16
O Ahas krell o baro Debleskro kheer pale-tchiddo
1 Har o Pekach, koleskro dad o Remalja his, an o 17. (deesh-te-eftato) bersh baro rai pral Israel his, was o Ahas o baro rai pral o them Juda. Leskro dad his o Jotam. 2 Biish bersha phuro hi o Ahas, har lo baro rai was; un 16 (deesh-te-shob) bersha his lo baro rai, un djiwas an ko tsiro an o foro Jerusalem. Leskro phuro dad, o David kras, hoi glan peskro baro Debleskre jaka mishto hi. Kowa kras o Ahab gar. 3 Na-a, job djas ap kol dromma, kai kol bare raja dran o them Israel ninna djan. Ninna mukas lo peskro tchawes an i jag te chatchrell, jaake har kowa kol menshe kran, kai o baro Debles gar prindjrenn un sawo djungelo koowa krenn. Kolen tradas o baro Dewel glan i Israelitarja dran o them win, te nai djiwenn i Israelitarja koi dren. 4 Un job chatchras viechen un sungepaskro koowa i chochene deblenge ap kol mulne platsea un tel hako senelo ruk.
5 An ko tsiro djas o Rezin, ko baro rai dran o them Syria, un o Pekach, koleskro dad o Remalja his, ko baro rai dran o them Israel, pral an o them Juda, te kurenn le pen o foreha Jerusalem. Un jon tchiwan pengre kurepangre trul o foro Jerusalem. Jon nai lan ko foro gar dren.
6 An ko tsiro anas o Rezin, ko baro rai pral o them Syria, ko fores Elat pale pash o them Edom, un tradas i menshen dran Juda dran o foro Elat win. Pal kowa wan i Edomarja un djiwan pale an Elat. Kote hi le ninna kau diwes.
7 Un o Ahas bitchras peskre bitchepangre pash o Tiglat-Pileser, ko baro rajeste pral o them Assur, un mukas leske te penell: “Me hom tiro budepaskro un tiro tchawo. Ab pre un le man kate win dran i wasta kol bare rajendar pral i themma Syria un Israel. Kolla djan ap mande pre!”
8 Un o Ahas las ko rup un ko sonakai, hoi lo an o baro Debleskro kheer hatsas, un hoi lo an peskro rajeskro kheer hatsas, un bitchras halauter o baro rajeske pral o them Assur, te lell lo les dran leskro wast kamles pash peste. 9 Un o baro rai pral o them Assur shunas ap leste un djas pral pash o foro Damaskus un las les dren. Un mukas kol menshen, kai kote djiwan, pandles krik te anell an o foro Kir, un maras o baro rajes Rezin.
10 Un o baro rai Ahas djas an o foro Damaskus, te dikell lo kote o baro rajes dran o them Assur, o Tiglat-Pileser. Un har lo koi sasterni chatchepaskri dikas, kai an o foro Damaskus tardo hi, kote bitchras o baro rai Ahas peskre bitchepangre pash o rashai Urija un mukas leske te sikrell, har koi chatchepaskri win dikell un har baro koja hi un har li kerdo was.
11 Un o rashai Urija kras sawi chatchepaskri har les kol bitchepangre sikran, kolen o baro rai Ahas dran Damaskus pash leste bitchras. Un koi chatchepaskri his kerdo, har o baro rai Ahas dran o foro Damaskus pale was. 12 Un har lo pale was, un koi chatchepaskri dikas, djas lo koi pral, 13 un chatchras kote marede viechen un chapen, un tchoras mool koi win un witsras ko rat koi pre kol marede viechendar, hoi chan le khetne. 14 Un koi chatchepaskri dran lolo saster, kai o baro Debleske vieche chatchedo wan, koi chatchepaskri mukas lo krik te tchiwell, te well li gar mashkral koi newi chatchepaskri un o baro Debleskro kheer tardo, un tchiwas les serwes pash koi newi chatchepaskri.
15 Un o baro rai Ahas mukas o rashajeske Urija te penell: “Ap koi newi bari chatchepaskri chatche kol viechen, hoi wenn taissarlake chatchedo, un ko chapen, hoi well rati chatchedo, ninna kol viechen un chapen, hoi anell o baro rai, un kol tsele viechen un ko chapen un koi mool, hoi anenn i menshe. Un ko tselo rat i viechendar, kolendar, kai wenn chatchedo un kolendar, kai wenn chalo, ko rat witse ap koi newi chatchepaskri. Koi chatchepaskri dran lolo saster lau mange, te rodap an i viechengre buke, hoi te krap.”
16 Un o rashai Urija kras halauter, hoi leske o baro rai Ahas penas.
17 O baro rai Ahas phagas kol sasterne rigja tele kol tikne wurdjendar, kai i pirja pre tardo his, un las kol pirja tele. Un ko thopaskro tcharo, hoi ap sasterne grumjende tardo his, las lo tele, un tchiwas les ap i barrengri phub. 18 Ninna las lo koi dacha krik, hoi pral koi platsa his, kai i menshe ap o Debleskro diwes an o baro Debleskro kheer djan. Un ko winstuno wudar, kai i bare raja an o Debleskro kheer djan, kras lo pandlo. Kowa lauter kras lo jaake, har o baro rajeske pral o them Assur mishto his.
19 Ko tselo wawar koowa, hoi pral o Ahas penepaske hi, un hoi lo kras, kowa hi tchinlo an i familjakro liil i bare rajendar pral o them Juda.
20 Un o Ahas meras un was paskedo pash peskre phurende an o Davideskro foro. Un leskro tchawo Hiskija was baro rai pal leste.