Ɓi Sodom teeɓohiɗ aƴaarkaŋ ɓa
19
1 Waaye malaakaaca kanak ca kaɗee Sodom, ɓa ree nga na niina. Ɓa raak Loot ɓoofiɗ ŋ teembohaara, ŋ aasohaanaŋ miira wil kur kaa. Wa a hot ɓa, a kaɗta coha na ɓa, a ƴekiɗta ɓa po pukiŋ ɗe reesa kehƴi. 2 A woosa ɓa ne : « Kilifaaci, ne wa neɓ ɗu ɗah, welaat ŋ kahan ɓoyi joy ɗu taambkoh, ɗu ɓook kot ciŋ ɗu, ɗu neeh po kim na ɓaaɓa ɗah, ɗu han taalndiɗ waasiŋ ɗu. » Ɓa loffa ɗe ne : « Tee fu faɗ ɓoo neeh ŋ hari rek. » 3 Waaye Loot kiimmba ɓa po ɓa teyɗukka, ɓa wella kahan ce, a nakohiɗta ɓa haɓɗiɗu kañam neɓiɗ na mbuuru, ɓa ñammba.4 Ɓa raawɗi faanuk ndoom, ɓi kur ka, ƴaar caŋ Sodom, ŋ ƴina po yakka, ali ɓo' tasɗi, ɓa willa kahna, 5 ɓa ɓeeɗukka Loot, ɓa woosa ɗe ne : « Ɓa nde ƴaaɓi hay kahan fu na niini, pulɗaat ɓa ndii, ɓoo faanuk ɓa. » 6 Loot pulla nga ɓa ŋ nguɓu kahna, a rannga buntaana, 7 a woosa ɓa ne : « Ƴaaɓiŋ ngo, ŋ kiim ɗu wa kiim, kanaat tum ini moɗaaɗiineem waay ! 8 Sikɗukaat, ŋ raakiɗ kuɓu kanak cafƴiɗ, ɓi inahɗi ƴaar, ɗu waaɗ ɗah, ŋ puliɗ ɓa ndii ŋ hari, ɗu haɓiɗ ɓa ini neɓ ɗu, waaye ƴaaɓi kanak cii, kanaat ɓa reɓ, laam, ɓa hanheeciŋ ngo. » 9 Ɓa woosa ne : « Kurka ndii waay. » Ɓa ɓaatta nga ne : « Ƴaari nikohaah nikohaah ndii dong, a waaɗ ɓoo teeɓ waas ; ɓoo hey ɗa tume ini uup moɗaaɗi wiŋ ɓa. »
Weɗ ɓa yeñoh Loot yeñ miskiɗ ne ɓa yahroh buntaana, 10 waaye ƴaaɓa hanheeca eɗndukka Loot na yaah, ɓa ɓekka ɗe ŋ ɗooƴ kahna, ɓa ranngaa, 11 ɓa mbiraañiɗta has caŋ ƴaaɓa nikee ŋ nguɓu kahna, ŋ ya uup ƴissuut po ŋ ya uup yak, ne ɓa hotissuu buntaana.
Kooh ɗumbiɗ Sodom na Gomor
12 Wa ineem coot, hanheeca kanak ca woosa Loot ne : « Andi fu raakiɗ ɓaah ndii findi payum, kuɓu ƴaar mbaa ɓitiɓ ? Pulɗa ɓaah ciŋ ɗa ndii jen, 13 laam, ɓoo hey ɗumbe kur kii. Nikiɗi yegiɗ moɗaaɗiici na woyse nga te ca raakiɗ ; a yi woos ɓoo ne ɓoo ɗumba. » 14 Ineem tahha Loot pul, a woosa fiir ca hee toke kuɓuucaŋ ɗe ɓitiɓ ca ne : « Araat ɗu pul ŋ kur kii laam, Nikiɗi na hee wa ɗumbe. » Waaye ɓa liiɓpa ne a na apsukee ɓa.
15 Wa wiisaaɗiina ree, malaakaaca tufukka Loot an : « Ara coot na ɓitiifu na kuɓuuciŋ ɗa ɓitiɓ ci kanak ci, fu kaanuu ŋ naamooni na hee ŋ kur kii sagu aƴaarkiŋ ɓa. » 16 Loot nikka nga, a yiihsiɗkeeɗa, hanheece kanak ca ammba ɗe na ɓitiice na kuɓuucaŋ ɗe kanak ca ŋ yaah, ɓa puliɗta ɓa po ɓa ussa kur ka sagu miski a miskee Nikiɗi.
17 Wa ɓa puliɗ ɓa ŋ bilaf fa, yinoora woosa Loot ne : « Saandoha, ka heeluk, ka tufuk ŋ hatandii, kaɗa ŋ tangooceen, fu min muc. » 18 Loot woosa ɗe ne : « Bara ! Heɗ ɓoo, 19 fu keeñkohiɗ to, fu tumɗiɗ to in yakak po ŋ muciɗ, waaye, ŋ nar kaɗ po tangooceen ɗah, naamooni hey yo rahse, ŋ kaan. 20 Fu hotiɗ kur keen e ? Wa reɓiɗ po ŋ joyiɗ min ree nga. On ndo ŋ saandoh nga, ne ŋ min muc, laam wa kur ƴissuut. » 21 Malaakaani woosa ɗe ne : « Ee, po woti ŋ ris ɗa tufkoh ; kaɗa, ŋ heyɗi ɗumbe kur ki fu na wee weem, 22 waaye artuka fu kaɗ laam, fee fu reeɗi ɗah, ŋ minɗi tum ali in. » Ineem tahha po kur kaam teekuusa Sowar (in ƴissuut).
23 Wa Loot ree Sowar, tel noha puliɗ. 24 Weɗi Nikiɗi toɓoh yongkaah na suufarb ŋ ɗafuk Sodom na Gomor. 25 A ɗummba kur ceem jen na ɓooɓa gene nga ca, na oona jen na kidig ca nikee nga. 26 Ɓiti Loot heelkeeɗa, a ɓoƴsuusa ɗus meɗa.
27 Wa Ibrahiima kuruk na ɓaaɓa teel, a kaɗta ŋ ɗiska a saɓsukohee na Nikiɗi ; 28 a marakka ŋ ɓak Sodom na Gomor na ina wil ooneem jen, a hotta ɗuuku haa ɗuuku koraaɓ puloheeɗa ŋ kehƴa rapeeɗa.
29 Wa Kooh na ɗumbe Sodom a ɗaakkoheen Ibrahiima nof po tahha a muciɗta Loot ŋ naamoona a yahrohoh kur ca Loot genohe.
Faseehiŋ Amon ci na Mowab ci
30 Wa ineem coot, Loot kaañisɗi nik ŋ Sowar, a toorukka ŋ tangooca, a yi na kuɓuucaŋ ɗe ɓitiɓ ca kanak ca, ɓa gennda ŋ hur atoh. 31 Wa raakka mbeh, yi nikee saawa woosa taambɗoh ce ne : « Ɗiski wa nik ndii baab ɓoo a yi yaɓko'eeɗa, te ƴaar raakɗi ndii, ɓi fu inah ne ɓa miniɗ ɓoo tok findi wa na tumohse. 32 Mbaa haya ɓoo aniɗ baab ɓoo biiñ, ɓoo hun na ɗe, ɓoo min ɗe raakiɗ ɓi pulohan nga ɗe po tiikiŋ ɗe ƴimuu. »
33 Ŋ weka mbaɗi ɓa aniɗta baab ɓa biiñ, saawa aassa faanukka na ɗe, te Loot yegɗi faankaŋ yeem na kurkaŋ ɗe. 34 Wa Kooh wiis saawa woosa taambɗoh ce ne : « Niinma, ŋ huniɗ na baab, mbaa ɗah, ɓoo anɗisaat ɗe biiñ woti, fu nam kaɗ fu faanuk na ɗe, ɓoo min ɗe raakiɗ ɓi pulohan nga ɗe. » 35 Ɓa anɗissa baabiŋ ɓa biiñ ŋ wekaam, taambɗoha nammba kaɗ faanukka na ɗe ; Loot namɗi yeg faankaŋ yeem na kurkaŋ ɗe. 36 Kuɓuucaŋ Loot tumoh na baab ɓa ɗaa, ɓa taambohha nga, ɓa ammba rook. 37 Wa saawa raak kuɓu, a nikka ƴaar, a teekka ɗe Mowab (puloh ŋ baab), a yi caaciŋ Mowab ci woti-wotic 38 Taambɗoha nammba raak kuɓu ƴaar, a teekka ɗe Ben-Ammi (kuɓkiŋ ɓaahtohiŋ ngo), a yi caaciŋ Amon ci woti woti.