Jerusalem athar
21
1 Hatuka chu anvān athar le ramual athar ka mu na,
asik chu anvān mānsa le ramual mānsa chu anpei sua zeia,
hava han chu Tipuilian hām om lāi nō ni.
2 Hatuka koi,
Johanin Khopui Ānthiang Jerusalem thar chu apasal ranga muinu anhui sabaka ei anliang anga Pathian kōm,
anvān len āta honga chum ka mu na.
3 Hatuka anvān āta hē anringpa ankhēka:
“Enta,
atun chu Pathianin miring ngāi bila a honga om zei,
amān abil u na om inti.
Amāni ngāi chu ami ngāi chang unti,
Pathian apum ngēt amāni bila om intia,
a Pathian u chang intia.
4 Hatuka amān amit u nāta mitrathi dōra huipe inti.
Thīna om lāi nō ni,
lunghāngna,
chapna le āna riatna reng om lāi nō ni,
asik chu machina amarua ngāi dōra atheng sua zei,”
ati na ka riata.
5 Hatuka rēng chōmphāng chunga ansutpu hān ati na:
“En ro,
atun chu aloma athara ka sin zit zei,”
ati na.
Hankēng ka kōma ana ti na:
“Maziak ro,
hiva chong ngāi hi aiamrua le ādik kēng,”
ati na.
6 Hatuka chu ka kōma ana ti na:
Anzui zei,
Koi hi Alpha le Omega,
aphutna le amongna.
Ati anrāl tak chu tinār āta asuak damna ti chu man abui man ne ka ti.
7 Azuipu tak chu aloma hiva ngāi dōra lua kiar inti,
hankēng Koi hi ama a Pathian ni ka ti,
ama ha ka nāi chang inti.
8 Tenchu achithāi andop ngāi,
a iam nōk ngāi,
antir rua ngāi,
mithat ngāi,
ahur ngāi,
dōi chong athei ngāi,
ramīl anmōk ngāi,
milak athei ngāi dōra ei chang u rang chu moi le gondok ei kāngna dīla om unti.
Hiva hi thi anni ani na.
Anvān athar le ramual athar
9 Hatuka chu vānpalāi sari ngāi bila angkhat,
akuta,
nukhōn khīta rikhua ābit sari changna khēng sari ādōnpu hān ka kōm ahonga ana ti na:
“Hong ro hin,
Berate amuinu ha na man mu ka ti,”
ati na.
10 Hatuka chu Rathāna mual alian ansāngpana ana kalpuia,
hatuka khopui ānthiang Jerusalem,
vānrama Pathian kōm āta ahong achum ha ana man mu na.
11 Hava khopui chu Pathian lianna adōna,
hatuka hava ei ēl zia ha achālaka lung aman ātam zāt ang le jaspar lung anga kristal lung avār ani na.
12 Hatuka hava han alian le ansāngpa lung bang aneia,
hava han suakhār sōmleianni a om a,
hava suakhār ngāia han vānpalāi sōmleianni a om a,
hanūk chu hava suakhāra han Isreal nāi ngāi nam sōmleianni ngāi raming anziak a om a.
13 Sualam tiang suakkhār anthum,
mār tiang suakkhār anthum,
sim tiang suakkhār anthum,
tāklam tiang suakkhār anthum.
14 Hava khopui lungbang hān ei anphunna sōmleianni adōna.
Hatuka hava achunga han Berate kuitīr Sōmleianni ngāi raming a om a.
15 Ka kōma ana chongpui hān khopui le asuakkhār le abang ngāi amāina rāngkachak nōl khat adōna.
16 Khopui chu kil manli,
adung akhang anrual chiang ani na,
khopui chu nōl le amāia,
mēl asāng khat raza manli akāia,
adung,
akhang le ei ansāng anrual chianga.
17 Hankēng khopui abang chu amāi rēta,
muk raza khat muk sōm manli muk manli akāia.
Vānpalāiin muk ei māi ha miringin ei māi ang ani na.
18 Hatuka abang chu jaspar lung alu zāt le ānsin ani na,
hatuka khopui ha dāpōn anthiang anga rāngkachak anthiang le ānsin ani na.
19 Khopui abang ei anphunna ngāi ha aman ātam zāt lunglu chi tin le anliang ani na.
Anphunna mānsa chu jaspar lung ani na,
annina chu saphir lung le,
anthumna chu kalkidon lung le,
manlina chu emerald lung le ani na.
20 Rangāna chu sardonuk lung le ani na,
arukna chu sardion lung le ani na,
sari na chu krusolit lung le ani na,
ariatna chu berul lung le ani na,
akuana chu topaz lung le ani na,
sōmna chu krusopra lung le ani na,
sōmleikhatna chu jakintho lung le ani na,
sōmleiannina ha chu amethusto lung le ani na.
21 Suakkhār sōmleianni ngāi ha lungluvār sōmleianni ani na.
Suakkhār angkhat chip ha lungluvār angkhat seng lehan ānsin ani na,
hanūk chu khopui lampui chu rāngkachak anthiang dapōn avār ang le ānsin ani na.
22 Hanūk chu hava khopui sūnga han biakin reng mu makunga,
asik chu Puma Pathian le Berate len kēng biakin ani zei.
23 Hava khopui a ēl ranga ani le tha nāng lāi nō ni,
asik chu Pathian ei lianān ei ēl kēng,
hava han Berate kēng lēm ani zei.
24 Hatuka nam tin,
sandama a om ngāi chu hava ra-ānga kal chōi unti,
hanūk chu ramuala rēng ngāiin ei anlian u na le ei anlal u na ngāi hong chōi unti.
25 A suakkhār ngāi chu ei ankhārna nikhua om lāi nō ni,
zān um om lāi nō ni.
26 Nam tin ei anlianna le ei anlalna hava han hong chōi unti.
27 Tenchu hava han itē ānnim neinun reng lūt thei lāi nō ni,
hanūk chu antirrua om athō ngāi,
le milak athei ngāi um lūt thei nō ni.
Tenchu Berate Damna Lekhabūna araming achuang ngāi rong kēng alūt rang.