Sardis kuibing kōma chongbe
3
1 Sardis kuibing palāi kōma hiva chong hi maziak ro:
Pathian Ratha sari le ārsi sari adōnpu hān hiva chong ngāi hi ei ril:
“Na sin thō ngāi dōra ka riat zit,
adam nei anti,
tenchu athi kēng na ni.
2 Har tānla amaniang nei la dōn athi rang vit ngāi ha manhar rēt ro.
Asik chu na sin thō ngāi dōra ka Pathian mit muna atunga mu makung.
3 Hasika han chong nei man le nei rangāi ha mandon rēt tānla dōntit ro,
hatuka malung makhīr ro.
Tenchu na malung na manhar nōk ten anru anga na kōma hong ka ting,
hova hun taka mo kei hong rang hava ha nangin lei re nō ta ni.
4 Hanum nisela Sardis kuibinga apuan ngāi mannim lui raming atōmte na dōna.
Amāni chu puan ngui ansila ka kōma lēng unti,
asik chu arua ani u na.
5 Tukareng azui tak chu puan ngui ansila om inti.
Hatuka damna lekhabu nāta araming chu pei pe pial nō ning.
Tenchu ka Pa makunga le avānpalāi ngāi makunga araming puang ka ti.
6 Ratha hān kuibing ngāi kōma chong ei ril hi anngāina kuar adōn takin rangāi rase,”
ati na.
Philadelphia kuibing
kōma chongbe
7 Hatuka Philadelphia kuibing palāi kōma hiva chong hi maziak ro,
“Koi Ānthiang le Chongtak ka ni,
David achabi adōnpu hīn kei ril.
Tutēn ei khār thei nōk suakkhār anlongpu le tutēn ei malong thei nōk suakkhār akhārpūn,”
(Isa. 22:22 )
hiva chong hi kei ril.
8 Na sin thō ngāi dōra ka riat zit,
en ro,
na matona tutēn khār thei lui suakkhār khat ka malong.
Asik chu thōtheina ranak alakte nei dōn um ka na riat,
hanūk chu ka chong nei poma ka raming chu tel luia om mak che.
9 En ro,
soitān anchunna muna mi ngāi,
Jihudi ka ni anti na Jihudi ni lui ngāi,
tenchu milak athei ani u na.
En ro hava ngāi ha na kekunga ahonga na la honga mōk unti.
Hatuka koiin nang hi kei na madit u ti hi la manriat ka ti.
10 Asik chu dūk adiarna ranga chong kei na pēk ha nei rungtit sika ramuala a om ngāi ansinna ranga maniapūr pumpuia ansinna hun ala honga tung rang āta nang um na rungtit ka ti.
11 “En ro,
anrapa ahong len rang ka ni zei Tutēn na rēng lukhum nei man ha ei na pot thei nōkna ranga nei sūr ha rungtit ro.
12 Tukareng azuipu tak kōma ka Pathian biak ina chopui manchang ka ti.
Hava mun āta ama chu suak pial lāi nō ni.
Hatuka ka Pathian raming le ka Pathian khopui Jerusalem thar raming chu ama chunga maziak ka ti.
Hava khopui ha ka Pathian kōm āta anvān len āta ahong chum ani na.
Hanūk chu ka raming athar um achunga maziak ka ti.
13 Ratha hān kuibing ngāi kōma chong ei ril hi anngāina kuar adōn takin rangāi rase,”
ati na.
Laodikei kuibing
kōma chongbe
14 Laodikei kuibing palāi kōma hiva chong hi maziak ro:
“Koi hi Amen,
ariatpui diktak le aiam rua taktak hīn kei ril.
Pathian akut suak ngāi abul hīn hiva chong ngāi hi kei ril:
15 Na sin thō ngāi dōra nei dāi um nōk,
nei lum um nōk ka na riat,
tenchu na dāi nōk ten nei lum rang hi kei na zōt ani na.
16 Asik chu lum um lum lui,
dāi um dāi lui,
nang chu lumadāi nei ni sika ka bāikua nāta kei na male rang ani zei.
17 Anchong ka ni nei anti,
sum puan ka mantīng lup zei,
itē nāng lāi makung,
nei anti.
Tenchu nang hi mi vānduai,
lungkham aruai,
anriang,
mit acho le sāikorong nei ni ti hi anre lāi mak che.
18 Hasika han na kōma hintin hin huang vār kei na sak ani zei,
nei anchong theina ranga ka kōm āta moia ansake sua rāngkachak hong rachōk ro,
hatuka sāikoronga nei om nei anzak anthupna ranga puan nei rasil rang puan angui hong rachōk ro.
Hatuka mit vārna nei man theina ranga na mita khua ranga mit lui hong rachōk ro.
19 Asik chu kei madit ngāi chu kei ngo le siar kei sep chachak ani na.
Hasika han na tep mannēl tān malung makhīr ta ro.
20 Enta,
suakkhār taka kan dinga,
ka tōk,
tukareng ka hē riata suakkhār anlong tak chu akōma lūt ka tinga,
abila nēkpui ka ti,
amām ka bila na nēkpui inti.