Nupang khat le dragon
12
1 Hava suale anvāna sinsiana alianpa khat anlanga,
nupang khat araliang chu ani anga,
ake thuaia tha,
hanūk chu alu chunga ārsi sōmleianni ākop lukhum ākhuna.
2 Ama ha anrāi ani na,
nāiha puanga nāi anei rang anga ankhēka.
3 Anvāna sinsiana angkhat anlang rēta:
En ro,
moi asen anga dragon sen alianpa khat,
alu sari le araki sōm,
hanūk chu alu chunga hān angkhat senga rēng lukhum sari akhuma anlanga.
4 Aramoi lehan anvāna ārsi mun anthuma mun khat anuka ramuala amasula.
Hava nāi ei nei sua phing le amān alei avol theina ranga nupang matona alei anding chiana.
5 Hava nupang hān nāi pasal khat ama zira,
amān nam tin chunga thīr sūnrol lehan ruiril inti.
Pathianin hava nāite ha a Pathian le achōmphāng kōma alāk viaka.
6 Hankēng hava nupang ha philchār rama avarota,
hava han Pathianin ei sin pe,
hava han avaom a ni asāng khat razānni sōm aruk pei ankiavānga a oma.
7 Vānrama anduina a om a,
hava han Mikael le apalāi ngāiin hava dragon anduipui u na,
hatuka dragon le apalāi ngāiin amāni anduipui u na.
8 Tenchu soitān le alōm ngāi rāt thei u mak,
vānrama amāni ranga mun um om lāi mak.
9 Pathianin hava dragon le apalāi ngāi ramuala ahong masula.
Hiva marūl marua hi mīn diabola,
mo soitān mo ei ti u,
ama hi maniapūr pumpui lampui nōk tianga aruai ani na.
Ama chu vānram āta maniapūra apalāi ngāi le ile ahong achula.
10 Hava suale anvāna rahupui khat ka riata:
“Atun āta chu Sandamna,
Thōtheina hanūk chu koini na
Pathian lalna ram le ama a
Krista ningneina ahong
atung zei,
Asik chu koini na parual ngāi
āsiat anlōpu ha vānram
āta amasul zei,
Koini na Pathian makunga
asūn azāna amāni siat
anlōna ei manlang chian
ani na.
11 Amānīn Berate thisen le
achong ei riatpuina lehan
ama chu aman dōk u na,
Āthi ten pei angama ei dam u
na ngal madit thak u mak.
12 Hasik han nangni,
anvān le
asūnga a om ngāi dōra
na rāi mansān u ro.
Tenchu ramuala om ngāi le
tipuiliana a om mi ngāi na
rang u chu antakna kēng
a om.
Asik chu diabola chu na
chung u na ahong achum
kēng ani zei.
Diabola chu achān atak asi
sabak zei,
Asik chu arang hun atōm pe
zei ti ariata.”
13 Hava dragon hān ramuala ei chul anriata,
hava nāi pasal anzir nupang ha asinsaka.
14 Hankēng hava nupang kōma han manmu alianpa amantha anni anpēk ani na,
philchār ram āta amun ansin pe ten pei ei zuang thei na ranga.
Hava han marūlin ei vamu thei nōkna ranga philchār rama hun khat,
hun anthum le atan ten ankiavānga ei vaom ani na.
15 Hava nupang ha tilianin ei lāka ei tān theina ranga hava marūlin abāi āta tilian anga ti aphūna amasuaka.
16 Tenchu ramualin hava nupang āsan ranga philin um abāi alei malonga,
marūlin abāi āta ei masuak tilian ha alei avola.
17 Hankēng hava dragon ha nupang tak chunga atak asi sabaka,
hanūk chu hava nupang achi ateteia om ngāi dōra chunga,
Pathian chongpek azī ngāi le Isua Krista chong ariatpui ngāi chunga marūlin anduina amasuaka.