11
I Atalja well rani an o them Juda
1 Har o Ahasja mulo his, stas leskri dai, i Atalja, pre, te marell li hakenes, kai o baro rajeha dran jek familja was. 2 Kowa shunas i tchai o baro rajestar Joram. Lakro lab hi Josheba. Un lakro phraal his o Ahasja. Koja tchoras peskro phraleskro tchawes, o Joash, mashkral dran o rajeskre tchawende, kai wenn marede. Un anas les un koi djuwel, kai das ap leste garda, an i tchibjengri isema un khatras les glan i Atalja. Un jaake nai was lo gar maredo. 3 Un job his pash i Josheba khatedo an o baro Debleskro kheer shob bersha. An ko tsiro his i Atalja i rani pral o them.
O Joash well baro rai pral Juda
4 An o eftato bersh bitchras o rashai Jojada bitchepangre, un mukas kol pralstune lurden un klisten gole te dell, kai dan jak ap o rajeskro kheer. Un jon wan pash leste an o baro Debleskro kheer. Un kote las job lendar i sowel tele, te rikrenn le pash leste. Un job sikras len o rajeskro tchawo.
5 Palle penas lo lenge, hoi te krenn le: “I triinto kotar tumendar”, penas lo, “kai ap o Debleskro diwes pash i budi well, dell garda an o baro rajeskro kheer. 6 I wawar triinto kotar dell garda ap o wudar, hoi kharell Sur. Un pale i wawar triinto kotar dell garda ap o wudar pal o kheer, kai o baro rajeskre kliste tarde hi. Jaake han tardo trul o tselo kheer un denn garda. 7 Kolla, kai lengri budi kerdo hi ap o Debleskro diwes, dui triinte kotja lendar, atchenn pash o baro Debleskro kheer, un denn garda an o kheer ap o baro rajeste. 8 Jon hunte wenn tardo trul leste, hakeno peskro chareha an o wast. Koon phagell kote dren, kowa hunte well maredo. Atchenn pash o baro rajeste, te djal lo win un te djal lo dren!”
9 Un i pralstune lurde kran halauter, har les o rashai Jojada ap lende penas, un lan pengre murshen pash pende, kolen kai ap o Debleskro diwes ap pengri budi wenn, un kolen, kolengri budi kerdi his, un wan pash o rashajeste Jojada. 10 O rashai Jojada das hako pralstuno lurdes kol witsepaskre tchurja un kol sasterne patria, kai o baro rajes, o Davides his, un an o baro Debleskro kheer pre-rikedo wan. 11 Un i kliste his tardo glan o Debleskro kheer jek rigjatar bis ap i wawar, un glan o sasterni chatchepaskria, un trul o rajeste trujel. Un hakenes his peskro witsepaskro tchuri an o wast. 12 Palle mukas o Jojada o baro rajeskro tchawes win te well, te nai dikell les hakeno, un tchiwas leske koi rajeskri stadi ap o shero, un das les ko liil, kai tchinlo hi, hoi te krell lo. Un tchoras djet pral leskro shero, te well lo baro rai. Koi dan le halauter an i wasta un dan gole: O baro rai te djiwella!
I Atalja well maredo un i wawar debla wenn paash kerdo
13 Har shunas i Atalja i gole kol klistendar un wawar menshendar, djas li an o baro Debleskro kheer, kai kol menshe khetne wan. 14 Un dikas o newo baro rajes kote tardo, kai i platsa o baro rajeske his: pash i bari lengsto bar. Un trul leste his i pralstune lurde un i phurdepangre tarde. Un i tsele menshe ko themestar his bachtelo un phurdan an pengre bashepangre. I Atalja tserdas peskre ripja an kotja un das gole: “Phukepen, Phukepen!”
15 Un o rashai o Jojada kamas gar te well li maredo an o baro Debleskro kheer. Doleske penas lo kol pralstune lurdenge: “Anenn lat win! Un koon lake pal nashella, koles denn mulo o chareha!”
16 Un jon tapran la un anan la ko drom, kai i graja pash o baro rajeskro kheer nashenna. Un kote was li maredo. 17 Un o Jojada mukas o baro rajes un i menshen dran Juda i sowel te dell o baro Debleske, te djiwenn le jaake, har o baro Dewel peskre menshendar kamella. Ninna mukas lo len i sowel te dell, te rikrenn le hako tsiro pash pengro baro rajes, un job pash lende.
18 Palle djan i tsele menshe dran o them Juda an o kheer ko deblestar Baal, un kran kol tsele figure paash, hoi les sikran. Un kol chatchepangre, kai viechen un wawar koowa leske chatchedo wan, phagan le tele. Un glan kol chatchepangre maran le leskro rashajes, o Mattan.
Un o rashai Jojada bitchras klisten, te denn le jak ap o baro Debleskro kheer. 19 Palle das lo lauteren khetne gole: i pralstune lurden, i klisten, kai denn jak ap o baro rajeskro kheer un ap leskri familja un i tsele menshe dran Juda. Un kolla anan o baro rajes tele dran o baro Debleskro kheer un wan pash ko wudar, kai kol kliste garda denna, un dureder pash o baro rajeskro kheer. Kote beshas lo pes ap peskri rajeskri beshepaskri. 20 Un i tsele menshe dran Juda his bachtelo. Un an o foro das kek kurepen, har maran le i Atalja o chareha pash o baro rajeskro kheer.