʉlɨ.
27 ɄNgʉlʉbhɨ ahabhombile ɨzyo zyonti hu nongwa ya‑aje,
abhantu bhamʼmwanze,
lumo na hwi‑idala ɨlya‑apalamansye huje,
bhamʼmanye shinza.
Hwope ɨsho,
ʉmwene saga ali hutali nʉ wowonti mwaliitɨ.
28 Ɨnjanjile ɨsho,
pɨpo mwa mwene mwa tikhala na‑ajendeelele alembe.
Nanshi sha bhahayanjile abhamwabho mu nsimbo zyenyu ɨzyɨ nteelo huje,
‘Atɨ tili bhaana bhaakwe.’
29 Ɨshi,
atɨ tili bhaana bha Ngʉlʉbhɨ.
Hu nongwa ɨyo,
saga tihwanziwa asɨɨbhe huje,
ʉNgʉlʉbhɨ alɨngaana nɨ vifwani vya vigombwilwe hu zahaabu,
hu majela,
awe hu mawe.
Ɨvifwani ɨvyo vilɨnganyiziwa hu manyiihanyi ʉwa bhantu lwene.
30 Ɨmandɨ luula,
ʉNgʉlʉbhɨ ahali nkati saga alola,
abhantu lwa bhahabhombaga ɨzyo sinta amanye.
Leelo ɨshi,
ahubhalajizya abhantu bhonti poponti huje,
bhalaate ɨmbiibhi zyabho na huzileshe.
31 Bhahwanziwa alambe,
pɨpo ahabhɨɨshɨle isiku ɨlya hubhalonje abhantu bhonti hu lyoli,
hwi‑idala ɨlya muntu wa‑ahanʼsaluuye.
ɄNgʉlʉbhɨ abhasimishiziizye bhonti ɨgo,
hwi‑idala ɨlya hunʼzyʉsye ʉmuntu ʉyo mu bhafwe.”
32 Abhagoosi bhaala lwa bhʉmvwa huje,
ʉPaulo ayanga ɨzya‑azyʉshe hwa bhafwe,
bhamo bhahanʼsyonshela.
Leelo,
bhamo bhahamʼmʉʉzya bhahaga,
“Tihwanza ahutejeelezye nantele hu nongwa ɨzi.”
33 Ɨpo ʉPaulo ahafuma mwi‑ikoloti,
ahabhaleha.
34 Abhantu bhamo bhahamʼmwɨtɨha ʉYeesu,
bhahanda humʼmɨnjɨɨlɨle ʉPaulo.
Mwɨ‑ɨbho ahali ʉDiyonisyo,
ʉwa hwi‑ikoloti ɨlya hu Aleyopago,
nʉ nʼshɨ ʉmo ʉyo itaawa lyakwe ahali yʉ Damaali,
na bhantu abhanjɨ.