Damna tidung
22
1
Hava suale damna ti apēk tidung,
kristal lung anga ānthiang, Pathian le Berate rēng chōmphāng āta ahong aluang ha ana man mu na.
2 Havana lampui malāi taka tidung kōl kiang annini han damna thingkung a om a.
Hava ngāi hān atha tina anrana mara zāt sōmleianni ama suaka.
Hava thingkung bua chu nam tin ngāi ana ei damna u na ani na.
3 Sova muna son khomāk reng om lāi nō ni,
tenchu Pathian le Berate achōmphāng kēng a om rang ani zei,
hatuka asuak ngāiin adorbo adom unti.
4 Amēl mu untia,
araming um amachal u na anziak inti.
5 Hava han zān om lāi nō ni,
amānīn lēm ra-āng le ani ra-āng nāng u lāi nō ni.
Asik chu Puma Pathian lenin ēl unti,
hatuka chu amānīn umor tāituana rui ril unti.
6 Hankēng amān ka kōma:
“Hiva chong hi a iamrua le ādik ani na.
Hanūk chu Deari ānthiang ngāi kōma ratha apēkpu Puma Pathianin atuna rui ahong atung lilīp rang ngāi ha asuak ngāi kōma anmu ranga avānpalāi ei hong tīr,”
ati na.
Isua ahong rang ani zei
7 Isuan:
“En ro,
anrapa ahong len rang ka ni zei!
Hiva lekhabūna maton lama chongrilna ngāi āzī tak chu ravān āsa kēng,”
ati na.
8 Koi,
Johan,
atuna hiva ngāi dōra amu le ahē ariatpu ka ni zei.
Hava ngāi ka mu ka riat le chu anān mupu vānpalāi ake bula anmōk ranga kān khupa.
9 Tenchu amān ana ti na:
“Hivan tin hin thō nō ro,
asik chu koi um nang na bila na suak changpui ka ni,
hanūk chu na parual deari ngāi le hiva lekhabūna chong azī ngāi bila mi kēng ka ni,
Pathian kēng nei amōk rang,”
ati na.
10 Hatuka amān ana ti na:
“Hiva lekhabūna maton lam Pathian chongrilna ngāi hi ip nō ro,
asik chu hiva ngāi ei hong tungna rang hun ahong anāi zei.
11 Tukareng āsia thōpu chu āsia thō banga om inti.
Tukareng annima ompu chu annim banga om inti.
Tukareng ādikpu chu ādik banga om inti,
hanūk
chu tukareng ānthiangpu chu ānthiang banga om inti,”
ati na.
12 Isuan:
“En ro,
ahong len rang ka ni zei!
Mi tin asin thō ang chipa ei lō aman ranga ka rātpāk chu ka bila ka hong chōi.
13 Koi hi Alpha le Omega,
Aphutna le Amongna ka ni.
Hanūk chu Atontīr le Anukhōn ka ni.”
14 Damna thingkunga thei mara asāk theina ranga ningneina le suakkhār āta khopui sūnga ei lūt thei u na ranga ka chongpēk atel ngāi chu aravān āsa kēng.
15 Tenchu khopui apang tiang chu ui ngāi,
dōi chong athei ngāi,
ahur ngāi,
mi that ngāi,
ramīl anmōk ngāi,
milak andit le milak athei ngāi dōra kēng ei om rang.
16 “Koi,
Isua hin kuibinga hiva rui ngāi anriatna ranga na kōm u na ka vānpalāi kei hong tīr ani.
Koi hi David abulpui le akhūka Sikhovār a-ēl ha ka ni,”
ati na.
17 Hava suale Ratha le muinu hān:
“Hong ro,”
ati na.
Ariat dōra ngāiin um,
“Hong u ro,”
ti rase.
Hanūk chu ati anrāl dōra hong rase.
Azōt takin damna ti,
man abui ha hong ne rase!
ati na.
18 Asik chu hiva lekhabūna maton lam chongrilna chong ariat tak kōma kei man riat ani zei.
Tukareng hiva chong ngāi āsap tak chu hiva lekhabūna antakna rikhua ngāi dōra Pathianin um achunga sap inti.
19 Tukareng hiva maton lam chongrilna lekhabūna chong ngāi apei tak chu Pathianin um damna lekhabūna le khopui ānthianga
ei chang rang hiva lekhabūna anziak ngāi āta khāi inti.
20 Hiva rui ngāi dōra āriatpu
hān:
“Ani zei.
Ahong lilīp rang ka ni zei,”
ati na.
“Amen!
Puma Isua,
hong ta ro.”
21 Koini Puma Isua Krista lungkhamna chu na lom u chunga om rase.
Amen.