4
O beng rakrell o Jesuseha
1 Pal kowa anas o Debleskro Ducho o Jesuses an o mulo them,
kai kamas les o beng o Debleskro dromestar tele te anell.
2 Un star-deesh (40) diwessa un ratsja chas o Jesus tchi.
Un palle was les i bari bok.
3 Koi was o beng pash leste,
un penas:
“Te hal tu o Debleskro tchawo,
rake ap kol barra,
te well lendar maro!”
4 Penas o Jesus:
“An o Debleskro lab hi tchinlo:
O maro kokres rikrell i menshes gar djido.
Job djiwell dran hako lab,
hoi o Dewel rakrella.a”
5 Pal kowa anas les o beng an o Debleskro foro.
Kowa hi o foro Jerusalem.
Un o beng tchiwas les ap o Debleskro baro kheer pral pre,
6 un penas ap leste:
“Te hal tu o Debleskro tchawo,
muk tut tele te perell!
An o Debleskro lab hi tchinlo:
O Dewel penas ap peskre bolepangre,
te hidjrenn le tut lengre wastentsa,
te dukreh tu tire pire gar ap i barra.b”
7 Penas o Jesus:
“Ninna hi an o Debleskro lab tchinlo:
Rike o Debles gar dineleske,
te sikrell lo tut har sorelo job hi.c”
8 Pal kowa anas les o beng ap i bari berga pre,
un sikras les i tsele themma ap i phub un lengro brawlepen,
9 un penas:
“Kawa lauter kamau tut te dell,
te pereh tu glan mande tele,
un mangeh man an.”
10 Koi penas o Jesus ap leste:
“Dja tuke mandar,
tu beng!
An o Debleskro lab hi tchinlo:
Tu mangess o Debles an,
– job hi tiro rai, – un wess leske kokres koi!d”
11 Koi djas peske o beng.
Un bolepangree wan pash o Jesuseste,
un his leske koi.
An o them Galilea
12 Un har o Jesus shunas,
te was o Johanni stildo,
djas lo dran o them Judea win,
un djas pale an o them Galilea.
13 Kote atchas lo gar an o foro Nazaret.
Job djas dureder un djiwas an o foro Kapernaum,
hoi pash o baro pani Genezaret tchiddo hi.
Kowa hi an i themma Sebulon un Naftali tchiddo.
14 Jaake was kowa tchatcho,
hoi o Debleskro rakepaskro,
o Jesaja,
glan i rah tsiro penas:
15 Tumer menshe an i themma Sebulon un Naftali,
tumer,
kai djiwenna pash o baro pani,
an o them wergel o pani Jordan,
tumer djiwenn kote,
kai kolla djiwenna,
kai prindjrenn o Debles gar.
16 Tumenge hi ko lab,
hoi o Debleskro rakepaskro penas:
Tumer djiwenna an i rati,
un dikenna i bari momeli.
Jaake har o kham pre djala,
wella i momeli pash kolende,
kai hi len traash o merepastar.f
17 Ap ko tsiro penas o Jesus ap i menshende:
“Mukenn tumaro tchilatcho drom,
un djan ap o Debleskro drom!
O tsiro well sik,
kai lell o Dewel i menshen dran o tchilatchepen win.”
O Jesuseskre mala
18 Un har job pash o baro pani an o them Galilea djas,
dikas lo kote dui phralen:
O Simon,
kai kharella ninna Petro,g
un leskro phrales,
o Andreas.
Kolla his matchepangre,
un witsran pengre matchengre gone an o pani,
te taprenn le matchen.
19 Un job penas ap lende:
“Awenn mantsa!
Me krau tumendar menshen,
kai anenn wawaren pash mande.”
20 Har jon kowa shunan,
mukan le pengre matchengre gone,
un djan leha.
21 Un job djas dureder,
un dikas dui wawar phralen:
O Jakobo un o Johanni.
Kolengro dad hi o Zebedeo.
Jon his pash pengro dadeste an o beroh beshdo,
un kran i matchengre gone tseles.
Un job das len gole.
22 Un sik stan le pre,
mukan o bero un pengro dades,
un djan leha.
O Jesus krell bud nasselen sasto
23 Un job djas an o tselo them Galilea trujel,
un rakras an i biboldengre kangria,
un penas i menshenge ko latcho lab,
kai o Dewel kamell len dran o tchilatchepen te lell,
un kamell lengro rai te well.
Un job kras lauteren sasto,
kai mank lende nasselo hi.
24 Un ninna an o tselo them Syria shunan le lestar.
Un jon anan lauteren pash leste,
kai nasselo hi.
Mashkral lende his kolla,
kai hi len bare duka,
un kolla,
kai hi an lende benga,
un kolla,
kai hi nasselo an pengro shero,
un kolla,
kai hi bango.
Un job kras len sasto.
25 Un bud menshe djan leske palla.
Jon wan dran o them Galilea,
un dran ko them,
kai i deesh forja tchiddo hi.
Jon wan ninna dran o them Judea,
un dran o foro Jerusalem,
un dran o them,
hoi ap i wawar rig o panjestar Jordan tchiddo hi.