Kooh hanheerkiɗ Ibrahiima, a gappa ɗe raakuukaŋ Isaahha
18
1 Wa nikee ŋ noh damiɗ, Nikiɗi teeɓukka Ibrahiima ŋ kidig ca yakak caŋ Mamre, raak ɗe ɓoofiɗ ŋ nguɓu ɗiipaŋ ɗe. 2 A jaɗtuk jaɗtuk, a hotta ɓo' kaahay ŋ fikiice, Ibrahiima kurukka ŋ ɗiska a ɓoofe, a arra kaɗ coha na ɓa.Wa a ree, a ƴekkiɗta ɓa, 3 a woosa ne : « Kilifaani, kana so taamboh an, mi yii kiim ɗa wa, wela ŋ kahni, 4 ɓa on ɗu masuɓ ɗu ɓook kot ciŋ ɗu, ɗu iɗsiɗuk ŋ saangni, 5 ŋ ɓayiɗ ɗu mbuuru ƴissuut ɗu ɓaatuk hatil, ɗu han coot ; lahiŋ ɗu ŋ ɓoyi joy ɗu taambkoh nikuu ɓarang ɓarang. » Ɓa woosa ɗe ne : « Ee, tuma findi fu woyoh. » 6 Ibrahiima nuppa, a aassa ŋ ɗooƴ ɗiipa, a woosa Saarata ne : « Ara ɓay andaar mun kaahay ŋ wi uup baah, fu siiɓa, fu haɓiɗ mbuuru. » 7 Ibrahiima nupissa ŋ gat ca, a ɓayya ɗoon faymiɗ, a eɗta ɗe ƴaar ŋ ñaam caŋ ɗe, a arra ɗe haɓiɗ.
8 Wa sepet ca non, Ibrahiima deƴiɗta ɓa ca na miis gundiɗ na miis kal ; ɓa ñameeɗa ŋ saang na, a tufukka ne a taambkoh ɓa. 9 Ɓa meekissa Ibrahiima ne : « A nde ɓitiifu Saarata ? » A woosa ɓa ne : « A yii ŋ ɗooƴ ɗiipi. » 10 Yino nga ɓa woosa ɗe ne : « Mi na woye ɗu ini nik : Ŋ hey dokisse ndii maas, ŋ raakan Saarata ɓitiifu raakiɗ kuɓu ƴaar. » Weem raak Saarata ŋ nguɓu ɗiipa, ŋ finho ɓoyi, a kerheeɗa ɓa. 11 Weem raak Ibrahiima yaɓko'iɗ te Saarata namiɗ ɓitif ŋ raak kuɓu. 12 Saarata ƴennda ŋ ɗooƴ ce, a woosa ne : « Moo mi yi ɓitfiɗii ŋ minisiɗ yeg neɓdeem e ? Te ŋ hot heɗ tuuƴ co yaɓko'iɗ. » 13 Nikiɗi woosa Ibrahiima ne : « Wa ye tah Saarata ƴennda, an : “ Ŋ ɓitfi ŋ ɓitif wii, ŋ minisiɗ raak kuɓu e ? ” 14 Andi raakiɗ ini wooñ Nikiɗi ? E mi woo ɗa wa, ŋ hey dokisse ndii maas, ŋ raakan Saarata raakiɗ kuɓu ƴaar. » 15 Wi Saarata kerah woo keem, a tiitta, a taasukka an : « Ŋ ƴenɗi. » Nikiɗi woosa ɗe ne : « Aha'kay ! Fu ƴeniɗ. »
Ibrahiima kiimiɗ ne Kooh marak ŋ yurhiɗ caŋ Sodom
16 Finho ineem, hanheeca kaahay ca kurukka ne ɓa coot. Ibrahiima ɓennda ɓa po ɓa hoteeɗa Sodom ŋ oona. 17 Nikiɗi woosa ŋ haf ce ne : « Andi ŋ hey ɗasɗohe Ibrahiima ini ma hey tume ? 18 Laam, a hey fere cuuɓ angiɗ, raakiɗ hatil, te ŋ hey barke'ɗe cuuɓ ciŋ kehƴi jen, saguuce. 19 A yi ŋ kooɗ ne, a teeɓ kuɓuuciŋ ɗe na ɓi rimkohan nga ɗe, ɓa pesohe keeh na yurah, findi Nikiɗi waaɗoha ; ndaa, ŋ min ɗe haɓɗiɗ in ci ŋ gap ɗe. » 20 Nikiɗi woyissa ɗe ne : « In ca Sodom na Gomor na yambse, yakiɗ lool, bakaaɗ caŋ ɓa uupiɗ. 21 Ŋ hey yipke po nga ŋ marak andi ɓaa tumohe findi ŋ kerhoh ; ŋ hey inhe, andi wa raakoh ɗaa, walla wa raakohɗi ɗaa. »
22 Ndeem ƴaaɓa kanak ca yurhiɗta ɓak Sodom, waaye Ibrahiima tassa na Nikiɗi. 23 Ibrahiima reɓpa, a tummba ne : « Heɗ ɓoo, hanaa fu heyɗi apndohe yurhiɗ na yurhaaɗi ? 24 Nik ne yurhiɗ ndaŋkiyaah yatuus (50) raakiɗ ŋ kur ka ɗah, fu hey ɓa apndohe e ? Andi fu heyɗi ɗaase ɓi kur ka sagu ndaŋkiyaah yatuus (50) ceem ? 25 Fu tumohanɗi muk in mand ɗaa, fu apndohanɗi yurhiɗ na yurhaaɗi, tah po yurhiɗ kaan sagu yurhaaɗi e ? Fu yi atte'ohiŋ kehƴi jen, fu tumanɗi yurhiɗ e ? » 26 Nikiɗi loffa ɗe ne : « Ŋ raak yurhiɗ ndaŋkiyaah yatuus (50) ŋ ɗooƴ Sodom ɗah, ɓa hey tahe po, ŋ ɗaas ɓi kur ka jen. » 27 Ibrahiima woyissa ne : « Ɗaas so de Heɗ ɓoo, mi yii kaañ po ŋ woyee na ɗa, te ŋ merhey dong ; 28 nik ne ndaŋkiyaah yatuus (50) ɓi yurhiɗ ceem ɓa tasiɗ ɓo' yatuus ɗah, yatuus ceem hey tahe po fu ɗumb kur ka e ? » Nikiɗi loffa ne : « Ŋ raak ɓo' ndaŋkiyaah nikiis na yatuus (45) yurhiɗ nga ɗah, ŋ heyɗi wa ɗumbe. » 29 Ibrahiima woosa ne : « Moo ndaŋkiyaah nikiis (40) raak nga ɗah ? » Nikiɗi loffa ne : « Ŋ tumanɗi ali in, sagu ndaŋkiyaah nikiis (40) ceem. » 30 Ibrahiima tummba ne : « Heɗ ɓoo kanaat ayruk de, ŋ woyis woyis, moo ndaŋkiyaah kaahay (30) raak nga ɗah ? » Nikiɗi loffa ne : « Ŋ tumanɗi ali in, ne ŋ raak ndaŋkiyaah kaahay (30) nga ɗah. » 31 Ibrahiima woosa ne : « Po ŋ kaannja woo na Heɗ ɓoo ; moo ndaŋkiyaah kanak (20) raak nga ɗah ? » Nikiɗi loffa ne : « Ŋ tumanɗi ali in, sagu ndaŋkiyaah kanak (20) ceem. » 32 Ibrahiima woosa ne : « Heɗ ɓoo kanaat ayruk de, ɗal wii ɗah, ŋ woyissanɗi ; moo ndaŋkiyaah raak nga ɗah ? » Nikiɗi teesa ne : « Ŋ tumanɗi ali in, ne ŋ raak ndaŋkiyaah nga ɗah. » 33 Wa Nikiɗi ƴut woo na Ibrahiima, a cootta. Ibrahiima dokukka kahan ce.