Nguɗuk weɗ ini teeɓoh ambtiɗohiŋ Kooh na Ibrahiima
17
1 Wa Ibram raak kiis ndaŋkiyaah yasna-nikiis na yasna-nikiis (99), wa raakka mbeh, Nikiɗi teeɓukka ɗe, a woosa ɗe ne : « E mi Koohi Min, pesa findi ŋ waaɗoh, fu nik yurhiɗ. 2 Ŋ hey ambtiɗohe na ɗa te ŋ hey ɗa tume ɓasil. » 3 Wa a kerah woo keem, Ibram ƴekka po pukaŋ ɗe reesa kehƴi, Kooh taalndiɗta woyeeɗa na ɗe, 4 a woosa ɗe ne : « Ambtiɗohiŋ ngo na ɗa, wa na hee tufkohe an : Fu hey nike baabiŋ ɓi cuuɓi-cuuɓ, 5 e fu teekusuuɗi Ibram (baab yakɗuuɗ) waaye Ibrahiima (baabiŋ ɓi laayiɗ), laam ŋ hey ɗa tume caaciŋ ɓi cuuɓ laayiɗ. 6 Ŋ hey ɗa tume ɓasil, ɓi cuuɓi-cuuɓ hey pulohe nga ɗa, ɓi buur sah hey rimkohe nga ɗa. 7 Ŋ hey ambtiɗohe na ɗa, fu na ɓi na hee rimkohe nga ɗa, gomal nu nik, wa hey nike po faw. Ŋ ineem ŋ hey nike Koohiŋ ɗa na ɓi na hee rimkohe nga ɗa. 8 E kur ki fu nikoh jaambur wii, wa nikka Kanaan, ŋ hey ɗa wa one jen, fu na ɓi na hee rimkohe nga ɗa, ɗu raakoota po faw ; te ñam na hee nike Koohiŋ ɓa. »9 Ŋ finho ineem, Kooh woyissa Ibrahiima ne : « E fu na hey taambkohe ɓakiŋ ɗa ŋ ambtiɗohiŋ ngo na ɗa, fu na ɓi na hee rimkohe nga ɗa, gomal nu nik. 10 Taambkohohaat ambtiɗohiŋ ngo na ɗu, fu na ɓi na hee rimkohe nga ɗa, an : Ƴaar nu nik nga ɗu ɗah, joyiɗ nguɗuk, 11 nguɗkeem weɗi na hey teeɓohe ambtiɗohiŋ ngo na ɗu. 12 Komaaki ƴaar nu raak neeh yasna-kaahay (8) ɗah, a joyiɗ nguɗuk ; na, gomal nu a min ɓaahoh ɗah, yi rimohu ŋ kahan fu po yi romohu ŋ jaambra ɓaahɗi ŋ cuuɓiŋ ɗa. 13 Ɓa jen ɓa joyiɗ nguɗuk, a nik ñaami rimkoh ŋ kahan fu mbaa yi fu rom na koporiŋ ɗa. Te nguɗki na hee nike ŋ faan ciŋ ɗu, weɗ ini na hee teeɓohe ambtiɗohiŋ ngo na ɗu po faw. 14 Ƴaar nu nguɗukɗi, te nik ne a sang sang ɗah, a hey pulɗasse ŋ cuuɓiŋ ɗe laam raakan ɗe nguɗiɗ ambtiɗohi ŋ tufkiɗ. »
15 Ŋ ineem Kooh woosa Ibrahiima ne : « Ŋ ini kaɗ ɓitiifu, a teekusuuɗi Saraay ; waaye tiikiŋ ɗe wa Saarataa koti. 16 Ŋ hey ɗe barke'ɗe, ŋ on ɗa kuɓu ƴaar na ɗe, ŋ hey ɗe barke'ɗe, po a nikan caaciŋ ɓi cuuɓi-cuuɓ ; ɓi buur sah hey pulohe nga ɗe. » 17 Ibrahiima ƴekissa po pukaŋ ɗe reesa kehƴi ; a ƴennda, a woosa ŋ ɗooƴ ce ne : « Moo ƴaar na kiis teemet (100) minisiɗ raak kuɓu e ? Te Saarata yii, na kiis ciŋ ɗe ndaŋkiyaah yasna-nikiis (90) cii, hey raake kuɓu e ? » 18 A woosa ne : « A ! Te fu amb ŋ Ismaayla rek ! » 19 Kooh woosa ɗe ne : « Ŋ woo ne hee, Saarata hey raake kuɓu ƴaar yi fu na hee teeke Isaahha,b ŋ hey ambtiɗohe na ɗe po faw, a yi na ɓi na hee rimkohe nga ɗe. 20 Ini kaɗ ŋ Ismaayla, ŋ kerhiɗ woo kiŋ ɗa, ŋ hey ɗe barke'ɗe, ŋ tum ɗe ɓasil, e kilifa ndaŋkiyaah na kanak (12) puloh nga ɗe te a fer cuuɓ angiɗ. 21 Waaye ambtiɗohiŋ ngo na ɗa nak, ŋ hey wa tufkiɗe na Isaahha, kuɓki Saarata na hee raake maas. » 22 Wa Kooh ƴut woo na Ibrahiima, a faɗta ɗe ndaam, a cootta ɗafka.
23 Weɗi Ibrahiima ɓayoh kuɓkiŋ ɗe Ismaayla na ƴaaba rimohu kahna na ɓa a romoot na koporaŋ ɗe, ƴaar ca nikee ŋ kahan ce jen, a nguɗta ɓa ŋ noha mbaɗi ; findi Kooh woyoh ɗe wa. 24 Wa Ibrahiima na nguɗke raak ɗe raakiɗ kiis ndaŋkiyaah yasna-nikiis na yasna-nikiis (99). 25 Kuɓkiŋ ɗe Ismaayla nameen raak kiis ndaŋkiyaah na kaahay (13) wa a na nguɗke. 26 Ŋ noha mbaɗi, Ibrahiima na kuɓkiŋ ɗe Ismaayla nguɗukka. 27 Ƴaar caŋ kahan ce jen nammba nguɗuk na ɗe mbaɗi, ɓa rimohu nga, na ɓa a rome.