Sīlmōr sarina le
rāngkachak māichām
8
1 Berate hān sīlmōr sarina ei malong le dār atan zotor ten pei vānrama itē rasa om mak.
2 Hatuka chu Pathian matona vānpalāi sari anding ngāi kōma bekūl sari anpēk ha ka mu na.
3 Hanūk chu vānpalāi atei khat māichām matona ahong andinga,
akuta marim ahui hālna rāngkachak khēng khat aleka,
Pathianin chōmphāng matona marim ahui ātampa anpēk ha Pathian mīnthiang ngāi abōrzong ani na,
hava lehan rāngkachak māichām chunga marim ahui ei hāla ei dar rang ani na.
4 Hava vānpalāi akuta marim ahui anhāl moikhu bibila han Pathian mīnthiang ngāi abōrzong u na Pathian matona avatung ani na.
5 Hava vānpalāiin māichām āta moi alāka marim ahui hālna khēng ha aman bita,
hava ha ramuala ama sula,
hankēng khuanri rasa,
rahupui,
khuanlek ra-āng,
le nīnu ahonga.
Bekūl sari antum anphutna
6 Hankēng vānpalāi sari ngāi,
bekūl sari anlek ngāiin abekūl u ātum ranga ansin u na.
7 Vānpalāi angkhatna hān abekūl atum sua le arial le,
hanūk thisen le ānpol moi ha Pathianin ramuala ama sula,
thingkung dōra mun anthuma mun khat hanūk chu aloma chiak aring dōra ahāl zita.
8 Hava suale vānpalāi annina hān abekūl atuma mual alianpa khat akāng aphuazeka tipuiliana ama sula,
hatuka tipuiliana ti chu mun anthuma mun khat chu thisen achanga.
9 Tipuiliana nuk anei mun anthuma mun khat chu athīna,
hanūk chu rakuanglian chu mun anthum mun khat asiāta anpei.
10 Vānpalāi anthumna hān abekūl atuma,
anvān āta lēm anga achuang ārsi lian khat maniapūra tidung le tīnār ngāi mun anthuma mun khat chunga achula.
11 Hava ārsi raming ha Kar ani na.
Asik chu tī mun anthuma mun khat chu ākha achang zita,
hava tī ha ākha ei ni sika anēk ngāi mi tamtak chu athīna.
12 Vānpalāi manlina hān abekūl atuma ani mun anthuma mun khat,
tha mun anthuma mun khat,
hanūk chu ārsi ngāi mun anthuma mun khat azīnga,
hatuka sūn mun anthuma mun khat,
hanūk chu zān mun anthuma mun khat chu ei ēl tōm sabak inti.
13 Hatuka vānpalāi khat anvān malāia azuanga ka mu na.
Amān ankhēka ramuala a om ngāi kōma:
Antak banu!
Antak banu!
Antak banu!
ei ti hē ka riata.
Alom vānpalāi anthumin abekūl ei la tum u ranga ha la tum u mak.