O Debleskro rakepaskro,
o Amos
1
1 Kawa hi, hoi sikras o Dewel o Amoseske pral o kheer Israel an ko tsiro, kai o Usija o baro rai his pral o them Juda. Un o Jerobeam, koleskro dad o Joash hi, his o baro rai pral Israel. His dui bersha glan ko tsiro, kai i phub soreles trissas un pre phagas. O Amos was dran o foro Tekoa un his jek kolendar, kai dan jak ap i bakrende.
2 O Amos penas:
O baro Dewel dell bari gole i berga Zion pral tele.
Leskri gole hi har i gole, hoi i lewo della,
un well shunlo dran Jerusalem.
O bakrengro them well truk,
un o khass ap i berga Karmel well djelto.
O Debleskri choli well ap i themma
Syria
3 O baro Dewel penell: I menshe an o foro Damaskus kran pale te pale djungelo koowa. Baro tchilatcho koowa kran le ap i menshende an Gilead. Doleske lenn le pengri phagi, un khaitenn man gar. 4 Me bitchrau i jag an i shukar khera, hoi o rai Hasael peske kras. Un chatchrau i sorele khera tele, kai o baro rai Ben-Hadad djiwas. 5 Me phagau i bare wudja o forestar Damaskus paash, un mukau i rajen dran Bikat-Awen un Bet-Eden mulo te dell. Un i menshe dran o them Syria wenn pandles krik anlo an o them Kir. Ko penell o baro Dewel.
Filistia
6 O baro Dewel penell: I menshe dran o foro Gaza kran pale te pale djungelo koowa. Jon lan i menshen dran tsele gaba pandlo, un bikran len an i wasta kolendar dran o them Edom, te wenn le lengre budepangre. Doleske lenn le pengri phagi un khaitenn man gar. 7 Me bitchrau i jag ap i massurja trul o foro Gaza, hoi chatchrell leskre sorele khera tele. 8 Un mukau i raja pral i forja Ashdod un Ashkelon mulo te dell, un dau o fores Ekron. Un i tsele Filistarja, kai pral atchan, merenna.
Tirus
9 O baro Dewel penell: I menshe dran o foro Tirus kran pale te pale djungelo koowa. Jon dan i tsele pandlen an i wasta kolendar dran o them Edom, un bistran, kai hi i pandle lengre phrala, un kai phrala hunte rikrenn khetne. Doleske lenn le pengri phagi un khaitenn man gar. 10 Me bitchrau i jag ap i massurja trul o foro Tirus, hoi chatchrell leskre sorele khera tele.
Edom
11 O baro Dewel penell: I menshe an o them Edom kran pale te pale djungelo koowa. Lengre phralen, i Israelitarjen lan le palla o chareha, un len his kek dji lenge. Hako tsiro hi le chojedo ap lende un mukenn gar tele lengri choljah. Doleske lenn le pengri phagi, un khaitenn man gar. 12 Me bitchrau i jag an o foro Teman, un chatchrau i sorele khera tele an o foro Bozra.
Ammon
13 O baro Dewel penell: I menshe an o them Ammon kran pale te pale djungelo koowa. Har kuran le pen an o kurepen, te lenn le i bareder them, tchinan le djuwjen pre, kai wawartchandes his an o them Gilead. Doleske lenn le pengri phagi, un khaitenn man gar. 14 Me bitchrau i jag ap i foreskre massurja o forestar Rabba, hoi chatchrell leskre sorele khera tele, ap ko diwes, kai well o kurepaskri gole dino, un o kurepen win phagell har i baro phurdepen. 15 Lengro baro rai peskre pralstunentsa well pandlo un krik anlo an i wawar them. Ko penell o baro Dewel.