27
1 Ap ko diwes lell o baro Dewel peskro baro sorelo charo, hoi jaake mishto tchinell, un dell o sapes mulo, hoi kharell Leviatan, awa, ko baro panjeskro sap, hoi ap o naashepen hi un mukell pes gar te taprell.
I newi gili pral o Debleskri moljakro them
2 Ap ko diwes penell o baro Dewel tumenge:
Man hi i shukar drakengro them;
giwenn leske i gili!
3 Me, o baro Dewel, dau ap leste jak,
un dau les pale te pale pani.
Kek tsiro mukau les dran miro jak,
jaake te nai krell les kek tchomone.
4 Me hom buder gar chojedo ap leste.
Te hatsoms subjengre burra un subjengro senlepen dren,
djoms ap lende un chatchroms len halauter pre.
5 Jaake djal lauterenge, kai gar pash mande wenn, te rikrap mire wasta pral lende.
Mu wenn le pash mande, te las kowa krik, hoi mank mende tardo hi.
Awa, mu wenn le, te was mer mala.
O Israeleskri doosh well krik lino
6 Ko tsiro wella, kai well o Jakob pale sorelo.
Awa, o Israel well har i ruk, koles sorele draba hi,
un senelo well, un ap koleste blume pre djan,
un bud rukengre win anenn. Kolendar well i tseli phub pherdo.
7 Das o baro Dewel i Israelitarjen jaake har lo kolen das, kai len dan?
Maras job jaake bud lendar, har maras lo kolendar, kai len maran?
8 Na-a, job das len lengri phagi, har job len pestar krik bitchras.
Dran lengro them wan le krik tradedo
har i sorelo ducheha, hoi kotar phurdell, kai o kham pre djal.
9 Jaake well o Israelengri doosh krik lino.
Un ap kowa sikrell pes, te hi lengri doosh krik lino:
Te denn le i pre-tchidde barra jaake khetne, kai mangan le i wawar deblen an,
te atchell tchi har tchik.
Un te mukenn le kek figure tardo,
hoi sikrenn i debletsa Ashera,
witar kek boba, kai lake sungepaskro koowa chatchedo was.
10 I sorelo foro hi muklo.
Kek djiwell buder an i shukar khera.
O foro hi har i diwjo muklo them,
kai i grumja chan un pen tele tchiwenn, un o senlepen ap i burra chan.
11 Un lengre kashta wenn truk un phagenn tele.
Un djuwja wenn un lenn len, te krenn le i jag.
Kal menshe haiwan tchi.
Doleske well koles, kai len kras, kek dji lenge,
un hi lenge gar latcho.
I Israelitarja wenn pale pale anlo an pengro them
12 I tsiro wella, kai lell o baro Dewel peskre menshen khetne dran o tselo them mank o pani Eufrat un o them Egiptia. Job rodell len win har jek o tikno djob win rodell dran o phuss, jek pal o wawar. 13 Un ap ko diwes well an i bari phurdepaskri phurdedo. Un i Israelitarja, kai his nashedo an o them Assur, un kai his win tradedo an o them Egiptia, kolla lauter wenna un mangenn o baro Debles an ap o Debleskri berga an o foro Jerusalem.