22
O foro Jerusalem hi pherdo rateskri doosh un wi-ladjedo koowa
1 Un o baro Dewel penas ap mande: 2 Tu mensho, rake o tchatchepen win! Awa, rake o tchatchepen win pral o foro, hoi hi pherde marepangre! Sike leste peskro tselo djungelo koowa, hoi lo kras! 3 Pen: Kawa penell o baro Dewel, maro rai: Tumer, kai djiwenn an o foro, maran bud menshen tumendar un kran tumenge chochene deblen, te wan pale-tchiddo o baro Debleske. Tumaro tsiro hi koi! 4 Ko rateha kolendar, kai maran, anan tumer doosh ap tumende. Un kol chochene deblen, hoi tumenge kran, kolentsa kran tumen pale-tchiddo. Doleske well ko diwes sik, kai lenn tumari phagi. Tumaro tsiro hi trujel. Doleske krau, te praassenn tumen i menshe dran wawar themma. Ap i tseli phub san le pral tumende. 5 Kolla, kai dur hi, un kolla kai gar dur tumendar djiwenn, san pral tumende. Tumaro foro well kharedo ‘pale-tchiddo foro’. Kek rikrell pes ap tchatchepaskre laba.
6 I pralstune pral Israel, kai djiwenn an tumaro foro, krenn har te wals len jaake bud penepaske, te nai marenn le menshen. 7 Kolla, kai an Jerusalem djiwenn, dikenn tele ap pengro dadeste un ap pengri date, un chochenn i wi-themarjen, kai pash lende djiwenn. Un kol djuwjen, kolengro rom meras, un kol tchawen, kolengro dad meras, kolen rikrenn le sorjah tele. 8 Kowa, hoi mange kutch hi, hi tumenge tchi moldo. Un an kol diwessa, hoi mange hi, budrenn tumer. 9 Mank tumende hi sawe menshe, kai rakrenn chochepen, te anenn le doosh ap wawarende, jaake te wenn kolla maredo. Wawar tumendar chan o mass sawe viechendar, hoi i chochene deblenge maredo wan, un krenn wi-ladjedo koowa mank tumende: 10 Ko jek sowell peskro dadeskri romjah, i wawar sowell i djuwjah, kolat i djuwjakro koowa hi, ninna te kamell li kowa gar. 11 Ko jek sowell i wawareskri romjah, un ko wawar sowell peskro tchaweskri romjah un krell lat jaake pale-tchiddo. Pale i wawar taprell sorjah peskri phenjat an, ko tchat peskro dadestar. 12 Hi sawe mank tumende, kai mukan pen te plaissrell, te marenn le jekesa. Kolen, kai sijaan pash tumende hi, kolendar lenn tumer budeder lowe pale, har patsan lenge. Tumer krenn tumen braweles ap i wawarende, kolen tumer chochenn un ap lende sorjah djan. Un man, o baro Debles, tumaro rajes, bistran tumer.
13 Me dau mire wasta khetne kol lowenge, hoi tumer chochepah khetne anan, un ko rateske kolendar, kai pash tumende maredo wan. 14 Tchatchepah, an kol diwessa, kai djau khatar tumende, atchenn tumare djia gar soreles, un tumer nai hadenn buder gar tumare wasta! Me, o baro Dewel, rakrom, un hoi penom, krau me ninna.
15 Me tradau tumen an wawar themma, mank wawar menshende. Un lau o tselo pale-tchiddo koowa dran tumaro foro win. 16 Un glan i jaka kol wawar menshendar hi o foro Jerusalem i praassedo foro doleske, hoi tumer kran. Un palle dikenn un haiwenn tumer, te hom me o baro Dewel.
O foro Jerusalem hi har i bob
17 Un o baro Dewel penas ap mande: 18 Tu, mensho, o kheer Israel was mange buder tchi moldo. I Israelitarja hi mange har koi tchik, hoi pral atchell an o bob, te was o rup an i jag djudjo kerdo. Jon hi har koi tchik dran saster, lolo saster, zinno un blaio, hoi pral atchell.
19 Doleske penell tumenge o baro Dewel, tumaro rai: Tumer halauter wan mange har koi tchik, hoi pral atchell an o bob. Doleske anau tumen halauter an o foro Jerusalem khetne. 20 Jaake har o rup khetne o sasteha un o blaio an o bob tchiddo well, un i jag koi tel kerdo well, te nashell kowa har pani, jaake anau me tumen ninna khetne an Jerusalem. Kau foro well tumenge har i bob, kai well miri tati choli ap tumende. 21 Awa, me anau tumen khetne, un mukau miri choli ap tumende soreles te well. Un an miri tati choli djal tumenge jaake, har te wans rup an i bob. 22 Jaake har o rup an o bob gar atchell hoi lo his, jaake djal tumenge, te well o foro Jerusalem har i bob tumenge. Un tumer dikenn un haiwenn palle, te hom me o baro Dewel, kai tchoras peskri choli pral tumende win.
23 Un o baro Dewel penas ap mande: 24 Tu, mensho, pen ap o them Israel: Tu hal jaake pale-tchiddo, te bitchrap buder kek brishin an ko tsiro, kai well miri choli ap tute. 25 Tire raja hi mank tute har lewe, kai denn gole, har dandrenn le viechen khetne. Jon marenn menshen, tchorenn penge brawlepen khetne, un krenn, te nashrenn bud romja an o them pengre romen.
26 Tire rashaja rissrenn mire laba trujel. Un krenn kowa pale-tchiddo, hoi mange hi. Kowa, hoi mange dino was, hi lenge gar budeder moldo har hako wawar koowa. I wawar menshenge sikrenn le gar, hoi pale-tchiddo un hoi gar pale-tchiddo hi. Un jon pandenn pengre jaka, te wenn o Debleskre diwessa gar dren rikedo. Jaake krenn le, te wap me buder gar sharedo.
27 Tire pralstune hi har diwje djukle, kai marenn, un hi boklo pal rat. Jon marenn menshen, te lenn le lengro koowa penge. 28 Un o Debleskre rakepangre tchakrenn kolengro tselo tchilatchepen latche labentsa. Jon rakrenn pral tchomone, hoi sikroms lenge. Un me sikrom len tchi. Un jon penenn chochepen glan-wi, un penenn: “Kawa penell o baro Dewel, maro rai”, kai me lenge tchi penom.
29 I menshe an Israel chochenn un randenn wawaren. Jon rikrenn kolen tele, kai tchorwelo hi, un kolen gar doha djipaske hi. Ninna i wi-themarjen, kai mank lende djiwenn, rikrenn le sorjah tele, un denn len gar pengro tchatchepen.
30 Un me rodom i murshes mank lende, kai krals i massuri trul o foro pale newes. Rodom jekes, kai tchiwas pes pre glan mande kote, kai i barra win phagedo wan, un rakrals mishto kol menshenge, te hunte marap len gar. Un me hatsom kekes. 31 Doleske tchorau miri choli win pral lende. Miri tati choli well pral lende har i jag, un jon merenn. Jaake anau lengro tchilatchepen pale ap lengro shero. Kowa penell o baro Dewel, maro rai.