arōng
upa ngāi ruia anchūna
5
1 Pātar ngāi reng hi angō nō tān,
tenchu pa anga be tānla mathēm bang ro.
Havan tin han ruathar ngāi chu parual anga bē ro.
2 Nutar ngāi chu nu anga,
hatuka nungāk ngāi chu sarnu anga bē tānla anthiang vanga mathēm ro.
3 Arōng tataka arōng ngāi ha lalchi thō ro.
4 Tenchu arōng angkhat peiin nāi mo tū mo adōn a om u ten,
hava ngāi hān ainsūngkhur tianga Pathian andonna le amāni anzir ngāi chunga sin āsa thō ranga anchū bak u rase,
asik chu hava ha Pathianin ei zōt ani na.
5 Hatuka arōng tatak le ama rong atheia a om chu Pathian chunga anbetōk,
asūn azāna niai azong le bōr azong chunga anpēk mi ani na.
6 Tenchu arōng ahui le ahēka rahāi ansak chu adam chunga āthi kēng.
7 Hanūk chu dem akāia ei om u nōkna rangām hiva ngāi ruia chongpēk ro.
8 Tukareng aphung aunāi ngāi poisak lui aliaktena ainsūngkhura mi ngāi ranga poisak lui chu iamna poisak lui ani na,
aiam nōk ngāi nēka āsiat kēng ani zei.
9 Arōng kum sōmaruk athuaia mi chu arōng raminga maziak u nō ro.
Hanūk ama chu ruathar voi khat alāk arōng ei ni rang ani na.
10 Hanūk chu om āsa tin athō lampuia mīn ei manpāk,
hava ngāi ha ani zei,
anāi ngāi bāri antung thei,
khual ankiavāng thei,
mīnthiang ngāi ke rasūk adō thei,
antak ngāi asan thei,
sin āsa tin rēnga anmang sua mi ni rase.
11 Arōng avāng bet ngāi chu arōng raminga maziak nō ro.
Asik chu aning ōl u na sika han Kristana det u luia han ruathar alāk rēt rang zōt unti.
12 Havan tin han māna ei iam u na ha ei tel u nōk sika achung u na āsia ei anlō u ani na.
13 Hanūk chu hava rong ha la ni mak,
mi inrāp tina achei titir u na āndōk um ei anchū u.
Andōk duai la ni mak,
chong korong le mi rui aril ei uar u chachaka aril nōk rua aril ha ei zōt u ani na.
14 Hava sika han kei zōt chu,
arōng avāng bet ngāi chu ruathar la rēt u sela,
nāi nei u sela,
in lui vong u rase.
Hatuka chu ana dui ngāiin anōnrua lampui man u nō ni.
15 Asik chu atun āta mi senkhat chu soitān lam tianga anhoi u kēng ani zei.
16 Aiam mi angkhat pei pasal mo,
nupang mo,
ainsūngkuana arōng a ompui anten,
amān hava ngāi chu sanpui sela kuibing puak chang lāi nō rase,
han kēng arōng tatak abui ngāi ei san theina ranga.
Kuibinga upa
ngāi ruia anchūna
17 Kuibing upa ngāi asa dima ruiril athei ngāi chu mun annina lalchi amanrua u kēng,
aliaktena chong aril le anchūna lama apōng ngāi chu lalchi amanrua ngal u kēng.
18 Pathian Lekhabūna:
“Serāt bu āchīl lāi tak amūra mūrkok manlāk pe nō ro,”
(Dān.25:4 )
ati na.
Hanūk chu,
“Sin āthōpu chu asin thō ei lō amanrua ngal kēng,”
ati rēta.
19 Kuibing upa tak chunga mīn chong asia ahong chōi u ten,
“Ariatpui miring anni nōk ten anthum,”
(Dān.19:15 )
mūr āta chong asuak ani nōk ten pom nō ro.
20 Āsiat athō ngāi chu loko matona angō ro,
hankēng mi tei ngāi um anchina ei man theina ranga.
21 Hiva chong ngāi hi na kōma kei na pēk ani zei,
tutē chunga na mi mandang le na mi madit ual dōn luia Pathian le Puma Krista Isua le vānpalāi anthang ngāi mit muna adettita hē tel ranga chong kei na pēk ani na.
22 Tutē chunga kut abāng rang annot nō ro,
mīn āsia ei vathō ha ansempui no ro,
nunchang anthianga om ro.
23 Hatuka chu atun āta ti riam duai nēk nō tānla,
tenchu na von nei dera sika le nei na chok sika alakte zu manchel chachak ro.