O Debleskro rakepaskro,
o Obadja
1
O Debleskri choli well pral i Edomarja
1 Kowa hi, hoi o Obadja dikas. Kawa penell o baro Dewel, maro rai, pral o them Edom:
O baro Dewel bitchras peskro bitchepaskres pash i menshende an wawar themma.
Un mer shunam, har job penas:
Stenn pre! Mer djas an o kurepen
un kuras men i menshentsa an o them Edom!
2 O baro Dewel penell ap o them Edom: Me krau tut tiknes,
jaake te dikell hako them ap i phub tele ap tute.
3 Tiro sorelo foro hi tardo ap i bare barra,
tu djiweh pral an i berge.
Doleske phurdal tu tut pre.
Dik, tiro dji chochras tut,
har lo tuke dren rakras:
‘Kek nai witsrell tut tele ap i phub.’
4 Te krals tu ninna tiro kheer dur pral ap i berga har i adlari,
jaake te dikell kowa win, har te wals tiro kheer mashkral i bolepangre momlia,
djiness, me witsrau tut tele,
penell o baro Dewel.
5 Tchorepangre wenn rati pral tute
un tchorenn tut win, bis te hi le doha!
Hoi atchell tuke palle?
Ninna kolla wenna pral tute, kai i drake tele lenna.
Tuke mukenn le tchi pral!
6 An tiro tselo them rodenn le trujel,
un hatsenn tiro tselo khatedo kutch koowa!
7 Tire tsele mala tradenn tut dran tiro them win!
Kolen tu patsal,
jon chochenn tut, un perenn tuke an o dumo.
Kolla, kai tiro maro chan, phukrenn ap tute,
un tu haiweh les gar.
8 Me, o baro Dewel penau: An ko tsiro lau i gosewen an o them Edom krik.
Un ap i berge Esau djinell buder kek, hoi te krell. 9 Un i sorele kurepangre an o foro Teman lenn bari daar.
Doleske well hakeno ap i berge Esau maredo.
10 Tu kral djungelo koowa ap tiro phraleste, o Jakobeste!
Doleske well i ladj ap tute,
un tu wess jaake khetne stakedo,
te stess buder gar pre!
11 Tu, Edom, hals koi pashel tardo,
har djan i wi-themarja an Jerusalem dren,
un anan leskre lurden pandles krik,
un khelan koi pral, koon kones lengre menshendar lella.
Tu hals har jek lendar!
12 Tu, Edom, ma dik buder tele ap tiro phraleste, o Juda,
an ko tsiro, kai leske djungeles djal!
Ma sa buder pral leskre tchawende
an ko tsiro, kai lenge ropaske hi!
Ma rake jaake pre-phurdo
an ko tsiro, kai jon darenna!
13 Ma dja dren an i wudja lengro forestar
an ko tsiro, kai mire menshenge o ropaske hi!
Ma dik tele ap lengri bibacht
an ko tsiro, kai jon rowenna!
Ma tape pal lengro koowa,
an ko tsiro, kai lenge jaake djungeles djal!
14 Ma tchip tut pash o drom khatedo tardo,
kai i menshe nashenn penge,
te dess len mulo!
Ma phuke ap kolende,
kai pral atchan an ko djungelo tsiro!
O Israel well win lino dran i daar
15 O diwes well sik, kai well miri choli pral i tsele themma ap kai phub, penell o baro Dewel. Jaake har tu kral, jaake well tuke kerdo. Kowa hoi tu kral, well ap tiro shero pale.
16 Tumer menshe dran Juda, kai djiwenn ap miri berga, tumenge penau: Jaake har pijan tumer dran o khoro miri choljatar, jaake hunte pijenn palle i tsele wawar menshe ap i phub koi dran hako diwes. Jon hunte tchorenn o pipen an pende dren, bis te tchi buder dren hi, un kek lendar buder koi hi. Palle well, har te dans jon gar.
17 Ap i berga Zion djiwenn kolla, kai win lino wan dran o merepen. Un i berga hi pale o baro Debleske kokres. O Jakobeskre tchawe lenn o them pale penge, hoi lenge randedo was. 18 Un i menshe dran i khera Juda un Israela wenn har i jag. Un o kheer Edom hi o phuss, hoi well pre chatchedo, bis te tchi o kherestar Esau pral atchas. Kowa penell o baro Dewel.
19 Un i menshe dran o kheer Juda, kolla kai djiwenn an o them, kai o kham pralstunes hi, jon lenn kol berge dren, kai i Edomarja djiwenn. Un kolla, kai djiwenn kote, kai o kham tele djal, jon lenn o them dren, kai i Filistarja djiwenn. Un kol wawar lenn i themma Efrajim un Samaria penge dren. Un o kheer Benjamin lell o them Gilead dren.
20 Un kolla, kai pandles krik anlo wan dran Israel, jon lenn o them Kanaan dren bis pash o foro Zarpat. Un kolla, kai dran o foro Jerusalem pandles an o foro Sefarad anlo wan, jon lenn kol forja penge, kai an o them Juda kote hi, kai o kham pralstunes tardo hi. 21 Un kolla ap i berga Zion, kai win lino wan dran o pandepen, len hi penepaske pral i Edomarja ap pengre berge. Un o baro Dewel hi o baro rai.