1
1 Koi Juda,
Isua Krista asuak le Jakob anāipa hīn Pa Pathianin abinga ei khāi ngāi,
Isua Kristān ei rungtit le ei kui ngāi kōma kei maziak.
2 Phūkdāina,
riangvāina le anditna na chung u na ātam sabaka pung rase.
Āsia thō le Pathian
dōn lui ngāi mabāk
3 Ka lōm madit ngāi,
koinīn na loma sandamna anrual chianga nei man ruia na kōm u na anziak ranga apūt sabaka tak kei sat ani na.
Hanūk chu mīnthiang ngāi kōma voi khata anbetōk sua rui ha achālaka aduia arung ranga lekha anziaka lungngamna ana pēk u rang hi anāng ati na ka riata.
4 Asik chu mi senkhat nangni ngāi kāra maruka ahong alūt a om u na.
Hava ngāi ha Pathian dōn lui ngāi ani u na.
Hava ngāi hān koini na Pathian alungkhamna chu ramsa ngāi hurna anga hurna ei manchang u.
Hanūk chu Athōthei kiar koini na Pathian angkhat dak le koini na Puma Isua Krista chu ei maham u nōk ani na.
Hava ngāi āsia ei anlō u na rang rui ha tian lāi āta alei andang sua ani na.
5 Nangnīn voikhat chu alom peia ariat zit sua na ni u nām nisela kei na manriat rēt zōt u chu,
Pumān Aigupta ram āta ami ngāi amazōk sua nām nisela nukhōna aiam nōk ngāi chu apei zita.
6 Hanūk chu vānpalāi ngāi adingmun rēng u luia ei om u na mun amāk ngāi chu nikhua aliana ruiril ranga tāituana azīng kāra zīngzira ankhita Pathianin ei siak ani na.
7 Havan tin anga Sodom le Gomora khopui le aravēla khua ngāi ha aleko tianga ataksa u ngāi hurna lama ei mang u sika tāituan moipuia antakna atiar ranga enruana ei hong manlang ani na.
8 Havan tin ang dēna hiva mi ngāi hīn ramang aphan u na ataksa u ngāi chu ei mannim u,
ningneina adōn ngāi tel u mak,
anlianna mi ngāi mani ēro athō u na.
9 Tenchu vānpalāi ngāi bila alian khīt angkhat Mikael lua mana Mosi aruak ruia diabola ankhalpui lāi han,
āsiat ei manlō rang ngam mak,
tenchu ‘Pumān na ngo rase,’
ati pe na.
10 Tenchu hiva ngāi chu amānīn ei riat u nōk ha kēng asiat ei ril u.
Amāni chu riatna dōn lui ramsa ngāi anga piangpui riatna duai kēng ei dōn u.
Hatuka hava ngāi lehan amāni chu ei siat u ani na.
11 Kain alampui ei zī u sika achung u na khomāk tung rase!
Hanūk rēt chu lō manna ranga Balaam anga ei diknōkna lampui tianga alu sukkhuia atān u kēng,
hanūk rēt chu Kora anga ei sel u sika ei siat u ani na.
12 Hava ngāi hān nei andit u na bukhalāi nei kāi u na chu ei na mannim pe u.
Asik chu hava ngāi ha anchi anzak abui thaka na bil u na bukhalāi ei kop u,
aning ranga anvāi duai u kēng.
Hava ngāi chu rua masul lui ansūm thinthīn ei chōi titir ang,
khorāna thingkung amara abui ang,
mun annina athi ang,
razung anphōi ang u kēng.
13 Hava ngāi ha tipui liana tiduar ansok tibosonāl annim anga aninga mualphui ansak,
ārsi zuanga anthot titir ang u kēng.
Amāni ranga āzīng ei dongna muna tāituana ranga Pathianin ei siak ani na.
14 Adam len āta khūk sari changna mi Enok hān hiva mi ngāi ruia aphā mān āta alei hong ril ani na.
Amān:
“En ro,
Puma chu ami ānthiang ngāi asāng asāng le ahong rang ani zei,”
ati na.
15 Mi tin chunga rui aril rangpu ahong rang ani zei.
Mi tin Pathian tel lui ngāi,
Pathian tel nōkna sin athō dōra,
Pathian tel luia ei thō u ngāi hong manriat inti,
hanūk chu Pathian tel lui mi salui ngāiin Ama chunga chong āsia ei ril u sika āsia anlō ranga hong manriat inti.
16 Hava mi ngāi ha āchiar arāt le mi siat aril ngāi ani u na.
Anininga āsia ningōlna āzī ngāi ani u na.
Amūr u ngāi borāi thōna chong kēng ei ril,
hanūk chu anlāpna ranga athūna mīn pākna chong aril chachak ngāi ani u na.
Lungngam sakna chong
17 Tenchu,
kei madit ngāi,
koini na Puma Isua Krista kuitīr ngāiin aphā mān āta achong ril u ngāi ha retit u ro.
18 Amānīn ei nati u chu:
Hun ahek tika chu,
mani ēro ana thō ngāi la om unti.
Hava ngāi ha Pathian tel nōkna tianga aninga ningōlna lampui zī unti.
19 Hava mi ngāi ha ani zei taksa ningōl anga anmang mi,
Ratha Ānthiang dōn lui le ansenna asin ngāi ani u na.
20 Tenchu ka lōm madit ngāi,
nangni nei iam u na anthiang khīt chunga adettita andinga ansōn u ro.
Hanūk chu Ratha Ānthianga bōrzong u ro.
21 Pathian anditna lehan adettita om u ro,
hanūk chu tāituan damna ana pēk ranga koini na Puma Isua Krista ariangvāi muna chu ngāk chian u ro.
22 Ruizēk theina diktak amang chunga senkhat chunga riangvāi mu u tānla asa dima nei hian u na mang u ro.
23 Senkhat chu moisūmpui āta san tānla mazōk u ro.
Senkhat chu ataksa ningōlna lehan apuan annim le akhel ngāi chu chīntīr thō u ro.
Bōrsāng anpēkna