8
O starto dikepen: i korba, kai rukengre dren hi
1 O baro Dewel, maro rai, mukas man i korba te dikell, kai rukengre dren hi, kolenge o tsiro was, te wenn le tele tchinlo i rukendar. 2 Un job putchas mandar: “Hoi dikeh, Amos?”
Me penom: “I korba, kai rukengre dren hi, kolenge o tsiro was, te wenn le tele tchinlo i rukendar.”
Koi penas o baro Dewel:
Jaake was mire menshenge Israel o tsiro,
te wenn le tele tchinlo.
Jon khaitenn man buder gar.
3 An ko diwes giwenn i gipangre an o rajeskro kheer ropaskre gilja.
An i tsele gaba un forja hi mule menshe tchiddo.
Kolen witsran le pokones koi.
Kowa penau me, o baro Dewel.
O Dewel bistrell gar i brawelengri doosh
4 Shunenn kowa, tumer parepangre,
kai rikrenn i tchorwelen tele,
te atchell len buder tchi djipaske!
5 Tumer penenn tumenge: Mu djal o Debleskro diwes sik trujel,
ninna ko baro diwes, hoi sikrell, kai o newo tchon was!
Palle nai krah maro djobeskro kheer pale pre, te bikras djob!
O bikepaske lah mer i tikneder piri,
te kras lat pherdo djob,
un budeder lowe har tchatcho hi,
un tchiwah sawe barra ap i waga, te chochas mer i ginepangre.
6 Ninna ko phuss, hoi o djobestar pral atchas,
bikrah, har te wals lo djob.
I tchorwele, kai nai plaissrenn gar pengri sijaan,
kolen ginah menge, te budrenn le menge,
ninna te hi lengri sijaan gar bareder har dui kircha.
7 O baro Dewel, koles i Israelitarja sharenn,
job das pes sowel un penas:
An kek tsiro bistrau kau tchilatcho koowa, hoi le kran.
8 Doleske krau, te trissell i phub,
un hakeno an o them trashell.
O tselo them hadell pes un djal pale tele har o lengsto pani Nil an o them Egiptia.
9 O baro Dewel, maro rai, penell:
An ko diwes djal o kham tele mashkral o diwes.
Un mashkral o diwes well i rati pral o them.
10 Tumare bare diwessa, kai hans bachtelo,
wenn kanna diwessa, kai denn gole i bibachtjatar.
Un tumare gilja wenna ropangre gilja.
Tumer riwenn tumen an gone,
un tchinenn tumare tsele balla ap o shero tele.
Un han jaake har i dad un i dai,
kai pral pengro tchaweste rowenn, kai meras,
un len hi kek wawar tchawe.
Un lauter, hoi djal an ko diwes,
krell i menshenge bari daar.
11 I tsiro wella, penell o baro Dewel, maro rai,
koi bitchrau i bok an o them.
Kaja hi kek bok pal maro
un kek trush pal pani.
Na-a, kaja hi i bok pal o lab o baro Deblestar, te shunenn le les.
12 I menshe djan trujel pash o Mulo Baro Pani,
un kotar dureder pash o Mashkralstuno Baro Pania,
un kotar dureder ap koi rig, kai norden hi,
un palle kote, kai o kham pre djal.
Un jon rodenn jekes, kai nai penell lenge o baro Debleskro lab,
un hatsenn kekes.
13 An ko diwes perenn ninna saste terne mursha un djuwja khetne i trushatar.
14 Un kolla, kai denn pen sowel pash o chocheno dewel an Samaria,
un penenn: ‘pash ko dewel, koles o kheer Dan an-mangell’,
un ‘pash o dewel o forestar Beersheba’,
kal menshe perenn un stenn buder gar pre.