Sarāng chunga nōtizuar
17
1 Vānpalāi sari ngāi bila angkhat khēng sari ādōnpu ahonga,
ka kōm ana rila:
“Ka kōma hong ro,
ti tampa chunga ansut nōtizuar raming anthangnu arui ei anrilna rang chu na man mu ka ti,”
ana ti na.
2 Ramuala rēng ngāiin ama lehan uiarena,
hanūk chu ramuala miring a om ngāi dōra zuran anga ānrāt ama ei hurna zu lehan ei manri ani na.
3 Hatuka vānpalāi hān Ratha amanga philchār rama ana sē puia,
hava han sarāng sen angkhat alu sari le araki sōm ādōn chunga ansut Pathian raming ril siatna tin le ābit nupang khat ka mu.
4 Hava nupang ha senaduk le senalār puan le anliang,
atak chunga rāngkachak,
lunglu man ātam zāt,
le lunlugvār lehan anliang ani na.
Akuta han antīrrua manim tin le hurna annim tin le ābit rāngkachak khēng khat āleka.
5 Amachala han hiva ariatna rang raming anziaka:
“CHONG ANTHUP
BABULON KHOPUI ANTHANGNU,
NŌTIZUAR NGĀI NU LE
RAMUALA ANTĪRRUA MANIM NGĀI DŌRA NU,”
ti ani na.
6 Hava nupang ha Pathian mīnthiang ngāi thisen,
le Isua āriatpui sika āthī ngāi thisena ānri ka mu na.
Ama chu kei mu le atichang abui thaka ka boi adonga.
7 Hatuka chu vānpalāiin:
“Ichang mo achān na boi ei dong?
Hava nupang le ei chuangna sarāng,
alu sari le araki sōm ādōn,
chong anthup omzia chu na ril ka ting.
8 Sarāng nei mu,
alei omsua,
atuna abui,
tenchu khur anthūk dong lui āta ala hong asuak rang ha anpeina muna ei la sē rang ani na.
Maniapūr anpiang len āta damna lekhabūna araming anziak lui ramuala a om mi ngāi chu sarāng alei omsua,
atuna abui,
tenchu ala hong asuak rang amu u le aboidong unti,”
ati na.
9 Hiva taka hin malung vārna ādōn anānga.
Hava lu sari ha nupang ei ansutna mual sari ha ani na.
10 Hava ngāi ha rēng sari ngāi kēng ani u na.
Rangā ngāi chu achul u zeia,
atun angkhat ala oma,
atei angkhat chu atun tena la hong anlang mak.
Ahong anlang tika chu hun atōmte ranga om inti.
11 Hava sarāng alei omsua le atuna abui hi sari ngāi bila mi ariat changna rēng ani na,
ama hām anpeina muna ei la sē rang ani na.
12 Nangin raki sōm nei mu ngāi ha rēng sōm ngāi atun tena ram la man u lui ngāi ani u na.
Tenchu amāni ha sarāng ngāi bila dār khat chu rēng anga ningneina akōm u na anpēka la om unti.
13 Amāni hān derdīn khat ei dōn u sika,
asin thōthei u na le aningneina u na ngāi sarāng kōma pe unti.
14 Amāni hān Berate le anduina thō untia,
tenchu Berate chu puma ngāi Puma,
rēng ngāi Rēng ei ni sika rāt intia.
Hatuka ama bila han ei pāi ngāi,
ei athang ngāi,
le aiamrua taka ama nūk azī ngāi om unti.
15 Hankēng vānpalāi hān ka kōma ana ti na:
Hava nōtizuarnu ei ansut ti nei mu ngāi ha,
nam tin,
mipui tin,
zāt tin,
le chong tin ngāi ani na.
16 Sarāng chunga raki sōm nei mu ngāi hān hava nōtizuar ha achālaka mumāk unti.
Ama ei nei ngāi dōra apot untia,
itē dōn lui anga māk rak unti.
ataksa ngal hām sāk untia,
moia hāl unti.
17 Pathian chong le aderdīn akip māseng rēng sōm ngāiin aningnei u na sarāng kōma apēk ranga Pathianin akōm u na malung anrualna pēk inti.
18 Hava nupang nei mu ha khopui alian,
ramuala rēng ngāi chunga ningneina adōnnu ani na.