Ephesi kuibing kōma chongbe
2
1 Ephesi kuibing palāi kōma hiva chong hi maziak ro:
“Achang kut le ārsi sari adōna rāngkachak lēm chuangna sari ngāi malāia kal achōipu hān hiva chong hi ei ril:
2 Na sin thō ngāi dōra,
nei pōngna ngāi,
na dūk diarna ngāi aloma ka riat zit.
Hanūk chu mi salui ngāi nei diar thei nōk zia,
kuitīr ni luluia kuitīr anti ngāi ha nei mansina milak athei ei ni zia ngāi ha nangin na riata.
3 Antak na tiara diarna na dōna,
ka raming sika nei pōngna ka na riata,
hanūk chu nei chuai nōk um ka na riata.
4 Hanum nisela alakte demna ka na nei:
Asik chu nei maditna mānsa ha na mathān zei.
5 Hasika han hovan āta mo nei chul hava ha mandon rēt ro.
Hatuka na malung makhīr ro.
Hanūk chu mānsana na sin thō ngāi ha thō rēt ro.
Malung na makhīr nōk ten,
anrapa na kōma hong ka tinga na lēm chuangna amun āta thot ka ti.
6 Hiva hi nei sa angkhat chu ani.
Nangin Nikolai ngāi asin thō u nei matīr anga koin um ka matīr u na.
7 Ratha hān kuibing ngāi kōm chong ei ril hi anngāina kuar adōnin rangāi rase.
Tukareng azui tak chu Pathian paradis malāia damna thing a om mara ha asāk ranga pe ka ti,”
ati na.
Smurna kuibing kōma chongbe
8 Smurna kuibing palāi kōma hiva chong hi maziak ro:
“Koi hi Mānsa le Nūka ka ni na,
athi sua adam rēt hīn hiva chong ngāi hi kei ril.
9 Na sin thō ngāi ka riat,
nei antak zia le nei anriang zia ka na riat,
hanum nisela anchong kēng na ni.
Hanūk chu Jihudi ni luluia Jihudi anti ngāi,
tenchu soitān anchunna in u kēng,
hava ngāiin na siat ei na ril um ka riat.
10 Antakna nei la tiar rang ngāi hi achi nō ro.
En u ro,
diabolin nangni bila mi senkhat chu ankhumna ina ei na khum u rang ani zei.
Ansinnana nei om u na ranga ni sōm antak tiar u na ti.
Thī ten peia aiam ruana omtit ro,
hatuka damna lukhum chu na pe ka ti.
11 Ratha hān kuibing ngāi kōma chong ei ril hi anngāina kuar adōnin rangāi rase.
Tukareng azui tak chu voi anni thinān itē masiat lāi nō ni,”
ati na.
Pergamos kuibing
kōma chongbe
12 Pergamos kuibing palāi kōma hiva chong hi maziak ro:
Khendāi mariam kiang anni angei adōnin hiva chong ngāi hi ei ril:
13 “Na sin thō ngāi le nei omna ka riat.
Nei omna chu soitān achōmphāng ei omna kēng ka riat.
Hanūk chu ka raming nei raputtita,
ka rui ana riatpui le ka raming sika aiam rua Antipa,
soitān omna mun āta athat u lāi ngal han nei na iamna mathān mak che na.
14 Hanum nisela na tak chunga alakte demna ka na nei:
Asik chu nangni bila Balaam anchūna apom miring senkhat na ompui u na.
Hava Balaam hān Israel mi ngāi chu ei chul thei u na ranga Pathian ramīl matona dāli andar asāk rang le hurna tianga anmang ranga Balak akōm ei manchū ani na.
15 Havan tin dēn han nang um Nikolai ngāi anchūna āpom miring senkhat na ompuia.
Hava ang anchūna ha koin um kei matīr ani na.
16 Hasika han na malung makhīr u ta ro,
hano ten,
anrapa na kōma hong ka tinga,
ka mūra khendāi lehan amāni chu anduipui u ka ti.
17 Ratha hān kuibing ngāi kōma chong ei ril hi anngāina kuar adōnin rangāi rase.
Tukareng azui tak chu,
manna anthup asāk ranga pe ka ti,
hatuka lung avār khat um pe ka ti.
Hava lung chunga han raming athar anziak om intia,
hava amanpu rong nōk chu tutē ariat rang om mak,”
ati na.
Thuatira kuibing
kōma chongbe
18 Thuatira kuibing palāi kōma hiva chong hi maziak ro:
“Pathian Nāi Pasal chu,
amit moi achuang anga achuang le akepha ngāi kāngsa vār anga
a ēl hān hiva chong hi ei ril:
19 ‘Na sin thō ngāi,
nei maditna,
nei iamna,
haso nei domna,
na dūkdiarna ngāi dōra ka riat.
Hatuka na sin thō ngāi chu māna nei thō nēka nukhōna nei thō ātam ual ti hām ka riata.’
20 Hanum nisela na tak chunga alakte hiva demna hi ka nei:
‘Asik chu hava nupang Jezebeli,
dearinu anti ha nangin na lei nial ani na.
Asik chu amān ka suak ngāi kōma rual adōn rang le Pathian ramīla andar dāli asāk ranga ei manchūna lampui adik nōk tianga aruai ranga nei phal ani na.
21 Hatuka malung ansīrna ranga hēr ka pēka,
hanum nisela ei hurna nāta ansīr zōt mak.
22 En ro,
ama chu kual muna siak ka ti.
Hanūk chu ama le uiare ngāi um,
a om thō nāta malung amansīr māseng amāni chunga antakna lianpa khata masul u ka ti.
23 Anāi ngāi chu thīna le zēm ka ti.
Hava tika kuibing pumpuiin,
koi kēng sūngrīl le malung a enpu ka ni ti hi riat unti.
Hanūk chu na sin thō u anga aman chu na pe chip u ka ti.
24 Nangni le Thuatira khuana a om mi tei ngāi hava anchūna pom lui ngāi,
le soitān chongrīl anthup anthūk riat lui ngāi dōra kōma kei ti ani na.
Na chung u na atei puak arik na manpēl u makung.
25 Atuna nei dōn sua u rong ha ka hong rēt māseng dōntit u ro.’
26 Hatuka chu azui tak le ahek ten peia ka chong ngāi dōra atel tak chu nam tin chunga ningneina pe ka ti.
27 Hatuka Pa kōma ningneina kei dōn anga ama chu bēl abuakpūn bēl ngāi ei makhui chit anga:
‘Amān ruirilna thīr sūnrol
lehan amāni ngāi chunga
ruiril inti,’
(Sām 2:9 )
ati na.