Lekhabūnzual le Berate
5
1 Hanūk chu hava chōmphāng chunga ānsutpu achang kuta lekhabūnzual khat ka mu na.
Hava lekhabūnzual amaton tiang le anūk tiang anziak zit ani na.
Hava chunga sīlmōr sari anzēm ani na.
2 Ranak anei vānpalāi khat ankhēk ka mu na.
Ama hān:
“Tu mo hiva lekhabūnzuala sīlmōr ngāi akhek le āsūt thei rua?”
ati na.
3 Anvāna mo,
ramuala mo ramual thuaia mo tutēn lekhabūnzual akhek le asūng a en thei om mak.
4 Hava sika achālaka ka chapa,
asik chu tutē hava lekhabu anzual akhek le a en thei rua angkhat ngāl om mak.
5 Pātar ngāi angkhatin:
“Chap nō ro,”
ana ti.
“En ro,
Juda nama sīng,
David akhūka mi,
ama hān azui sua zeia.
Ama rong kēng lekhabūnzual chu anlong le lekhabūnzuala sīlmōr sari ngāi akhek thei rua,”
ati na.
6 Hanūk chu:
“En ro,
Berate ha nuk anei manli ngāi le pātar ngāi bila chōmphāng ngāi alāi taka andinga ka mu.
Berate ha anthat sua ang aphua zeka.
Berate araki sari le amit sari ngāi ha Pathian Ratha sari ngāi ramual pumpuia ei hong tīr ani na.
7 Hankēng Berate ahonga chōmphāng chunga ansutpu achang kut āta lekhabūnzual ha alāka.
8 Amān lekhabūnzual alāk suale,
nuk anei manli le pātar sōm anni manli ngāi ha hava Berate matona anbok u na.
Hava ngāi dōra ha akut u na chōngpereng le marim ahui hālna rāngkachak khēnga marim ahui abit mat abit mata adōn u na.
Hiva ngāi hi Pathian mīnthiang ngāi abōrzong ani zei,”
ati na.
9 Hankēng amāni hān la thar khat athō u na.
“Nang rong kēng lekhabūnzual
alāk thei rua le sīlmōr
ngāi aphong rua.
Nang chu anthat sua na ni na.
Na thisen le chi tin,
Chong tin,
Miring tin le nam tin kār āta
nei na rachōk ani na.
10 Nangin koini na Pathian hasōndom ranga arēnga le achāizūnga nei na sina,
ramuala ruiril inti,”
ati u na.
11 Hankēng kan hoia chōmphāng anhīl vinga vānpalāi rōl ātampa ka riata,
nuk anei adam le pātar ngāi rōl um ka riata,
ei tam u zia chu miring 100,000,000 ātam u na,
hanūk chu 1,000,000 ātam ani u na.
12 Amānīn anring sabaka ankhēk u na:
“Berate anthat sua chu ama
rong kēng thōtheina,
Neinungna,
hianna,
Ranak tin,
lalchina,
Anlianna le anpākna aman
rua na ni,”
ati u na.
13 Pathianin ei sin ngāi dōra aloma anvāna le ramual chunga le ramual thuaia Tipuiliana a om dōra hanūk chu havana a om ngāi dōra a chong ka riata.
Amānīn ati u na:
“Chōmphānga ānsut le Berate
kum khuana abōrsāng le
anlalna,
le anlianna,
Le ningneina chu om rase!”
ati u na.
14 Hatuka nuk anei adam manli ngāiin:
“Amen!”
ati u na.
Pātar sōmanni manli ngāiin tāituana adam ake kunga anboka amōk u na.