Sīlmōr anphongna
6
1 Berate hān sīlmōr ngāi bila angkhatna ei phong ka mu na,
hanūk chu nuk anei manli ngāi bila angkhatin arōl machēk anring rasa anga ahē ka riata:
“Hong ro,
hong en ro,”
ati na ka riata.
2 Hatuka chu enta,
sakor angui angkhat chunga achuang ka mu na akuta sāili khat aleka,
ram ei lāk tira asē ranga akuta rēng lukhum khat anpēka azui tir rang asuaka.
3 Berate hān silmōr annina aphonga,
nuk anei annina hān:
“Hong ro,
hong en ro,”
ati na ka riata.
4 Sakor asen angkhat asuak rēta,
hava sakor chunga ansutpu kōma ramual āta phūkdāina dōra apei ranga ningneina anpēka,
miring ngāi chu amāni le amāni ei anthat u na ranga,
akōma khendāi ālianpa khat anpēka.
5 Berate hān sīlmōr anthumna aphong le nuk anei anthumna hān:
“Hong ro,”
hong en ro,
ati na chong ka riata.
Hatuka kan hoia ka ena ka matona,
sakor ahāng khat ka mu na.
Hava sakor chunga ansutpu akuta akeina phalla khat aleka.
6 Hanūk chu nuk anei manli ngāi kār āta hē ka riata:
“Gōm kilogram khat man chu denari khat ei ni rang hanūk chu bārli kilogram anthum man chu denari khat ei ni rang ani na,
tenchu sariak le zu chu masiat pei nō ro,”
ati na.
7 Berate hān sīlmōr manlina aphong le nuk anei manlina hān:
“Hong ro,
hong en ro,”
ati na achong ka riata.
Hatuka kan hoi le chu ka matona kei mu chu.
8 Enta,
sakor apōl angkhat ka mu na,
hava achunga ansutpu araming ha Āthi,
anti na.
Hanūk chu āthi khua hān anūk azīna.
Ramuala miring mun manlina mun khat ten pei athat ranga ningneina apēka.
Ama hān hava ngāi ha khendāi,
māitām le,
thīna le maniapūra ramsa tin lehan manthat inti.
9 Berate hān sīlmōr rangāna aphong le Pathian chong le achong riatpuina sika anthat ngāi ratha chu māichām thuaia ka mu na.
10 Amāni hān anringa ankhēk u na:
“O Puma,
Ānthiang le Chongtak,
hi maniapūra om mi ngāi chunga rui aril rang le koini ngāi thisen phuba alāk ranga ituk ten ngal mo ei la sōt rang?”
ati u na.
11 Hankēng Pathianin amāni ngāi dōra kōma puan avār alom u na apēk chipa ati na:
Amāni anga asuak changpui u ngāi le aparual u ngāi mīn ei la that u rang ahek māseng chu hun atōmte alei anruang u rang anāng ati pena.
12 Hankēng Berate hān sīlmōr arukna aphong le,
enta,
nīnu anrikpa ahong ani chu samul ahāng le ankhōng samul puan ahāng anga ahānga,
tha chu thisen anga asena ka mu.
13 Ahun nōka theipui kunga theipui mara akung āta thīnthi anrikin ei nīka ei masul anga chungvāna ārsi ngāi maniapūra achula.
14 Lekhabūnzual anga anvān um anzuala mual ansāng dōra le mualanlān dōrām amun āta anthōta.
15 Ramuala rēng ngāi,
le milian ngāi,
le mi anchong ngāi,
sipai ulian ngāi,
le arāt ngāi,
suak le suak nōk dōra khursūnga le muala lungpui ngāi rali songa anthup u na.
16 Amāni hān mual ansāng ngāi le lungpui ngāi kōma:
“Koini na chunga na hong del u ta ro!
Na hong thup u ta ro!
Chōmphāng chunga ānsutpu maton āta le Berate taksitna nāta na thup u ta ro!”
ei la ti u rang ani na.
17 “Asik chu ataksitna tatak nikhua lian chu ahong kēng ani zei.
Tu mo amatona ānding ngam thei rang?”
ati u na.
Israel mi 144,000