19
1 Hava suale anvāna mipui ātam sabak rasa ang hē ānringpa anga ka riata:
“Haleluia!
Sandamna,
anlianna,
anlalna,
thōtheina dōra Puma koini na
Pathian kōma kēng ei om
zit.
2 Asik chu ama aruirilna ngāi
hi atak le ādik ani na.
Amān nōtizuar anthangnu,
Ei hurna lehan ramual
ānnimnu chunga rui aril zei,
Pathianin ama chunga asuak
ngāi thisen ei suakna phuba
chu ama chunga ahong lāk
zei,”
ati na ka riata.
3 Hankēng chu ankhēk rēt u
na:
“Haleluia!
Ama ei kāngna moikhu chu
tāituan tāituana chunga kal
chian inti.”
4 Hatuka chu sōm anni manli pātar ngāi le nuk anei adam manli ngāiin anboka rēng chōmphānga ānsutpu Pathian kōma:
“Amen!
Haleluia!”
ati na
amōk u na.
5 Hankēng rēng chōmphāng āta
hē ahong asuaka:
“Ama asuak ngāi dōra le
ama ānchi ngāi dōra,
Mi lian le mi sīn ngāi dōra,
Koini na Pathian chu manpāk
u ro!”
ati na.
6 Hava suale mipui ātam sabak rasa ang,
le ti antōm rasa ang,
le khuanri rasa anring sabak ka riata:
“Haleluia!
Koini na Puma Pathian,
Aloma athōtheipūn rui ei ril
kēng ani zei.
7 Hong u ro,
rāi lei mansān
u rei,
Ama man pāk u rei.
Asik chu Berate inneina rang
hun ahong asuak zei,
Amuinu rang um anliang
vang sua zei.
8 Puan annāl alu zāt,
Puan anthiang le puan avār
chu amuinu ei mansil
ranga apēk zei,”
ati na.
Asik chu hava puan annāl alu zāt,
Puan anthiang le puan avār ha
mīnthiang ngāi dikna ei
manlangna ani na.
9 Hava suale vānpalāiin ka kōma:
“Hiva hi maziak ro:
“Berate inneina ranga bunēk ānkui ngāi chu ravān āsa kēng,”
ana ti na.
Hatuka ama dēnin ati rēta:
“Hiva ngāi hi Pathian chongtak chong ngāi chu ani,”
ati na.
10 Hatuka ama ānmōk ranga ake kunga kan boka,
tenchu amān ana ti na:
“Havan tin han thō nō ro ba!
Koi um nang na anga,
na parual ngāi anga Isua achong ariatpui ngāi bila suak angkhat dēn ka ni na.
Pathian kēng nei mōk rang hale.
Asik chu Isua chong ariatpuina hi kēng deari anga chong ril theina ratha,”
ati na.
Sakor ngui chunga achuangpu
11 Hatuka anvān anlonga ka mu na,
hava han sakor ngui khat le achunga achuang Aiamrua le Ādiktak anti ha ka mu sa na.
Amān chongtaka rui arila adika rāl ei dui ani na.
12 Amit ngāi chu moi anga achuang ani na,
alu na rēng lukhum ātampa akhuma.
Alu chunga raming anziak khat adōna,
hava raming ha ama rong nōk ten tutēn ariat thei om mak.
13 Amān thisena ānchia kultāi anchual arasila,
ama araming chu,
“Pathian Chong,”
anti ani na.
14 Hanūk chu chungvāna sipai ngāiin puan annāl alu zāt,
puan anthiang le puan avār ansila sakor ngui chunga achuanga anūk azī u na.
15 Amān nam tin dōra ei tuk theina ranga amūr āta khendāi angei khat ama suaka.
Asik chu:
“Amān achung u na ruirilna
thīr sunrol lehan achung u
na rui ril inti,”
(Sām 2:9 )
ati na.
Alom pei athōtheipu Pathian taksitna anchirua hīn gerep anchīlna khura han achīl inti.
16 Hatuka apuan anchuala le aketora hiva raming hi anziaka:
“Rēng ngāi Rēng,
puma ngāi Puma,”
ti ani na.
17 Hava suale vānpalāi khat ani taka andinga ka mu na,
amān anring sabaka ankhēka chungvāna vā azuang ngāi dōra kōma:
“Hong u ta ro,
Pathian alian taka bunēkna pānta hin hong anchun u ro.
18 Nangnīn rēng ngāi me,
sipai ulian ngāi me,
rāl rāt ngāi me,
sakor ngāi me le achunga achuang ngāi me,
suak le suak nōk ngāi me,
alian le asīn ngāi me,
miring dōra me hong sa u ro,”
ati na.
19 Hava suale sakor chunga achuangpu le asipai ngāi anduipui ranga sarāng le ramuala rēng ngāi le asipai ngāi anchun ka mu na.
20 Hankēng ha sarāng chu ansūra,
abila arathūla sinsiana tichang abui sin athō chachak,
deari rothol hām ansūra.
Amān sarāng tianga mi andangna adōn ngāi le aramīl ānmōk ngāi chunga hava sinsiana lehan ei huang chachak ani na.
Hava anni ngāi ha aring chung lena gondok kāngna moi khura avapeia.
21 Hatuka atei ngāi dōra chu sakor chunga achuangpu mūr āta asuak khendāi lehan athat zita,
chunga vā ngāiin ame asāka akhop u zei.