Chungvāna rēng chōmphāng
4
1 Hatuka hava suale kan hoia,
enta,
chungvāna suakkhār khat anlonga ka mu na.
Hē kei riat mānsa rasa chu bekūl miring aphuazeka ka kōma achonga.
Ama hān:
“Hiva hin hong kal ro,
hatuka nangkana rui ala hong asuak rang ngāi chu na man mu ka ti,”
ati na.
2 Hatuka anlāiseka Ratha hān ana maruai lena.
Hatuka enta,
chungvāna chōmphānga mi khat ansuta ka mu na.
3 Hatuka hava ansutpu mēl chu jasper le sardion lung aphuazeka anlanga.
Hatuka achōmphāng ravēl chu emerald lung aphuazek sum ansāīn ahīl vinga.
4 Hatuka hava chōmphāng ravēla atei sōm anni manli chōmphāng a om a.
Hava chōmphāng ngāi dōra han pātar sōm anni manli ansut u na.
Hava ngāi ha puan ngui arasil u na aluna rāngkachak rātpāk lukhum akhum u na.
5 Hava chōmphāng āta khuanlek,
machēk le rasa chu ahong asuaka.
Hatuka chōmphāng matona lēm sari achuang ngāi ha Pathian Ratha sari ngāi ha ani u na.
6 Hanūk chu chōmphāng matona han kristal lung avār anga dapōn aphuazek tīndīl khat a om a.
Hatuka chu chōmphāng ravēla amalāi taka han nuk anei manli amaton le anūka mit ābit thak a om a.
7 Hava nuk anei bila angkhatna chu sīng aphuazeka,
annina chu serāt tangte aphuazeka,
anthumna chu miring māisua aphuazeka,
hatuka manli changna chu manmu azuang lāi taka aphuazeka.
8 Hava nuk anei manli ngāi ha mantha aruk seng adōn chip u na.
Hava ngāi ha asīr apanga le asūng aloma mit ābit thak ani na,
sūn le zān mong pial luia hiva chong hi ati u na:
“Ānthiang!
Ānthiang!
Ānthiang!
Puma Pathian aloma thōtheina
adōnpu!
Ama chu a om sua le a om sa
le ala honga om rang kēng!”
ati u na.
9 Hava nuk anei ngāiin chōmphāng chunga ānsutpu ha anlianna,
lalchi thōna le anpākna aman tung u na,
ama chu umor tāituana adam kēng.
10 Amānīn hantin han athō u le hava chōmphāng chunga ānsutpu pātar sōmanni manli ngāiin ake kunga anboka amōk u na.
Amānīn umor tāituana adam chu abiak u na,
rēng lukhum ei man u ngāi ha chōmphāng matona akheka asiak u na.
11 “O Puma Pathian nang
rong kēng anlianna,
Lalchi thōna le thōtheina tin
aman rua.
Asik chu aloma nangin nei sin
zit ei ni sika,
Nang na malung vong anga
amāni ha nei sina hatuka
ānsin ei chang ani u na,”
ati u na.