O Debleskro rakepaskro,
o Jeremia
1
1 Kalla hi kol laba, hoi o Jeremia rakras. Leskro dad his o Hilkija. Kowa his jek kol rashajendar an o gab Anatot an o them Benjamin. 2 O baro Dewel rakras ap o Jeremia, har o Josia, koleskro dad o Amon his, an o 13 (deesh-te-triinto) bersh o baro rai pral o them Juda his. 3 An ko tsiro pal kowa, har koleskro tchawo, o Jojakim, o baro rai his, rakras o baro Dewel pale ap o Jeremia bis ko tsiro was, kai i menshe dran Juda pandles an i wawar them anlo wan. Kowa his an o pantchto tchon an ko deesh-te-jekto bersh, har o Zedekja, koleskro dad o Josia his, o baro rai pral Juda his.
O Dewel penell, te well o Jeremia leskro rakepaskro
4 Un o baro Dewel penas ap mande: 5 Me prindjrom tut, glan te krom tut an tiri dakro per, un rodom tut win, glan te wal boldo, te wess miro rakepaskro i menshenge dran i tsele themma.
6 Un me penom: Baro Dewel, miro rai, me hom gar mishto doha te penap tiro lab. Me hom gar phuro doha.
7 O baro Dewel penas ap mande: Pen gar: Me hom gar phuro doha! Tu hunte djas, kai me tut bitchrau. Un pen halauter, hoi me tuke penau. 8 Ma traash lendar. Me hom pash tute, un rikrau mire wasta pral tute. Ko penau me, o baro Dewel.
9 Un o baro Dewel tchiwas peskro wast ap miro mui, un penas ap mande: Dik, me tchiwau mire laba an tiro mui. 10 Dik kai! Me dau tut kai diwes penepaske pral bud menshende un themma, te tradess len win, phagess len khetne, dess len tele un kress len paash, un mukess len pale bares te well, un kress len soreles.
11 Un o baro Dewel penas ap mande: “Jeremia, hoi dikeh tu?”
“Dikau i kasht i mandeltikro rukestar,” penom me.
12 Un o baro Dewel penas ap mande: “Tu dikal mishto. Me dau garda ap miro lab, te krap kowa.”
13 Un o baro Dewel penas o duito kopo ap mande: “Hoi dikeh tu?”
Penom: “Me dikau i piri pherdo pani, hoi kerell pral kotar, kai norden hi.”
14 Un o baro Dewel penas ap mande: Kotar, kai norden hi, well i bibacht pral halauterende, kai djiwenn an kau them. 15 Shun mishto: Me dau gole i tsele menshen an kol themma, hoi an o norden tchiddo hi, te wenn jon, penell o baro Dewel. Lengre raja tchiwenn pengre beshepangre glan kol wudja o forestar Jerusalem, un trul leskre massurja un trul kol tsele forja an o them Juda. 16 Un me dau i menshen an Juda i phagi lengro tchilatchepaske, hoi jon kran. Jon djan krik mandar un anan viechen wawar deblenge un mangan kol figuren an, hoi le pengre wastentsa kran.
17 Ab soreles! Un kre tut ap o drom! Un pen lenge halauter, hoi me tuke penau! Ma traash lendar, te krap me gar, te trashess tu glan lende! 18 Kau diwes dau me tut i soor, te wess jaake sorelo har i sorelo foro, i sasterno ruk, un i massuri dran lolo saster. Hakeno an kau them well chojedo ap tute: i bare raja un pralstune pral o them Juda, ninna i rashaja un i menshe an kau them. 19 Ninna te tchingrenn le tuha, nai krenn le tuke tchi. Me hom pash tute, te lap tut dran lengre wasta win. Kowa penau me, o baro Dewel.