26
O Debleskre menshe giwenn pengro Debleske
1 Ap ko diwes giwenn le kai gili an o them Juda:
Men hi i sorelo foro.
O Dewel tchiwas sorele massurja trul mende,
te krell kek menge tchilatchepen.
2 Krenn o foreskre bare wudja pre,
te djan kolla dren, kai an o tchatchepen tardo hi,
un rikrenn ap pengro Debleste.
3 Baro Dewel, tu rikreh tire wasta pral kolende,
kai mukenn pen gar tutar krik te tserdell,
un deh len shukapen an o dji.
Ap tute rikrenn le pen.
4 Doleske, rikrenn tumen ap o baro Debleste hako tsiro,
O baro Dewel, maro rai, hi har i baro sorelo bar,
pash leste nai khatrah men hako tsireske.
5 I pre-phurden witsrell lo ap i phub,
Lengro foro phagell lo tele,
bis te hi lo tchiddo an i tchik.
6 Khetne stakedo well ko foro
kolendar, kai tchorwelo un tikno hi.
7 Tu kreh kolenge, kai o tchatchepen krenn, o drom,
un leh krik, hoi lenge an o drom tchiddo hi.
8 Baro Dewel, mer dikah ap tute, te peness tu o tchatchepen win.
Lauter an mende rodell tut, un kamell, te well tiro lab sharedo.
9 Ratsjake djal miro dji tuke palla,
o ducho an mande rodell tut taissarlake.
Te kreh tu o tchatchepen win ap i phub,
palle dikenn lauter, kai ap i phub djiwenn, hoi tchatchepen hi.
10 Te kreh latchepen i tchilatchenge, dikenn jon gar, hoi tchatchepen hi.
Ninna an o them, kai djan halauter pengre dromma pal o tchatchepen,
djan i tchilatche dureder ap pengre bange dromma,
un dikenn gar tiro barepen, baro Dewel.
11 Baro Dewel, tiro wast hadal dur pre, te dess len trad.
Un jon kamenn gar te dikell.
Muk len dren te dikell, hawo kamlepen tut tire menshenge hi, te ladjenn le pen.
Chatche len pre an tiri jagakri choli,
kolen kai kamenn tut gar.
12 Baro Dewel, le o kurepen krik, te djal menge mishto!
Lauter hoi kram, kral tu menge.
13 Baro Dewel, maro rai, pral mende his gomme wawar i raja.
Tut kokres sharah mer.
14 I mule wenn buder gar djido,
un stenn buder gar pre.
Kolen, kai pral mende i raja his,
dal tu lengri phagi: Jon hi buder gar koi.
Un i menshe bistran len.
15 Baro Dewel, tu mukal tire menshen bud te well,
mer wam i bari natsjona.
Un maro them kral bareder un buchleder.
Jaake sikral tiro barepen un tiri soor.
16 Baro Dewel, an o pharo tsiro rodan tire menshe tut.
Har dal len i phagi, dan le darenes ap tute gole.
17 Jon dan gole glan tute, baro Dewel,
har i djuwel, kai lell i ternepen
un dell gole i dukatar.
18 Har sawi djuwel hams an bari duk.
Mare duka his tchitcheske un anan menge tchi.
Maro them nai lam gar win dran i wasta i tchilatchendar.
Mer wam gar i sorleder pral lende.
19 Baro Dewel, muk tire mulen djides te well!
Muk len pre te stell!
Tumer, kai wan paskedo, stenn pre dran o sopen un denn gole i bachtjatar!
Tu, baro Dewel, hal har brishin, hoi dell djipen ap i phub.
Doleske dell i phub i mulen pale win.
20 Tumer, mire menshe, djan an tumare khera!
Pandenn i wudja pal tumende!
Khatrenn tumen i tikno tsiro, bis te i choli trujel hi.
21 O baro Dewel well dran peskro kheer win,
te anell lo o tchilatchepen pale ap i sherja kolendar, kai o tchilatchepen kran.
Palle well o rat kolendar diklo, kai maredo wan.
Un i phub khatrell len buder gar.