O Debleskro rakepaskro,
o Daniel
1
O Daniel un leskre mala an o them Babilonia
1 An ko tsiro, har o Jojakim an o triinto bersh o baro rai pral o them Juda his, was o baro rai pral o them Babilonia – leskro lab his Nebukadnezar – glan o foro Jerusalem, un tchiwas pes peskre lurdentsa trul o foro. 2 Un o baro Dewel, maro rai, das o Jojakimes, ko baro rajes pral o them Juda, an o wast o baro rajestar dran o them Babilonia. Ninna ko shukar koowa, hoi an o Debleskro kheer his, kolestar peras an leskre wasta. Un job anas kowa an o them Shinar, an o kheer leskro deblestar. Un tchiwas les pash ko brawlepen leskro deblestar pashel. 3 Un o baro rai penas o pralstuneske pral peskro kheer, – leskro lab his Ashpenas – te rodell lo dran i Israelitarjen terne murshen win, kai wenn dran rajengre un an-dikle familje. 4 “Jon hunte wenn sasto un shukar, gosewo un siklo”, penas lo. “Ninna hunte haiwenn le pen an halauter mishto win, un nai haiwenn sik, jaake te nai budrenn le mange an miro kheer. Un lenge well pashel anlo, har i Kaldearja rakrenn un pengro rakepen tchinenn.”
5 Un o baro rai penas, te lenn le o chapen, hoi job ninna chal, un i mool, hoi job pijell. Un triin bersha hunte well lende lauter siklo un pashel anlo. Un palle budrenn le leske.
6 Mank kol wi-rodede terne murshende dran o them Juda his: O Daniel, o Hananja, o Mishael un o Asarja. 7 Un o pralstuno pral o rajeskro kheer das hakenes lendar i wawar lab. O Daniel kharas kanna Beltsazar, un o Hananja Shadrach, un o Mishael Meshach, un o Asarja Abed-Nego.
8 O Daniel las peske an peskro dji glan, te chal lo gar o baro rajeskro chapen un pijell gar leskri moljatar, te krell lo pes gar pale-tchiddo. Un job mangas o pralstunestar pral o rajeskro kheer, te hunte krell lo pes gar pale-tchiddo. 9 Un o Dewel kras, te was o pralstuno pral o rajeskro kheer latches un kamles ap o Danieleste. 10 Un kowa penas ap o Daniel: “O baro rai kokres penas, hoi te chan un pijenn tumer. Me darau lestar, te dikell lo, te dikenn tumer gar jaake mishto win har kol wawar terne mursha. Te wals kowa jaake, wals mange tumenge o shero tele dino.”
11 Koi his i mursh, koles o pralstuno pral o rajeskro kheer pral lende tchiwas, te dell lo jak ap o Daniel, ap o Hananja un o Mishael un o Asarja. Ap koleste penas o Daniel: 12 “Hoi wals, te dess tu men, tire budepangren, deesh diwessa senlepen te chal un pani te pijell? 13 Un palle nai dikals tu, har mer wi-dikah, un har kol terne mursha win dikenn, kai chan o rajeskro chapen. Un pal kowa, hoi tu dikal, kre tu mentsa dureder.”
14 Un job shunas ap lende un kras deesh diwessa lentsa jaake har o Daniel penas. 15 Un pal kol deesh diwessa sikras pes, te dikan jon feteder un sorleder win har kol tsele terne mursha, kai o rajeskro chapastar chan.
16 Kote las ko mursh, kai ap lende jak das, ko chapen un koi mool krik, hoi lenge kerdo was, un das len senlepen te chal.
17 Un kol star terne murshen das o Dewel i baro goswepen, te haiwan le lila an bud rakepen te drawerell. Ninna haiwan le pen win an bud koowa. Un o Daniel haiwas ninna te penell, hoi sunja un dikepena kamenn te penell.
18 Un har ko tsiro trujel his, hoi o baro rai lende das, te wenn le siklo, anas len o pralstuno, o Ashpenas, glan o baro rajeste Nebukadnezar. 19 Un o baro rai rakras lentsa! Un mank kol tsele mursha was kek hatslo, koon jaake his har o Daniel un o Hananja un o Mishael un o Asarja. Un jon wan pralstune an o baro rajeskro kheer. 20 Un an hako koowa, hoi o baro rai lendar putchas, his jon deesh kope gosweder un haiwan budeder har i tsele durkepangre un drawepangre an i tsele themma, kai o Nebukadnezar baro rai his. 21 Un o Daniel atchas pralstuno bis an o ersto bersh, kai o Kirus baro rai his.