Kuibinga suak
ngāi ruia anchūna
6
1 Pathian raming le koinīn nei manchūna ngāi dōra āsiat ei anril nōkna ranga,
suak rīngkola ankhit ngāi chu apuma u ngāi chip alom peia lalchi thōrua anga be u rase.
2 Hanūk chu suak apuma Pathian aiam ngāi ha iamna lama aparual ei ni u sika han lachi ei thō ha mantōm u nō rase,
tenchu hava nēka han tep annēla adorbo ādom riamsa u rase.
Asik chu amānīn dorbo ei doma satna achang ngāi ha aiam mi le ei madit ngāi ani u na.
Hiva chong ngāi hi nangin manchū tānla mathēm ro.
Sum anditna ruia anchūna
3 Tukareng anchūna rothol mi amanchūna,
koini na Puma Isua Kristana anchūna dik pom lui le Pathian andonna lama anchūna ngāi atel nōk mi chu,
4 Aninga om anlian athō,
itē riatna dōn lui mi ani na.
Tenchu chong ankhal le ansual tiang amalung āsa nōk anput kēng ani zei.
Hava ngāi āta han,
khāmaret,
ansualna,
siat anrilna,
āsa nōk tianga an-iamna ngāi ei masuak ani na.
5 Havan tin han malung akhel adōn mi ngāi le chongtak dōn lui ngāi han ansualna hek lui alianpa ei masuak u chachak,
hava ngāi hān Pathian andonna hi sum suana lampui khat kēng ati na ei mandon u ani na.
Nang chu hava ang mi ngāi āta ankhāi ro.
6 Tenchu Pathian andonna lampui hi malung tāina a om anten achān ei nemna a om kēng.
7 Asik chu ramuala hin nei hong lūtpui itē om mak,
nei suakpui rang um itē om mak ti hi andang phit ani na.
8 Tenchu nēk rang le sil rang pei na man anten,
ha tuk ngal han anhuna om inti.
9 Tenchu ānei rang azōt ngāi chu anthēmna chāngtena,
le āchāng avetna le asiat theina tamtak anthēmnana ei chul u chachak.
Hatuka hava anthēmna hān siatna le anpeinana ei masul ani na.
10 Asik chu sum anditna hi siatna tin dōra abul ani na.
Mi senkhat chu hava neinun ha aman ranga aphāma iamna nāta ankāra ama
le ama hān lunghāngna tamtakin ei vit ani na.
Timothi kōm Paul
achongbe hekna
11 Tenchu nang Pathian mi,
hiva ngāi āta ankhāi tānla,
dikna,
Pathian andonna,
iamna,
anditna,
diartheina le om annuai ngāi ha aman ranga razūl ro.
12 Iamnana anēngna āsa lehan anēng chian ro,
tāituan damna ha sūrtit ro.
Asik chu hava achang ranga ankui kēng na ni,
hanūk chu anariatpui mi tamtak mit muna anpuangna āsa ha nei manlang ani zeia.
13 Alom peia damna apēkpu Pathian mit muna le Pontia Pilat amatona anpuangna sa apēkpu Krista Isua mit muna chong kei na pēk ani zei.
14 Koini na Puma Isua Krista ahong anlang māseng pei hava chong pēk ha manu bui le dem kāi luia zī ro.
15 Hankēng anpākna dōnpu khīt,
Ama rong ningneina dōnpu,
Rēng ngāi Rēng,
Puma ngāi Puma hān ahun taka Pathianin hong manlang inti.
16 Ama rong thi ngāi lui ningneina dōn,
apan salui ra-ānga om,
tutēn mu ngāi lui le mu thei lui,
Ama kōma anlalna le thōtheina chu tāituan tāituana om rase.
Amen.
17 Hiva ramuala anchong ngāi hi ei anlian u nōkna ranga le anngampuina bui neinunga hin anngamna dōn u nō sela,
tenchu aloma rāisān taka amang ranga ātam sabaka ana pēkpu Pathian adam chunga anngampuina ei dōn thei u na ranga manchū ro.
18 Om āsa thō ranga,
sin āsa lehan aliama ei om thei u na ranga,
mi āpēk thei le mi āsem thei ani u ranga chong pe ro.
19 Havan tin han nangkana hun
ala honga suak rang tika lungphūm adet anga ei anding u na rang amāni ranga damna,
tāituan damna chu ei mantīng thei u na ranga manchū ro.
20 O Timothi,
nang na kōma anbetōk sua ha asa dima vong ro,
Pathian lalchi thō nōkna lama chong korong le omzia bui chong memei mīn hianna ei ti u akorong ankhalna ngāi ha nūksīr son ro.
21 Senkhatin chu hava hianna ha adōn sua anga anbena iamna lampui amāka lam anvāi ani u na.
Lungkhamna chu na kōma om rase.
Amen.