13
1 Hatuka koi chu tipuilian makap kōla kān dinga.
Tipuiliana om sarāng khat
Hankēng hava tipuilian āta sarāng khat,
alu sari le araki sōm ādōn,
hanūk chu araki ngāi chunga rēng lukhum sōm le alu ngāi chunga Pathian siat arilpu ti raming ānziak asuaka ka mu na.
2 Hanūk chu hava sarāng kei mu ha koiārsi aphuazek,
ake ngāi ha avom ke aphuazek,
hanūk chu abāi ha sīng bāikua aphuazek ani na.
Hava dragon hān asin thōtheina,
arēng chōmphāng le aningneina dōra sarāng kōma apēk zita.
3 Hankēng alu ngāi bila angkhat ha thīna rang zotor peia apop ka mu na,
hava thīna rang zotor peia apop ha adama ka mu na,
maniapūr pumpui aboi adonga hava sarāng anūk chu azī u na.
4 Hava sarāng chunga thōtheina āpēkpu dragon ha āmōk u na:
“Sarāng anga tu mo a om?
Tu mo ama anduipui ngam rang?”
a ti na sarāng chu amōk u na.
5 Hatuka sarāng kōma chongpāk ansal chong rilna le Pathian siat arilna anpēka,
hanūk chu achunga tha sōm manli anni ningneina adōn ranga anpēka.
6 Hankēng chu Pathian ril siatna le araming siat aril,
le ei omna mun le hanūk chu vānrama a om ngāi dōra chunga siat arila.
7 Ama chu Pathian mīnthiang ngāi anduipuina rang le azui ranga ningneina anpēka,
hanūk chu chi tin,
chong tin le nam tin chunga ning anei ranga anpēka.
8 Maniapūr anpiang lāi āta ānthat Berate damna lekhabūna araming anziak rong nōk chu,
ramuala a om ngāi dōrān ama chu abiaka amōk unti.
9 Tukareng kuar adōn takin,
Rangāi rase.
10 Tukareng selkeia aruai
ngāi chu selkei dēna anruai
unti.
Tukareng khendāi lehan athat
ngāi chu khendāi lehan dēn
hi unti.
Hiva hi Pathian mīnthiang ngāi dūk diarna le iamna chu ani na.
Ramual āta sarāng khat rēt
11 Hiva suale phil āta sarāng angkhat rēt ahong asuaka ka mu na,
Berate anga raki anni adōna,
tenchu ama ha dragon anga achonga.
12 Hiva sarāng hīn sarāng mānsa rathūla aning neina ngāi dōra amanga,
hanūk chu ramuala le asūnga a om ngāi dōra ha sarāng mānsa,
thīna rang zotor peia alu apopa adam hān aman mōka.
13 Ama hān miring mit mu na anvān āta phil chunga moi ansul theina rang khop pei sinsiana lianpa ngāi athō na.
14 Hava sarāng mānsa mit mu na han sinsiana khat ningneina apēka,
hatuka hava lehan,
ramuala a om miring ngāi ei lēma lampui nōk tianga aruaia.
Ama chu khendāi lehan apopa,
hatuka ādam rētpu anmōk rang aramīl ha abuak ranga chong aril.
15 Hanūk chu amān hava ramīl ha phūksān theina ranga ningneina apēka.
Hava ramīl ha ahonga chong theia ramīl anmōk nōk dōra chu athat ranga chong apēka.
16 Hanūk chu āsīn le ālian,
ānchong le ānriang,
suak le suak nōk,
alom u na achang kuttiang mo ole amachala mo andangna khat amakhop pe na.
17 Asik chu hava sarāng raming mo ani ole,
araming telna nambar mo ani adōn nōk tak chu itē rachōk thei nō ni,
zuar um thei nō ni.
18 Hiva taka hin hianna anānga.
Hianna anei takin hava sarāng nambar omzia ha riat rase,
asik chu hiva hi miring khat nambar ani na,
hava nambar ha ani zei razāruk sōm aruk aruk.
Berate le mi 144,000