Vānpalāi sari
ngāi le rikhua sari
15
1 Hava suale han anvāna tichang abui sinsiana atei aliantak ka mu na,
vānpalāi sari ngāiin rikhua sari achōi u na,
hava ha rikhua nukhōntak,
Pathian taksitna ei hong kipna ani na.
2 Hava suale dapōn le moi anpol aphuazeka,
tipuilian khat ka mu na,
hanūk chu hava sarāng le aramīl le hanūk chu ei andangna araming chunga nambar āzui ngāi um ka mu na,
akōm u na Pathianin ei pēk chōngpereng anleka hava tipuiliana anding u na.
3 Amāni hān Pathian suak Mosi la le Berate la athō u na:
“Aloma athōthei Puma
Pathian.
Na sin thō ngāi hi tichang
abuia ālian.
O nang nam tin ngāi Rēng,
Nang na lampui ngāi chu
āntūn le ādik kēng.
4 O Puma tu mo nang na
chi luia a om rang?
Tu mo na raming anpāka
anlian nōk rang?
Asik chu nang rong kēng
ānthiang,
Nam tin dōra na kōma la
hong untia,
Na la hong amōk unti,
Na sinthō antūn ngāi mi tin kōm anlanga ei om sika,”
ati u na.
5 Hava suale kan hoia ka ena,
vānrama biak in sūnga om ariatpuina puan in ānthiang chu anlonga ka mu na.
6 Hava biak in āta rikhua sari adōn vānpalāi sari ngāi ha ahong asuak u na,
amāni hān puan angui anthianga avār sabak arasil u na,
rāngkachak kōngkhitna le arōp akhit u na.
7 Hatuka nuk anei adam manli ngāi bila angkhatin hava vānpalāi sari ngāi kumkhuana ādam Pathian taksitna ābit rāngkachak khēng sari apēka.
8 Pathian ei anlianna le asinthōtheina nāta moi khu asuak hān biak in amansipa.
Han tin han vānpalāi sari ngāiin rikhua sari ei chōi u ahek māseng hava Pathian biak ina tutē ālūt thei om mak.