61
O railo tsiro, hoi wella
1 O baro Debleskro ducho hi ap mande.
O baro Dewel rodas man win un bitchras man,
te penap i tchorwelenge o latcho lab.
te krap i phagede djia sasto,
te penap i pandlen, te hi le buder gar pandlo,
un penap i stilden, te nai djan le win dran o stilepen.
2 Me wom bitchedo, te dap win gole, te was ko bersh, kai sikrell o baro Dewel peskro latchepen ap peskre menshende.
Ninna was ko diwes, kai dell maro Dewel hakenes ko tchilatchepen pale, hoi job ap o them Juda kras.
Job bitchras man, te khossap i swa tele kolenge, kai kanna rowenn.
3 Un kolla an o foro Zion, kolengre djia rowenn,
hunte wenn buder gar beshdo an i jagakri tchik un rido an gone.
Na-a, me dau len werklia, te krenn le pen shukar,
un sungepaskro djet.
Lengre djia te giwenn un atchenn buder gar phagedo.
Un jon wenn kharedo: ‘Bare ruka, hoi anenn sharepen o Debleske’,
un ‘Ruka, hoi o baro Dewel peske an i phub tchiwas’,
te well leskro railepen diklo.
4 Kol phure forja, hoi jaake rah tele phagedo un paash dino koi tchiddo hi,
tchiwenn jon pale pre.
Kal forja, kai bud bersha buder kek djiwell,
wenn pale newes kerdo.
5 Wi-themarja wenna un denn jak ap tumare bakre,
un budrenn tumenge ap i hachetikri phub un ap o drakengro them.
6 Tumer wenn rashaja o baro Deblestar,
un wenn kharedo ‘maro Debleskre budepangre’.
Un ko brawlepen dran wawar themma,
koleha mukenn les tumer tumenge mishto te djal,
un koleha sharenn tumen.
7 Tumer hidjran bari ladj un praassepen,
doleske lenn tumer kanna i baro them un i bacht, hoi atchella hako tsireske.
8 Me, o baro Dewel kamau o tchatchepen,
un hom chojedo pral o tchorepen un o tchilatchepen.
Un tchatchepah, me dau latcho koowa i menshende an Juda ko tselo tchilatchepaske, hoi ap lende was.
Un me krau lentsa win, te atchas mer mala hako tsiro.
Koi pre dau miro tchatcho wast.
9 Lengre tchawe, kai pal lende wenna, hi prindjedo un an-diklo pash i menshende an hake themma.
Un koon len dikell, haiwell: Kolla hi i menshe, ap kolende o baro Dewel peskri bacht tchiwas.
I sharepaskri gili
10 Me hom bachtelo pral o baro Debleste,
un miro dji giwell miro Debleske.
Job hi trul mende har i ripen, te well kek tchilatchepen ap mende,
un tchiwas tchatchepen ap mende har i plaashka,
jaake har hidjrell i bijabeskro i shukar stadi,
un leskri pirni shukar werklia un gustria.
11 Jaake har mukell i phub o senlepen pre te djal,
un bares te well,
jaake mukell o baro Dewel, maro rai, o tchatchepen pre te djal,
un maro sharepen bares te well pash i menshende an i tsele themma.