9
1 Vānpalāi rangāna hān abekūl atuma.
Ārsi khat anvān āta ramuala achul sua ka mu.
Pathianin ama kōma khur
anthūk dong lui chabi apēka.
2 Vānpalāiin khur anthūk dong lui ha amalonga moisūmpuia moikhu anga moikhu asuak sabaka.
Hava khur anthūk dong lui khur sūng āta moikhu asuak hān ani le anvān amanzīng khapa.
3 Moikhu bil āta ramuala khāi asuaka.
Hava ngāi ha Pathianin ramuala āinuvet ngāi anga thōtheina ranak apēka.
4 Hatuka ramuala phila chiak le sūl aring,
hanūk chu thingkung ngāi dōra ansiat nōk ranga ati na,
tenchu amachala Pathian sīlmōr anzēm lui ngāi rong masiat rase ati na.
5 Miring āthat ranga chu phal mak,
tenchu tha rangā zotor ānān ngēn unti,
hava ānān ei ngēn ha āinuvetin miring ei peta ei ngēn anga nīnti.
6 Hava nikhua asuak tik chu miringin athī na arok unti,
tenchu thi thei u nō ni.
Āthī rang azōt u nām nisela thīna chu amaton u nāta ankhāi inti.
7 Hava khāi ngāi ha anduina ranga sakor mīn ei manliang aphuazek u na,
alu u na rāngkachak ang aphua rēng lukhum,
hanūk chu amāisua u chu miring māisua ang aphua ani u na.
8 Asam u chu nupang ngāi sam ang,
ahā u chu sīng hā ang ani na.
9 Thīr phochēng aphuazeka phochēng adōn u na.
Amantha u rasa chu sakor ātampān ei nuk anduinana rōt atān rasa ang ani na.
10 Amāni hān āinuvet anga ramoi adōna tūr adōn ani u na,
hankēng tha rangā zotor miring ngāi chunga antakna apēk ranga ningneina aman u na.
11 Hava khur anthūk dong luia vānpalāi ha amāni arēng u ani na.
Ama araming ani zei,
Hebrai chonga Abadon,
hanūk chu Grik chonga Apolion ani na.
12 Antakna angkhat ahek zeia,
en ro hiva suale hanūk antakna anni ala om a.
13 Vānpalāi arukna hān abekūl atuma.
Pathian matona rāngkachak māichām araki manli nāta rōl khat ka riata.
14 Hava rōl hān bekūl ādōn vānpalāi aruk changna kōma:
Euphrates tidungpuia vānpalāi manli ngāi Pathianin ei khit ngāi ha sūt ro,
ati na.
15 Pathianin hiva vānpalāi ngāi hi ahun,
anikhua,
atha le akum taka miring ngāi mun anthuma mun khat āthat ranga ei siak ngāi ha amazōka.
16 Hanūk chu sakor chunga āchuang sipai ngāi rual ei tam zia chu 200,000,000 ani u ti ka riata.
17 Hintin hin anrālna ka mu na,
sakor chunga achuang ngāi aphochēng u ha moi anga asen,
hanūk chu adum le gondok anga aeng ani na.
Sakor ngāi lu chu sīng lu ang,
amūr u nāta moi le moikhu hanūk chu gondok asuaka.
18 Amūr u nāta āsuak moi,
moikhu le gondok āsuak hān miring mun anthuma mun khat athāta.
19 Hava sakor ngāi amūr le aramoi u ngāia kēng ranak ei dōn u,
asik chu aramoi u ha marūl ang ani na,
hava aramoi le alu lehan miring ei machuk u chachak.
20 Hiva antakna lianpa ngāiin ei that sua nōk miring dōra hān amāni asin thō u nāta amalung makhīr u mak a,
amānīn soitān,
hanūk chu mu thei lui,
le riat thei lui le kal chōi thei lui ramīl,
rāngkachak,
sumru,
dār hanūk chu thing le ramīl ei sin u ngāi anmōk mong u mak.
21 Hava rong ni mak,
mithat ngāi,
dōi athei,
hurna,
uiare le ānru nāta amalung makhīr u mak.