3
Pash o pani Jordan
1 An ko tsiro was i mursh an o mulo them an o them Judea.
Leskro lab his Johanni.
Job hi kowa,
kai taufras i menshen.
2 Un job penas i menshenge:
“Mukenn tumaro tchilatcho drom,
un djan ap o Debleskro drom!
O tsiro well sik,
kai lell o Dewel i menshen dran o tchilatchepen win.”
3 O Johanni hi ko mursh,
kolestar o Debleskro rakepaskro,
o Jesaja,
penas:
Kote hi jek,
kai an o mulo them gole della un penella:
Krenn o drom o Debleske,
te nai well lo pash i menshende!
Lenn halauter krik,
hoi o Debleske an o drom tchiddo hia.
4 I plaashka dran viechengre balla his ap leste.
Un i ledertikri dori his trul leste.
Un leskro chapen his gwinb un tikne stepangrec,
kai stenn an o senlepen trujel.
5 Un bud menshe djan pash leste.
Kolla wan dran o foro Jerusalem un dran o tselo them Judea un dran o them pash o pani Jordan.
6 Un jon penan glan i menshende hawo tchilatcho koowa jon kran,
un mukan pen lestar an o pani Jordan te taufrell.
7 Ninna bud Farisarja un Sadduzarja wan pash leste,
te mukenn le pen lestar te taufrell.
Har job kolen dikas,
penas lo ap lende:
“Tumer tchilatche sapa!
Tumer nai nashenn gar krik glan o Debleskri choli,
hoi wella pral i menshende.
8 Sikrenn i menshende,
te djan tumer ap o Debleskro dromd un buder gar ap o tchilatcho drom!
9 Ma penenn:
O Abraham hi maro dad!
Me penau tumenge:
O Dewel nai krell dran kal barra o Abrahameskre tchawen.
10 Tumer han har ruka,
kai wenna tele dino.
I towere hi koi tchiddo,
te well ko tselo ruk tele dino.
Hako ruk,
hoi hidjrella kek latcho koowa,
well tele dino,
un an i jag witsedo.
11 Me tchiwau tumen an o pani.
Kowa sikrella,
kai tumer mukan tumaro tchilatcho drom,
un djan kanna ap o Debleskro drom.
Pal mande well jek,
kowa hi sorleder har me.
Un me hom gar moldo,
te hidjrap leskre kircha leske.
Kowa tchiwell o Debleskro Ducho ap tumende.
Kowa hi har i jagf.
12 Job hi har i hacho,
kai rikrell i witsepaskri an peskro wast,
te witsrell lo o djob pral,
jaake te perell o phuss tele ap i phub.
Peskro djob anell lo an peskro djobeskro kheer dren.
Un o phuss chatchrell lo an i jag,
hoi hako tsiro chatchella.”
13 Ap ko tsiro was o Jesus dran o them Galilea pash o pani Jordan,
te mukell lo pes o Johannestar te taufrell.
14 Kowa kamas les gar te taufrell.
Job penas ap leste:
“Tu hunte taufrals man.
Hoske wal tu pash mande,
te taufrap tut?”
15 Koi penas o Jesus ap leste:
“Muk kowa kanna jaake te well!
Hi mishto menge,
te kras kowa lauter,
hoi o Dewel mendar kamella.”
Un o Johanni kras,
hoi o Jesus leske penas,
16 un taufras o Jesuses.
Har o Jesus dran o pani pral djas,
djas o bolepen pre.
Un job dikas o Debleskro Ducho har i parno tchirklo ap peste tele te well.
17 Un i rakepen dran o bolepen penas:
“Kawa hi miro tchawo,
koles me kamau.
Pral leste hom me bachtelo.”