Vānpalāi khat le lekhabūnzual
10
1 Hava suale ranak anei vānpalāi khat rēt vānram āta achuma ka mu.
Ama chu ansūma anlianga,
alu chunga sumansāi a om a,
amāisua ha ani anga hanūk chu ake ngāi ha moi chopui ang ani na.
2 Ama hān lekhabute khat ānlong akuta adōna.
Achang kepha chu tipuilian chunga āthina,
hanūk chu avoi kepha hān phil chunga āthīna.
3 Ama ha sīng anhum anga ankhēka,
hanūk chu ei ankhēk bibila khuanri rasa sari anga hān amasang u na.
4 Khuanri rasa sari ei chul kei riat le ānziak ranga kān sina,
tenchu vānram āta hintin hin ana ti na:
“Khuanri rasa sari ngāiin ei masang u ha manlang nō tānla ip ro,
anziak um maziak nō ro,”
ana ti na.
5 Hava vānpalāi tipuilian le phil chunga ānding kei mu hān achang kut vānram tiang ālānga.
6 Umor tāituana ādam,
hanūk chu vānram le vānram sūnga a om ngāi dōra,
ramual le ramual chunga a om ngāi dōra,
tipuilian le asūnga a om ngāi dōra āsinpu raminga khomāk ansama ei ti:
Hun asōt rang ni lāi mak,
ati na.
7 Tenchu vānpalāi sari changna hān abekūl atum nikhua tika Pathian chongrīl ānthup chu hong kip inti,
Pathian suak deari ngāi kōma ei puang anga hong kip inti.
8 Vānram āta arōl kei riatpu hān:
“Sē tānla Tipuilian le ramual chunga anding vānpalāi akut āta lekhabute ānlong ha valāk ro,”
ana ti na.
9 Hankēng vānpalāi kōma ka sēna:
“Lekhabute ha na pēk ro,”
ka vati na.
Hatuka amān:
“Hiva hi chōi tānla sāk hiam ro,
hiva hīn na vonsūng na mankha pe inti,
tenchu na bāia chu khuaining anga athuma riat na ti,”
ana ti na.
10 Hankēng vānpalāi kut āta hava lekhabu ha ka lāka ka sāka.
Ka bāia chu khuaining anga athuma ka riata,
tenchu ka sāk suale ka vonsūnga akhana.
11 Hava suale vānpalāiin ka kōma:
“Athara nangin miring tin,
nam tin,
chong tin,
le rēng tin ngāi ruia maton lam rui nei la ril rang kēng,”
ana ti na.