O Debleskro rakepaskro,
o Maleachi
1
O Debleskro latchepen i Israelenge
1 Kawa hi o lab, hoi penas o baro Dewel ap peskro rakepaskro, o Maleachi, te penell job kowa dureder ap i Israelitarja.
2 “Me kamau tumen o djijestar”, penell o baro Dewel.
Tumer penenn mange koi pre pale: “Har dikah mer kowa, kai tu kameh men?”
“Hi gar o Esau un o Jakob phrala?” penell o baro Dewel. “Un me kamau o Jakobes, 3 o Esaes kamau me gar. Un krom, te was leskro them, kai bud berge hi, har i mulo them, kai i diwje djukle djiwenn. 4 Te penenn ninna leskre tchawe, kol Edomarja: ‘Ninna te wan mare forja paash dino, mer tchiwah len newes pre’, palle penau me, o baro Dewel, ko rai pral o bolepen un i phub: ‘Ninna te tchiwenn le kol forja pale pre, me dau halauter pale paash.’ Un wawar menshe penenn pral lende ‘tchilatcho them’ un ‘kalla hi menshe, pral kolende o baro Dewel pes choirella an hako tsiro’. 5 Ko tsiro wella sik, kai dikenn kowa tumare jakentsa, un palle penenn tumer: ‘O baro Dewel hi sorelo pral o them Israel un dureder win.’”
O Dewel dikell gar latches ap kowa, hoi i rashaja krenn
6 O baro Dewel, ko rai pral o bolepen un i phub, penell: I tchawo hunte hadell peskro dades, un i budepaskro hunte dikell pre ap peskro rajeste. Me hom tumaro dad – hoske hadenn man gar? Me hom tumaro rai – hoske dikenn gar pre ap mande? Tumer rashaja, tumer dikenn tele ap mande.
Un tumer putchenn: Hoi kram, kai peneh ‘tumer dikan tele ap mande?’
7 Koi pre penau me: ‘Tumer anan ap o Debleskri chatchepaskri pale-tchiddo mass’, un putchenn: ‘Hoi anam tuke, hoi pale-tchiddo his?’
Tumer krenn har te wals miri chatchepaskri tchi moldo. 8 Un anenn mange i viecho, hoi korelo, bango oder nasselo hi, un penenn tumenge: ‘Kowa hi kek djungelo koowa.’ Me penau tumenge: ‘Anenn sau viecho tumaro themeskro rajeske, un dikenn, hoi lo krell! Patsenn tumer, te dikell lo latches ap tumende?’ Ko penell o baro Dewel, ko rai pral o bolepen un i phub.
9 Kanna nai mangenn lestar, tumer rashaja, – jaake bud har kamenn, te well lo menge latches! Hoi djal an tumaro shero glan? Sau koowa kran, un tumer patsenn, te well lo tumenge latches! ‘Na-a’, penell o baro Dewel, ko rai pral o bolepen un i phub.
10 ‘Kamaus, te wals jek tumendar koi, kai krals o wudja an miro kheer pandles, te krenn tumer gar tchitcheske i jag ap miri chatchepaskri! Man hi doha tumendar’, penell o baro Dewel, ko rai pral o bolepen un i phub. ‘Un kol marede vieche, hoi mange anenn, hi mange gar mishto.’
11 O baro Dewel, ko rai pral o bolepen un i phub, penell: Fun kotar, kai o kham pre djala, bis kote kai o kham tele djal, well miro lab sharedo pash kolende an i wawar themma. An bud gaba un forja chatchrenn le mange sungepaskro koowa un viechen, hoi hi latcho an mire jaka. Kolla lauter sharenn miro lab.
12 Tumenge hom tchi moldo, te penenn tumer: ‘Koi chatchepaskri o baro Deblestar hi tchi moldo. Anas leske tchomone, hoi ninna tchi moldo hi!’
13 Un tumer penenn: ‘Dikenn, hawi budi hi men koleha! Ko well menge dran o nak win.’ Tumer anenn mange viechen, kai hi tchoredo, bango un nasselo. Penap me koi pre: ‘Kowa hi shukar, hoi tumer mange krenn’, penell o baro Dewel.
14 ‘Praassedo te well hakeno, kai pes sowel das, te dell lo man i latcho mursh viecho. Un palle chochell lo man un anell mange i nasselo vieches. Me hom o pralstuno rai, un i menshe dran wawar themma sharenn man’, penell o baro Dewel, ko rai pral o bolepen un i phub.