Pathian taksitna
khēng sari ngāi
16
1 Hatuka chu biak in āta hē anringpa khat ankhēka vānpalāi sari ngāi kōma:
“Sē u tānla,
Pathian taksitna khēng sari ngāi ha ramuala vabun u ro,”
ati na ka riata.
2 Vānpalāi angkhatna hān asēna,
phil chunga akhēng avabuna,
sarāng andangna ādōn ngāi le aramīl ānmok ngāi chunga ana sabak pān aring atong u na.
3 Vānpalāi annina hān tipuilian chunga akhēng avabuna,
hava na ti apumpui ha mi āthi sua thisen anga a om a,
tipuiliana nuk anei adam dōra athi zita.
4 Hanūk chu vānpalāi anthumna hān tidung le tinār ngāi chunga akhēng avabuna,
thisen achanga.
5 Hanūk chu ti chunga ningneina adōn vānpalāi hān:
“O Mi Ānthiangtak,
a omsua
le a omsa le ala om rang!
Nang chu ādik nei ni anga
na ruirilna ngāi hīm antūn ani na.
6 Asik chu amānīn mīnthiang
ngāi le deari ngāi thisen
ei masuak u sika,
Nangin hiva ngāi hi thisen
abuang ranga nei pēka,
Asik chu ei man u ranga ha ei
lō u kēng,”
ei ti ha ka riata.
7 Hanūk chu māichām āta hē
tei ka riat rēta:
“O aloma Athōthei Puma
Pathian!
Na ruirilna ngāi hin nang chu
atak le ādik ani,”
ati na.
8 Hankēng vānpalāi manlina hān ani chunga akhēng avabuna,
hatuka anisa hān miring ngāi chunga alumin ei hāl theina ranga ningneina anpēka.
9 Hatuka chu alum sabakin ei hāl sika miring ngāi akāng u na,
hava antakna ngāi chunga ningneina adōnpu Pathian raming chu aril siat u na,
hanum nisela,
amalung ankhīr rang ti u mak,
ama anpāk rang ti u mak.
10 Vānpalāi rangāna hān,
hava sarāng chōmphāng chunga akhēng avabuna,
hankēng hava sarāng aram chu azīng khappe na.
Hatuka ana rahei sika miring ngāi amalei u chu achip u na.
11 atak chung u na āna le apān sika vān Pathian raming aril siat u na,
hanum nisela asinthō āsa nōk āta amalung makhīr u mak.
12 Hankēng vānpalāi arukna hān Euphrates tidung alian chunga akhēng avabuna,
Sualam tianga rēng ahong rang ngāi ranga lampui aleia sin ranga tidung chu aloma akang zita.
13 Hankēng chu dragon bāi āta,
sarāng bāi āta,
le deari rathōl ngāi bāi āta ratha annim anthum uichok aphuazek ahong asuak ka mu na.
14 Asik chu hava ngāi ha tichang abui sinsiana sin āthō raluai ngāi ratha ani na.
Aloma athōtheipu Pathian nikhua lian tika anduina ranga ramual pumpuia rēng ngāi chu akōma abūm ranga asuaka asē u na.
15 “Enta,
anru anga kēng kei hong rang.
Tukareng alei meng chiana apuan le alei anthuam chu bōrsāng atung kēng,
asik chu sāikoronga om a mualphui ansak nō ni.”
16 Hatuka chu amānīn rēng ngāi chu,
Hebrai chonga Armagedon ei ti u na muna amanbūm u na.
17 Vānpalāi sarina hān thīnthi kāra akhēng avabuna,
biak ina vānrēng chōmphāng āta:
“Anzui zei,”
ati na hē ānringpa ahong asuaka ka riat.
18 Hava suale rahupui,
khuanlek ra-āng,
machēk le nīnu anrikpa ahonga.
Hava nīnu ānrik ha ramuala mīring a om len āta hadōr ānrik nīnu la om ngāi lui nīnu ānrik ahonga.
19 Hava khopui alian ha mun anthuma anphela,
nam tina khopui ngāi achiama.
Pathianin ama ataksitna anchi rua zu khuri annēk ranga khopui anthang Babulon chu ariattita.
20 Hatuka chu mualanlān ngāi dōra arot zita,
mualansāng ngāi dōram anpei vanga.
21 Hankēng anvān āta arial alianpa ngāi,
kilogram sōm anthum rangā seng arik arial chu miring ngāi chunga achula.
Hava arialin ei dēngna ha achālaka ana sabak ei ni sika han Pathian raming chu aril siat u na.