24
O Jerusalem hi har i piri ap i jag
1 Un o baro Dewel rakras mantsa an o enjato bersh, an o deshto tchon, ap o deshto diwes an ko tchon, un penas: 2 Tu mensho, tchin tuke kau diwes an i liil, te well gar bistedo, hawo diwes kowa hi! Kau diwes tchiwell o baro rai dran o them Babilonia peskre lurden trul o foro Jerusalem trujel, te lenn le les dren. 3 Pen mire menshenge, kai mukenn pen tchi mandar te penell, sawe laba, hoi sikrenn lenge, har kowa lenge wella! Pen lenge: Kawa penell o baro Dewel, maro rai:
Tchip i piri pral i jag,
un tchip ninna pani dren!
4-5 Le o mass o feteder bakrestar!
Un tchip i latche kotja an kai piri,
i phika un i herja,
un latche kokale, te well i piri pherdo!
Le kasht un tchip les tel i piri!
Kre, te kerell o mass mishto!
Muk ninna i kokale latches win te kerell!
6 Kawa penell o baro Dewel, maro rai: Hawi bibacht well ap o foro, hoi jaake bud rateskri doosh ap peste las! Ko foro hi har i piri, hoi gar djudjo kerdo was, un kolakro tchik gar tele djal. Le jek kotar mass pal o wawar win dran late! Muk tchi an i piri dren! 7 Ko rat kolendar, kolen i menshe an o foro maran, hi gomme mashkral lende. Ap i baro bar nashas ko rat, un gar ap i phub, te nai tchakrals jek les tchikeha tele. 8 Me mukom ko rat ap ko baro bar, kai well lo diklo, te mukap miri choli soreles te well pral lende, te dap len pale, hoi le kran.
9 Kawa hi, hoi o baro Dewel, maro rai, penell: Djungeles djal tuke, tu foro, kai lal rateskri doosh ap tute! Ninna me tchiwau bud kasht khetne i jagake.
10 An bud kasht khetne! Kre i jag, un kere o mass mishto! Muk i summi jaake rah te kerell, bis te buder tchi pral hi, un i kokale tele chatchenn! 11 Un i piri, te hi buder tchi an late dren, palle tchip lat ap ko tele chatchedo kasht, hoi gomme lolo hi, te well li tato, un lakro saster lolo o tatepastar, te djal ko tselo tchik tele, hoi les tchiklo kras!
12 Tchitcheske his koi tseli budi! Ninna te was koi piri an i jag jaake tato, djas lakri tchik gar tele!
13 Jerusalem, kowa, hoi kras tut pale-tchiddo, hi tiro wi-ladjedo koowa. Har kamom me ko pale-tchiddo koowa tutar krik te lell, kamal te atchell har hals. Doleske atcheh pale-tchiddo, jaake rah me miri choli ap tute win mukom!
14 Me, o baro Dewel penom kowa, un me krau les ninna jaake. Kau tsiro was, te krap kowa. Me rikrau man gar pale, te dap tumen i phagi, tumer khaitenn man gar. Me krau miro dji gar pre tumenge. Tumer lenn tumari phagi pal kowa har djiwan un hoi kran. Kowa penell o baro Dewel, maro rai.
I romni o murshestar Hesekijel merell
15 Un o baro Dewel penas ap mande: 16 Tu, mensho, djiness, ap jek kopo lau tuke ko menshes, kai tuke o kamleder hi. Tu kress kek gole un rowess gar! Kek swa wenn dran tire jaka. 17 Tchorchanes nai leh phares ducho. Ma rob i bari goljah har jek pral jekeste rowell, kai meras! Rike tiro dikloa trul tiro shero, un ma rib tire kircha win! Ma tchake tiri tchor tele! Un ma cha ko maro, hoi kolenge anlo well, kai rowenn pral i mensheste, kai meras.
18 An i tsalla rakrom ap i menshende, un ap i rat meras miri romni. Un o wawar diwes krom jaake, har o Dewel mange penas. 19 Kote putchan i menshe mandar: “Hoske kreh tu kowa? Hoi kamell kowa menge penell?”
20 Me penom ap lende: O baro Dewel rakras mantsa un penas: Pen ap o kheer Israel: 21 Kawa penell o baro Dewel, maro rai: Djinau, tumenge hi miro kheer o kamleder koowa. Un tumaro dji nashell pal leste. Tumer han pre-phurdo un patsenn, kolenge, kai kote hi, nai djal kek tchilatchepen. Tchatchepah, me dau miro kheer kolenge an o wast, kai krenn les pale-tchiddo. Un tumare mursh tchawe un tcha, kolen tumer kote an Jerusalem pale mukan, kolla wenn o chareha mulo dino.
22 Palle krenn tumer har me, o Hesekijel, krom: Tumare tchora tchakrenn gar tele, un tumer chan kek maro, har kolla chan, kai pral i muleste rowenn. 23 Tumare dikle mukenn trul tumare sherja un kircha ap tumare pire. Tumer denn gar gole un rowenn gar. Tumer perenn an tumende khetne, jaake baro hi i doosh ap tumende. Un mank tumende lenn tumer phares ducho. 24 O Hesekijel hi i sikepen tumenge. Jaake har job kras, krenn tumer palle ninna. Ap ko diwes, kai well kowa, djinenn un haiwenn tumer, te hom me o baro Dewel, tumaro rai.
25 Un tu mensho, djiness, me krau ko sorelo kheer paash, kolestar jon patsenn, te well i menshenge kote kek tchilatchepen, ko railo kheer, pral koleste jon jaake bachtelo hi. Un hoi jon budeder kamenna har halauter, pal koleste lengre djia nashenn, lengre mursh tchawen un lengre tchen, lau lendar krik. 26 Ap ko diwes, kai krau kowa, well jek pash tute, kai nai nashas peske, te penell lo kowa tuke. 27 Ap ko diwes well tiro mui pre kerdo, un tu nai rakreh pale. Un jaake wess tu lenge i sikepen. Palle dikenn un haiwenn le, te hom me o baro Dewel.