66
O baro Dewel hi gar har i chochene debla
1 O baro Dewel penell: O bolepen hi miri raili beshepaskri,
un i phub i tikno banko, kai me mire herja pre tchiwau.
Hawo kheer kamenn tumer mange pre te tchiwell,
An hawo kheer kamenn tumer, te djiwap?
2 Me, o baro Dewel, krom miro wasteha kowa lauter, hoi koi hi.
Un me dikau kamles ap koleste, kai hi tele rikedo un phagedo an peskro dji,
un kai darell glan miro lab.
3 Kowa, kai mange i gurum marell, marell ninna i menshes i chocheno debleske.
Kowa, kai mange i terno bakro temerl dell,
marell ninna i djukles i chocheno debleske.
Kowa, kai mange chapen glan anell,
anell ninna balengro rat i chocheno debleske.
Kowa, kai mange sungepaskro koowa chatchrell,
parkrell pes ninna pash i chocheno debleste.
Jon djan pengre dromma jaake har jon les kamenna.
Un shukar hi an lengre jaka,
hoi an mire jaka djungeles hi.
4 Doleske hi mange shukar, te anap len an i bibacht.
Un anau kowa pral lende, glan leste jon jaake darenna.
Me dom ap lende gole, un kek shunas un kek rakras pale.
Me dom len trad, un kek das pre jak.
Awa, jon kran kowa, hoi an mire jaka tchilatcho hi,
un lenge his shukar, te krenn le kowa, hoi an mire jaka djungelo hi.
5 Shunenn, hoi o baro Dewel penell,
tumer, kai glan leskro lab darenna.
Tumer rikrenn pash mande,
doleske choirenn pen tumare phrala pral tumende,
un tchiwenn tumen pale, un praassenn tumen un penenn:
Mu sikrell o baro Dewel peskro barepen un peskri soor,
te dikas mer, har job tumen bachteles krell!
Kolla hunte ladjenn pen palle.
O baro Dewel well ap i rig o foreske Jerusalem
6 Shunenn i diwji gole dran o foro,
i kurepaskri gole dran o Debleskro kheer!
Shunenn, o baro Dewel rakrell i phagi win pral kolende, kai choiran les!
7 Miro foro hi har i djuwel, kai las i ternepen kek bare dukentsa.
8 Koon shunas sau koowa?
Koon dikas sau koowa?
Was i them ap jek diwes boldo?
Wan lengre menshe ap jek diwes ap i phub?
Jaake sik har i Zion duka las, anas li peskre tchawen ap i phub.
9 Me mukau gar jaake dur te well, te kamell o ternepen win te well,
un palle mukau les gar, penell o baro Dewel.
10 Awenn bachteles o foreha Jerusalem,
un giwenn un khelenn leske,
tumer lauter, kai les o djijestar kamenn.
Awenn bachteles leha,
tumer lauter, kai pral leste rowan.
11 Kanna nai wenn tumer tchalo leskro brawlepastar,
jaake har pijell pes i ternepen tchalo pash peskri date,
un pijell bachteles jaake bud thud har nai pijell lo.
12 Kawa penell o baro Dewel ap o foro Jerusalem:
Dik, me mukau bud latchepen pral tute te well har i lengsto pani.
Un o brawlepen dran wawar themma nashell an tute har i diwjo pani.
Me dau garda ap tute har i dai ap peskro ternepen,
hoi hidjrell li ap i wasta,
un tchiwell les ap peskre herja un khelell leha.
13 Awa, jaake har i dai peskro tchaweske i swa tele khossell,
jaake krau me les tumentsa,
un khossau tumare swa tele an o foro Jerusalem.
14 Tumer dikenn kowa, un tumare djia giwenna.
Un tumer lenn newi soor, jaake har o senlepen, te dell brishin.
O baro Dewel sikrell peskri soor un peskro railepen i tsele menshende ap i phub
Un i menshe dikenn, te hi o baro Debleskri soor pash peskre budepangre,
un leskri choli ap kolende, kai shunenn gar ap leste.
15 Dik, o baro Dewel well an i jag,
un leskre wurdja hi har i sorelo phurdepen.
Job dell len lengro tchilatchepen pale i bari choljah,
un leskro tchingepen hi har jag, kai chatchrell.
16 I jagah un peskro chareha krell o baro Dewel o tchatchepen win pral i tsele menshende,
un bud lendar wenn jaake maredo.
17 Kolla hi sawe, kai krenn pen djudjo,
te mangenn le i chocheno debles an,
hoi hi tardo mashkral ap i shukar platsa.
Kolla hi ninna sawe, kai chan ko mass i balendar un i kermuse un wawar pale-tchidde viechendar.
Kolla lauter wenn khetne trujel, penell o baro Dewel.
18 Me djinau kowa, hoi jon kran,
un kowa, hoi an lengre sherja glan djas.
Un me wau, te lap i menshen khetne dran i tsele themma un dran hako rakepen.
Un jon wenna un dikenn miro railepen.
19 Un me tchiwau i sikepen pre mank lende.
Un kolendar, kai djides atchan, bitchrau me pash i menshende an themma Tarsis, Put un Lud, Meshech, Rosh, Tubal, Jawan
un pash kolende dur wergel o baro pani,
kai mandar gomme tchi shunan,
un miro railepen gomme gar dikan.
Un mire bitchepangre penenn kol menshenge, har railo me hom.
20 Un kolla anenn tumare phralen dran i tsele themma pale,
te denn le len o baro Debleske.
Ap miri berga an Jerusalem anenn le len ap graja, un ap wurdja, hoi pre hi, un an wurdja, hoi pandlo hi,
ap maultikre burikea un ninna ap khamele, penell o baro Dewel.
Jon anenn len jaake har i Israelitarja anan djob an djudje tchare an o baro Debleskro kheer.
21 Un ninna kolendar lau mange,
te wenn le mange rashaja un Levitarja, penell o baro Dewel.
22 Tumare tchawe un tumaro lab atchenn glan mande,
jaake rah har o newo bolepen un i newi phub, hoi me krau, glan mande atchenna, penell o baro Dewel.
23 Un hako tchon, ap ko diwes, kai well o newo tchon diklo,
un hako kurkob ap o Debleskro diwes,
wenna menshe dran hake themma glan mande,
te witsrenn le pen glan mande tele, penell o baro Dewel.
24 Un jon djan win, te dikenn le penge kol mule menshen an,
kai mantsa phagan.
Kolengro kirmo merell gar,
un lengri jag djal gar win.
Un jon hi tchadepaske halauterenge, kai dikenn le.