Babulon khopui
anthang achiam zei
18
1 Hiva ngāi suale vānpalāi atei anvān āta honga chuma ka mu.
Ama hān ningneina lian sabak adōna,
ama ei anlianna lehan ramual pumpui a ēla.
2 Amān hē anringpana ankhēka:
“Babulon khopui anthang,
Achiam zei!
Achiam zei!
Ratha sia adōn raluai ngāi
omna mun le ratha ānnim
ngāi ankhumna in,
Ānnim tin le antīrrua om
vā tin vā rēng ngāi dōra
ankhumna bēngkhep kēng
ei chang ani zei.
3 Amān nam tin ngāi chu
Pathian taksitna ranga
zuran anga anrāt ei hurna
zu lehan ei manri,
Ramuala rēng ngāi ama lehan
uiare u na,
Anri le anhāia rahāi ei
ansakna lehan ramuala
sum puan anlō ngāi,
Ama zāra anei anung
ei pha u ani na”.
4 Hava suale anvān āta rōl atei
rēt ka riata:
“Ka mi ngāi,
hava nupangnu
kōm āta hong suak u ro.
Āsia ei thō ngāi nei ansēmpui
u ranga ni mak,
Arikhua ngāi um nei anka u
rang ni mak.
5 Asik chu āsia ei thō ngāi chu
anvān aphā kēng ani zei,
Pathianin adik nōk ei thō chu
ariattit pena.
6 Nangni ei na pēk u anga
ama chungām pe u ro,
Asin thōna lehan mun anni
zotora ratha thuan u ro,
Amān zu ei na man nēk u na
khuri dēn lehan mun anni
zotora ratha thuan u ro.
7 Aninga anlian sabaka om
le ahui ahēka rahāi ei
ansakna ang dēna,
Ansinsakna le lunghāngna
pe u ro.
Asik chu amalung rila:
‘Rēngnu anga ānsut ka ni,
Arōng ni makunga.
Lunghāng antakna reng
tiar nō ning,’
ati na.
8 Hasika han,
nikhat sūnga
aloma rikhua dōra,
Thīna,
lunghāngna,
māitām
ahonga achunga hong
chul zit inti.
Ama chu moiin hāla kāng inti.
Asik chu ama chunga rui
arilpu Puma Pathian chu
arāt ani,”
ati na.
9 Hankēng ramuala rēng ngāi,
ama lehan uiare ngāi,
abila ahui ahēka rahāi ansak ngāi ha,
ama ei kāngna moikhu amu u le amalung anhānga chap unti.
10 Adūk tong ei na zia amu u na āchīna varāla anding u na:
“O duai!
O duai!
O khopui anthang!
O Babulon khopui ārāt,
Dār khat bak hun sūnga na
chunga ruirilna ei hong
suak hi lungna om ba!”
ati u na.
11 Ramuala sum puana anlō ngāi um ama sika amalung anhānga chap unti,
asik chu tutēn aneinun zuar u ngāi anchōk rang om lāi nō ni.
12 Hava aneinun zuar u ngāi bila chu rāngkachak,
sumru,
lung aman ātam zāt,
lungluvār,
puan annāl alu zāt,
puan senaduk,
malungrāng puan,
puan senarāl,
thing marim ahui zāt tin,
sāiha le ansin neinun tin,
thing alu zāt,
dār le thīr hanūk chu sāilungvāra ansin neinun tin ani na.
13 Thing thumte le anmarim hui,
bero,
marim ahui sariak,
zu le oliv sariak,
moida le gōm,
rannung le bera ngāi,
sakor le rōt,
miring suak le ratha ngāi ani na.
14 Hatuka sum puan azuar ngāiin akōma:
“Na malunga na ningōl mara anpei sua zei.
Nei anchongna ngāi dōra le nei lian nei huina ngāi dōra anpei sua zei,
hava pang mu lāi nō ta ni.”
15 Ama zāra anchonga,
sum puan azuar ngāi adūk tiar rang ei na zia amu u na āchīna,
varāla andinga,
chapa amalung manhāng unti.
16 Hatuka ankhēka:
“O khopui anthangnu,
Puan annāl alu zāt le puan
senaduk le puan senarāl
ānsil,
Rāngkachak le lunglu man
ātam zāt,
Lungluvār lehan ānliangnu!
Na vān aduai ba!
Na vān aduai ba!
17 Dār khat bak hun sūnga hadōra nei anchongna ngāi ei siat zit thei hi!”
ati u na.
Hatuka chu rakuangpui apuma ngāi dōra,
rakuangpuia āchuang ngāi dōra,
rakuang aveipu ngāi le rakuangpuia ānlō ngāi dōra varāla anding u na.
18 Hatuka ei kāngna moikhu amu u na ankhēka:
“Hiva khopui anthangnu anga khopui anthang atei ala om mo?”
ati u na.
19 Alu chung u na philvut ātheka,
lunghāng chunga achapa:
“O khopui anthangnu!
Nei ānchongna zāra tipuiliana
rakuang adōn ngāi,
Ānchongna alei phā sua u zei.
Dār khat bak hun sūnga aloma
nei anpei zit thei hi!
Na vān aduai ba!
Na vān aduai ba!”
ati na ankhēk u na.
20 “O nang anvān,
ama
chunga na rāi mansān ro,
Kuitīr ānthiang ngāi le
deari ngāi,
na rāi mansān
u ro.
Asik chu na chung u na ei na
thō anga Pathianin achunga
rui ei ril pe thei zia hi!”
ati na.
21 Hava suale vānpalāi arāt khatin bu anrōtna lung alianpa khat anga thīr anpum khat alāka tipuiliana ana sabaka adēngraka:
“Babulon khopui anthangnu chu
hadōr pei ana sabaka anpei
rang kēng ani zei,
Tutēn nang ana mu om
lāi nō ni.
22 Na kōm āta chōngpereng
maring le la thō ngāi rahu,
Theilia rasa le bekūl maring
rasa anriat lāi nō ni.
Tutē sin athō anrok ranga sin
athō mi reng na kōma hong
lāi nō ni.
Na kōm āta bu ansukna rasām
anriat lāi nō ni.
23 Hanūk chu na kōm āta lēm
um ēl lāi nō ni.
Na kōm āta muisa le māksa hē
anthang lāi nō ni.
Asik chu na sum le na puan
azuar ngāi ramuala anthang
ani u na,
Mitpial dōi nei theina lehan
nam tin nei huanga nei siak
ani na.
24 Ama kōma han deari ngāi,
Pathian mīnthiang ngāi le
ramual pumpuia iamna
sika āthi ngāi thisen aluang
chu hiva khopui sūnga
kēng ei om zit,”
ati na.
Haleluia!