Kum asāng khat ruirilna
20
1 Hava suale vānpalāi khat anvān āta ahong achuma ka mu.
Akuta khur anthūk dong lui chabi le zīngzir alianpa khat adōna.
2 Hankēng hava dragon,
hava marūlatarmīn diabol le soitān ei ti ha asūrtita,
kum asāng khat ranga akhita.
3 Hankēng kum asāng khat akip māseng chu nam tin ei huang thei lāi nōkna ranga khur anthūk dong lui khur sūnga avapeia,
akal rapa achunga sīlmōr azēma.
Tenchu hava suale hun atōmte ranga ama chu anzōk tota la om inti.
4 Hava suale rēng chōmphāng ngāi chu ka mu na,
hava achunga ānsut ngāi kōma ruiriltheina ningneina anpēka.
Hatuka chu Pathian chong le Isua ariatpui sika alu āntan ngāi ratha ha ka mu na.
Hava ngāi ha sarāng le aramīl amōk lui ngāi,
amachala mo akuta mo sarāng andangna dōn lui ani u na.
Hava ngāi ha ahong adam u na,
Krista bila kum asāng khat rui aril u na.
5 Tenchu āthi atei ngāi ha kum asāng khat akip māseng chu hong dam u mak.
Hava ha anthuirētna mānsa ani na.
6 Hiva anthuirētna mānsa āchang ngāi chu bōrsāng atung le ānthiang kēng,
amāni ngāi chunga āthi annina hān ningneina dōn lāi mak.
Tenchu Pathian le Krista chāizūng chang unti,
ama bila kum asāng khat amānīn ruiril unti.
Soitān adingmun ei chulna
7 Hatuka chu kum asāng khat akip suale soitān chu ei ankhumna lung in āta zōk inti.
8 Hatuka ama chu ramual kil manlina nam tin a om ngāi Gog le Magog ahuang ranga suak intia,
hatuka anduina ranga amāni ngāi ha manbūm inti.
Hava ngāi ei tam zia u chu tipuiliana bāli ramal,
atel sua lui zāt ang ani u na.
9 Hatuka maniapūr pumpuia asuaka asē u na,
Pathian mīnthiang ngāi omna riabūk le khopui madit chu ahīl ving u na.
Tenchu Pathian āta anvān moi ahong masula hava ngāi ha ahāl zita apeia.
10 Hatuka amāni ahuangpu diabol chu sarāng le deari rothol ngāi ei anpeina moi le gondok kāngna dīla ama sula.
Hava han sūn le zāna,
umor tāituana ansinsakna atiara om unti.
Rēng chōmphāng
avāra ānsutpu ruirilna
11 Hava suale rēng chōmphāng avār alianpa le achunga achuangpu ha ka mu na.
Amaton āta ramual le anvān chu arota asēna,
amāni ei omna rang mun ompe lāi mak.
12 Hatuka āthi ngāi,
āsīn le ālian,
Pathian matona andinga ka mu.
Hanūk chu lekhabu ngāi anphonga,
hanūk chu lekhabu atei rēt,
Damna Lekhabu hām anphonga.
Hatuka āthi ngāi asin thō u hava lekhabūna anziak anga achung u na rui anrila.
13 Hatuka tipuilian sūnga āthi a om ngāi dōra chu ama suaka.
Hanūk chu thīna le āthikhua hām asūnga āthi a om ngāi dōra ama suaka.
Mī tin asin thō anga achunga rui anrila.
14 Hatuka thīna le āthikhua chu moi dīla amasula.
Hiva moi dīl ha ani zei thīna annina.
15 Tukareng Damna lekhabūna araming chuang lui chu hava moi tīndīla han amasula.