7
O ersto dikepen: stepangre
1 O baro Dewel, maro rai, mukas man te dikell, har kras jek stepangre. Kowa his an ko tsiro, har o khass o duito kopo pre djas, pal kowa, har mukas o baro rai o khass o ersto kopo te tchinell.
2 An miro dikepen dikom, har kaman i stepangre o tselo senlepen te chal an o them. Koi penom: “Baro Dewel, maro rai, ma dik ap mari doosh! Har nai well o Jakobeskro kheer pale ap i herja, kai jaake tikno hi.” 3 Koi khaitas kowa o baro Debles, un job penas: “Mishto, kowa well gar jaake!”
O duito dikepen: o tatepen
4 Palle mukas man o baro Dewel, maro rai, i wawar dikepen te dikell: Job das i baro tatepen gole, te dell lo i menshen i phagi. Un o tatepen chas o baro pani pre, hoi tel i phub hi, un kamas o them pre te chatchrell. 5 Koi penom: “Baro Dewel, maro rai, muk tele! Har nai well o Jakobeskro kheer pale ap i herja, kai jaake tikno hi.” 6 Koi khaitas ninna kowa o baro Debles. Un o baro Dewel, maro rai, penas: “Kowa te well gar jaake!”
O triinto dikepen: i dori, kai i blaio pre-pandlo hi
7 Un job mukas man pale te dikell: Job his tardo ap i massuri, an peskro wast i dori, kai i blaio pre-pandlo hi, te dikell lo, te hi i massuri gar bango. 8 Un o baro Dewel putchas mandar: “Hoi dikeh, Amos?”
Me penom: “I dori, kai i blaio pre-pandlo hi.”
Koi penas lo: “Dik, me tchiwau i dori, kai i blaio pre-pandlo hi, mank mire menshende Israel, te sikrap, kai hi le har i bangi massuri. Jon khaitenn man kanna buder gar.
9 I mulne platsea, kai mangan o Isaakeskre menshe chochene deblen an,
kal platse wenna paash dino.
Un kol khera, kai sharan i Israelitarja o Debles,
wenn dino an kotja.
Un me wau miro chareha pral o kheer Jerobeam.”
O Amos well win tradedo dran o foro Betel
10 Un o rashai o forestar Betel – leskro lab his Amazja – bitchras murshen pash o Jerobeam, ko baro rajeste an Israel, un mukas leske te penell: “O Amos krell i menshen diwjo, te hadenn le pen pral tute. Leskro rakepen nai shunah mer buder gar. 11 Job penell:
O Jerobeam well o chareha mulo dino.
Un i Israelitarja wenn pandles krik anlo dran pengro them.”
12 Un o Amazja penas ap o Amos: “Tu dikepaskro, dja tuke, un naash an o them Juda! Kote nai rakreh an o Debleskro lab, un jon denn tut tiro maro. 13 Kate an Betel mangell o baro rai o Debles an, kate hi leskro kheer. Doleske nai rakreh tu gar pale kate an o Debleskro lab.”
14 O Amos penas: “Me hom kek Debleskro rakepaskro, koles siklo was, har te rakrell lo o Debleskro lab, un kowa koleske plaissedo well. I bakrengro hom me, un faigetikre ruka hi man. Kolestar djiwau. 15 O baro Dewel las man mire bakrendar krik un penas ap mande: ‘Dja koi, un pen mire menshenge Israel, hoi lenge penau!’ 16 Kanna shun tu o Debleskro lab! Tu kamal gar, te penap me i Israelenge kol laba, hoi o baro Dewel pral lende penas. Tu kamal gar te rakrap pral o kheer Isaak. 17 Doleske penell o baro Dewel:
Tiri romni well i lubni an o foro.
Tire tchawe un tcha wenn maredo o chareha.
Tiri phub lenn wawar menshe.
Tu meress an i pale-tchiddo them.
Un i Israelitarja wenn win tradedo dran lengro them.”