23
Kol dui phenja, i Ohola un i Oholiba
1 Un o baro Dewel penas ap mande: 2 Tu, mensho, his dui djuwja, tcha jek datar. 3 Kolla wan lubja an o them Egiptia, har le terne his. Kote mukan le pengre tchutchja an te taprell. 4 Koi bari kharas Ohola un lakri pheen Oholiba. Un me romedinerom len, un jon wan mire romja, un anan mange tchawen un tchen ap i phub. I Ohola hi o foro Samaria. Un i Oholiba hi o foro Jerusalem.
5 Un an ko tsiro, har his li miro, lubras i Ohola trujel, un nashas wawar murshenge palla. Lakre pirne his kurepangre dran o them Assur, 6 rido an raile koola, themeskre raja un pralstune lurde, halauter shukar terne mursha, kai ap graja klissenn. 7 Un joi lubras trujel lentsa, kol an-dikle murshentsa dran o them Assur. Un joi mangas kol chochene deblen an kol murshendar, kolenge joi palla nashas. Un jaake was li pale-tchiddo mange. 8 Har li i terni djuwel his an o them Egiptia, sowan i mursha lah, un tapran lakre tchutchja an, un kran lah trujel. Un sawo koowa mukas li kanna gar. 9 Doleske dom lat an i wasta kol murshendar dran o them Assur, kai lakre pirne his, un kolenge joi palla nashas. 10 Jon riwan lake lakre ripja win, un lan lakre tchawe un tcha latar. Un lat dan le o chareha mulo. Un har i wawar djuwja dikan, har li peskri phagi las, rakran le pal late.
11 Lakri pheen, i Oholiba, dikas kowa. Ninna te dikas li har lakri phenjake djas, nashas li gomme budeder murshende palla, un lubras djungleder trujel har lakri pheen. 12 Joi nashas kol kurepangren dran o them Assur palla, kol themeskre rajenge un pralstune lurdenge, rido an raile koola, halauter shukar terne mursha, kai ap graja klissenn. 13 Un me dikom, te kras li pes pale-tchiddo lentsa, jaake har lakri phureder pheen ninna kras. 14 Un kowa his lake gar doha. Joi dikas lole bilte ap i massuri, hoi sikran murshen dran Babilonia. 15 Len his i kutch pandepen trul pengro per, un shukar stadja dorjentsa ap pengro shero. Lauter his sorele kurepangre. Jaake dikan i tchatche Babilonarja win, kolengro them o them Kaldea hi. 16 Har li kol bilte dikas, chatchas li ap kol murshende, un bitchras murshen pash lende an o them Babilonia, te wenn le pash late.
17 Un i Babilonarja wan pash late, te sowenn le lah. Un jaake kran le lat pale-tchiddo. Un har kras li pes pale-tchiddo lentsa, his lat doha lendar.
18 Jaake kras li, te nai dikas hakeno, har li trujel lubras, un har li nanges win dikell. Kote sikrom lake miro dumo, jaake sikrom lakri phenjake miro dumo.
19 Un joi kras kowa gomme djungleder, un lake was ko tsiro an o shero, har li terni his, un an o them Egiptia i lubni was. 20 Un lakro dji nashas lengre pirnende palla, kai lat kote his, kolengri chantch jaake baro his har pash i murshkani esla un pash i grai. 21 Un joi kamas pale sawo wi-ladjedo koowa te krell har an ko tsiro, kai li terno his, har i Egiptarja lakre tchutchja an-tapran.
22 Doleske shun, Oholiba, hoi o baro Dewel, maro rai, tuke penell: Me mukau tire pirnen, kolenge tu o dumo sikral, ap tute pre te anell. Hake rigjatar perenn le pral tute, 23 kol mursha dran o foro Babilon un dran kol wawar forja an o them Babilonia, ninna kol mursha dran Pekod un Shoa un Koa, un khetne lentsa kolla dran o them Assur. halauter shukar terne mursha, pralstune un bare lurde, un kurepangre un raja, kai lauter ap pengre graja klissenn. 24 Un jon wenn pral tute pengre wurdjentsa o kurepaske, ninna kol wurdjentsa, hoi hidjrenn chapen un wawar koowa, un bud bud lurdentsa. Un jon wenn trul tute trujel, un hidjrenn bare un tikne shilte, un sasterne stadja. Lenge dau tut an i wasta, te denn le tut tiri phagi pal lengro tchatchepen.
25 Me hom jaake chojedo ap tumende, te mukap len tuha choljah trujel te djal. Tiro nak un tire kanda tchinenn le tuke tele. Un kolla, kai tutar djido atchenn, wenn o chareha mulo dino. Tire mursh tchawen un tire tchen lenn le tutar. Un kowa, hoi tutar pral atchell, well an i jag chatchedo. 26 Jon riwenn tuke tire koola win, un lenn tuke tire kutch gustria, werklia un kanengre krik.
27 Jaake krau me, te nai kress buder kek wi-ladjedo koowa, un nai lubreh buder gar trujel, har tu kowa kral fun ko tsiro, kai an o them Egiptia hals. Palla nashenn tire jaka buder gar kol murshenge dran Egiptia palla. O them Egiptia well tuke buder gar an o shero.
28 Kawa penell o baro Dewel, maro rai: Me dau tut an i wasta kolendar, kai lenge tiro dumo sikral, un ap kolende tele dikeh. 29 Kolla djan tchilatches tuha trujel, un lenn tuke halauter, hoi tuke khetne anal, tutar krik. Jon mukenn tut nanges tchiddo. Hakeno nai dikell, har nango hal, un kai djiwal har i lubni, un kral wi-ladjedo un djungelo koowa. 30 Kowa well pral tute doleske, kai lubral trujel kol murshentsa dran wawar themma, un mangal lengre chochene deblen an, un wal doleske pale-tchiddo.
31 Ap o drom tiri phenjatar djal tu, doleske dau tut ko emligo khoro an tiro wast, har late dom, te pijess les win har joi hunte pijas les win.
32 Kawa penell o baro Dewel, maro rai:
Tu hunte pijess ko emligo khoro win
har tiri pheen.
Kau khoro hi baro un buchlo.
Un bud djal dren.
Hakeneske wess sapaske.
33 Ko khoro, hoi tiri pheen Samaria pijas,
hi i khoro pherdi traash un khetne-phagepen.
Sawo khoro hunte pijess tu ninna win.
I darjatar nai weh buder gar tardo ap tire herja,
har te wals mato.
34 Kau khoro hunte pijess tu jaake win,
bis te tchi buder dren hi.
Palle deh les paash,
un kol kotjentsa lestar tchineh tiri tchutchja tele.
Kawa hi, hoi penau me, o baro Dewel, tiro rai.
35 Tu bistral man un sikral man o dumo. Doleske hidje kanna tiri doosh, hoi ap tute anal, har wi-ladjedo koowa kral un har i lubni djiwal. Kowa penell o baro Dewel, maro rai.
36 Un o baro Dewel penas ap mande: Tu, mensho, hunte rakress o tchatchepen win pral i Ohola un i Oholiba! Sike lenge hawo djungelo koowa jon kran! 37 Jon chochran man wawar murshentsa, un maran menshen. Pengre chochene deblentsa chochran le man. Un kolenge dan le pengre tchawen chapaske, – kol tchawen, kai ninna mire tchawe his! 38-39 Un kawa hi gar lauter, hoi le kran: Ap ko emligo diwes, har maran le pengre tchawen o chochene deblenge, wan le an miro kheer, un jaake kran le miro kheer pale-tchiddo. Un kol diwessa, kai mange hi, rikran le buder gar dren. Awa, sawo koowa hi, hoi kran le an miro kheer!
40 Ninna bitchran le bitchepangre pash wawar murshende, te wenn jon dran dur themma pash lende. Un, awa, jon wan! Un lenge thowan tumen, un kran tumare jaka shukar, un tchiwan sonakai ap tumende. 41 Un beshan tumen ap i raili beshepaskri. Un glan tumende his i chapaskri tardo, ap kolate latcho koowa his. Un koi pashel tchiwan tumer sungepaskro koowa un djet, hoi mange his. 42 Un trul tumende dan le gole i bachtjatar pral kol bud murshende, kai wan dran o mulo them. Un kolla tchiwan tumenge gustja trul tumare mussja, un rajengre stadja ap tumare sherja. 43 Un me penom mange: Kolla kai jaake bud wawar murshentsa sowan, un kolestar phuro un khino wan, krenn le dureder pengro lubjengro koowa? Awa, jon nai mukenn les gar un hi bachteles koi pashel. 44 Un jaake har mursha pash lubjende dren djan, jaake djan le pash i Ohola un pash i Oholiba, kol wi-ladjede djuwjende. 45 Doleske krenn tchatchepangre mursha pral lende o tchatchepen win, un denn len i phagi jaake har kol romjenge i phagi dino well, kai chochran pengre romen un maran menshen. Kal dui chochran pengro romes un ap lengre wasta hi rat.
46 Kawa penell o baro Dewel, maro rai: Anenn menshen khetne, kai perenn ap lende, un krenn len daar un randenn len win. 47 Un palle witsrenn le len barrentsa mulo, un denn len pengre charentsa an kotja, un denn lengre mursh tchawen un lengre tchen mulo, un chatchrenn lengre khera.
48 Un jaake krau te well buder kek wi-ladjedo koowa kerdo an o them. Jaake dau i tsele djuwjen trad, te krenn le gar sawo wi-ladjedo koowa har tumer dui phenja kran. 49 Un ko wi-ladjedo koowa, hoi kran, well ap tumende pale. Un tumer lenn tumari phagi koleske, kai mangan i chochene deblen an. Palle dikenn un haiwenn tumer, te hom me o baro Dewel, tumaro rai.