4
O Debleskri choli well pral i menshende dran wawar themma
1 An kol diwessa, an ko emligo tsiro, kai dau me newo djipen an o them Juda un an o foro Jerusalem,
2 anau i menshen dran wawar themma khetne,
un anau len tele an i tala Josafata.
Un kote anau lengri doosh ap lende:
jon tradan mire menshen, i Israelitarjen,
kolen me mange win rodom,
dran lengro them win un anan len an wawar themma.
Un o themestar Israel lan le penge hakeno i kotar.
3 Un jon khelan win, koon hawe mire menshendar lella;
un bikran jek mursh tchawes te plaissrenn le i rati i lubjah;
un bikran i tchai, te ginenn le mool, hoi was pilo un tchi atchas latar.
4 Un tumer menshe dran i forja Tirus un Sidon un dran o tselo them Filistia,
tumer kamenn ap mande te djal?
Kamenn mange pale te dell, hoi tumenge krom?
Mishto! Palle awenn!
Jaake mukau sik tumaro tchilatchepen ap tumaro shero pale te well.
5 Miro rup un miro sonakai lan tumenge,
un miro shukar kutch koowa anan an i khera tumare deblendar.
6 I terne murshen dran Juda un Jerusalem bikran tumer ap i grichtikre menshende,
te wenn le dur lengro themestar krik anlo.
7 Shunenn, me dau len pale gole kotar, kai tumer len bikran.
Un mukau tumaro tchilatcho koowa ap tumare sherja pale te well,
8 un dau tumare tchawen un tchen an i wasta kol menshendar dran Juda;
un kolla bikrenn len ap i menshende an Saba, kai djiwenn an i them, hoi dur krik hi.
Me, o baro Dewel, penom kowa.
9 Denn win gole mank i menshende an i wawar themma:
Awenn an o kurepen!
Lenn tumare sorele murshen khetne!
Bitchrenn tumare tsele lurden pre!
10 Krenn chare dran tumare hachetikre koola, kolentsa budran an i phub!
Krenn witsepangre tchurja dran tumare tchurja, kolentsa tchinan o khass!
Kowa, koles kek soor hi, te penell: Me hom sorelo.
11 Awenn, tumer lauter dran i themma, kai hi trul o Israel!
Awenn sik lauter khetne an koi talab!
Palle bitche tu, baro Dewel, tire kurepangre kote tele!
12 O baro Dewel penell: “I lurde dran i wawar themma hunte krenn pen ap o drom, te wenn le an i tala Josafat.
Kote hom me beshdo,
un mukau miri choli te well pral i menshende an i themma koi trujel.
13 Lenn koi tchuri an o wast, kolah o djob tchinenn!
Tchinenn len tele, har te wans le djob!
Awenn un stakrenn len khetne, har te wans le drake,
kolengri mool an i bari piri nashell.
Koi piri hi pherdo un nashell pral.
Jaake baro hi lengro tchilatchepen.”
14 Serja un serja menshe wenn an i tala, kai o tchatchepen win kerdo well.
O diwes o baro Deblestar wella sik.
15 O kham un o tchon wenn kalo,
un o bolepangre momlia chatchrenn buder gar.
16 O baro Dewel dell bari gole pral tele i berga Zion.
Un dran o foro Jerusalem mukell lo peskri gole jaake te shunell,
te trissell o bolepen un i phub.
Peskre menshenge Israel hi lo har i sorelo kheer,
kai len kek bibacht taprell.
O them Juda un o foro Jerusalem wenn railes kerdo
17 Palle dikenn tumer Israelitarja, te hom me o baro Dewel un tumaro Dewel.
Me djiwau ap i berga Zion, hoi mange hi.
Palle hi Jerusalem i Debleskro foro.
Un lurde dran wawar themma wenn buder gar dren.
18 An ko tsiro well bud gudli mool bares ap i berge.
Un i grumja un bakre ap o pralstuno them denn jaake bud thud, te hi budeder har doha koi.
Un bud naashede panja hi an o them Juda.
Un dran o baro Debleskro kheer nashell i pani win,
un nashell tele an o telstuno them, hoi kharell Shittim.
19 An o them Egiptia djiwenna buder kek menshe.
Un o them Edom well i diwjo mulo them.
Jon maran i menshen dran Juda, kai lenge tchi kran.
Doleske djal lenge kanna jaake.
20 An o them Juda un an o foro Jerusalem djiwenn menshe hako tsireske.
21 Lengri rateskri doosh well krik linoc.
Un me, o baro Dewel, djiwau ap i berga Zion.