Chong māruai
1
1 Hiva hi Isua Krista chong anlangna.
Anrapa rui ahong asuak lilip rang ha asuak ngāi kōma anmu ranga Pathianin ei pēk ani na.
Hava ha avānpalāi khat amanga asuak Johan akōma ei hong tīra ei hong ril ani na.
2 Hiva Johan hi Pathian chong le Isua Krista ruia riatpui ei man ngāi dōra chu ahong anriatpu ani na.
3 Hiva deari chong ril theina chong anpore le anngāi tak chu ravān āsa kēng hanūk chu hiva asūnga chong anziak ngāi dōra azī tak chu ravān āsa kēng.
Asik chu hun ahong anāi kēng ani zei.
Chibai thōna le Isua anpākna
4 Koi Johanin,
Asia rama kuibing sari a om ngāi kōma kei maziak:
“A om sua le a om sa le ala honga om rang akōm āta le achōmphāng matona Ratha sari a om ngāi kōm āta lungkhamna le phūkdāina na kōm u na om rase.
5 Hanūk chu Isua Krista nāta lungkhamna le phūkdāina na kōm u na om rase.
Ama chu ariatpui aiamrua,
āthi ngāi bil āta atontīr mānsa le ramuala rēng ngāi chunga ning neina dōn rēng.
Koini anān dita athisen le āsia nāta ei na manthiang.
6 Amān Pathian le a Pa haso andom ranga rēnga le chāizūnga ei na sin.
Ama kōma ronga anlianna le anlalna chu tāituana om rase.
Amen.”
7 En u ro,
ama chu ansūm bila ahong rang ani zei.
Mit dōrān ama chu ei mu rang.
Ama āsun ngāiin um ei mu rang.
Hatuka ramuala mi dōra ama sika la chap unti.
Havan tin han ei la ni rang ani
na!
Amen.
8 “Koi hi Alpha le Omega ka ni,
Aphutna le Amongna ka ni,
Pumān ei ti.
A omsua le a omsa le ala honga om rang,
Aloma athōthei kiarin,”
ei ti ani na.
Misring Nāi Pasal
aphuazek angkhat
9 Na parual u koi Johan hi Isua Krista sika dūk ana diarpui,
khua le tīna antakna ana tiarpui hīn Pathian chong le Isua Krista ariatpui sika Patmos mualanlān ei ti u na muna om ka ni na.
10 Puma nikhuana Ratha hān ana maruaia,
hatuka ka nūk tianga bekūl maring anga maringpui khat ka riata.
11 Hava rasa hān:
“Koi hi Alpha le Omega,
Atontīr le Anūkhōn ka ni.
Nangin nei la
mu rang ngāi hi lekhabūna maziak ro.
Hatuka chu hava ha Asia
rama Ephesi,
Smurna,
Pergamos,
Thuatira,
Sardis,
Philadelphia le Laodikei kuibing sari a om ngāi kōma mathuan ro,”
ati na.
12 Hatuka ka kōma ana chongpui hē ha a en ranga ka nūk tiang kan hoia lēm chuangna rāngkachak sari ka mu na.
13 Hava lēm chuangna sari malāi taka tu khat lek mo “Miring Nāi Pasal aphuazeka,”
(Dan.7:13 )
ake mēr tenpei anchual puan ansil le arōpa rāngkachak kōngkhit lehan akōng akhit chu ka mu na.
14 Alu le asam chu bera mul angui anga angui,
arial anga avār,
amit ngāi chu moi achuang anga achuang ani na.
15 Hatuka akepha ngāi chu moia anling kāngsa vār ang ani na.
Arōl maring chu tītampa rasa ang ani na.
16 Hatuka achang kuta ārsi sari adōna,
amūr āta khendāi kiang anni mariam angei chu asuaka.
Hatuka amāi chu anisa lum lāi taka ani ēl ang ani na.
17 Ama chu kei mu le athi anga ake kunga kan luai lena.
Hatuka amān achang kut lehan ka chunga abānga ka kōma:
“Achi nō ro.
Koi hi Atontīr le Anūkhōn ka ni.
18 Koi hi adama a om ka ni,
kei thi,
tenchu enta,
tāituana ādam ka ni.
Amen.
Ka kuta kēng thīna le mithi khua chabi chu ei om,”
ati na.
19 “Hasika han nangin nei mu sua ngāi rui hi maziak ro.
Atuna a om sua ngāi le hiva suale nangkana ahong a om len rang ngāi rui um maziak ro.
20 Ka chang kuta ārsi sari a om nei mu le rāngkachak lēm chuangna sari ngāi chongrīl anthup chu hiva hi:
Ārsi sari ngāi chu kuibing sari ngāi palāi ani u na.
Hatuka lēm chuangna sari nei mu ngāi chu kuibing sari ngāi ani,”
ati na.