2
O David well rai pral Juda, o Ish-Boshet well rai pral Israel
1 Pal kowa putchas o David o baro Deblestar: “Djap me an jek kol forjendar an o them Juda, te atchap kote?”
Un o baro Dewel penas ap leste: “Dja koi!”
Un o David putchas: “An hawo foro?”
Penas o Dewel: “An Hebron.”
2 Jaake djas o David koi peskre dui djuwjentsa, i Ahinoam dran Jesreel, un i Abigajil, o Nabaleskri romni dran Karmel. 3 Ninna kol mursha, kai pash leste his, anas o David koi, hakenes peskri familjah. Un jon djiwan an kol forja pash o foro Hebron. 4 Un kol mursha dran o them Juda wan, un makan o Davides dren o djeteha, te well job baro rai pral ko kheer Juda. Un har o Davideske penlo was, kai kol mursha dran o foro Jabesh an o them Gilead o Saules paskran, 5 koi bitchras job murshen pash lende un mukas lenge te penell: “O baro Debleskri bacht well ap tumende! Tumer kran tumaro dji pre tumaro baro rajeske, o Sauleske un paskran les. 6 Jaake mu krell ninna tumenge o baro Dewel peskro dji pre, un well hako tsiro tumenge koi! Un ninna me kamau latchepen ap tumende te krell, kai kran tumer kowa. 7 Awenn sorele un tchatche mursha! O Saul, tumaro rai, hi mulo. Un i mursha dran o kheer Juda makan man o djeteha dren, te wap baro rai pral lende.”
8 O Sauleskro pralstuno lurdo, o Abner, koleskro dad o Ner hi, kowa las o Sauleskro tchawes Ish-Boshet, un anas les an o foro Mahanajim, 9 un kras, te well job baro rai pral i themma Gilead, Asser, Jesreel, Efrajim, Benjamin un pral o tselo Israel. 10 Un o Ish-Boshet, koleskro dad o Saul his, his star-deesh bersha phuro, har was lo baro rai pral Israel, un his rai pral kowa dui bersha. Kokres i menshe dran o kheer Juda rikran ap o Davideste. 11 Ko tsiro, kai o David baro rai his pral o kheer Juda, un an o foro Hebron djiwas, kowa his efta bersha un shob tchon.
Kurepen mank Israel un Juda
12 O Abner, koleskro dad o Ner hi, kowa djas win dran o foro Mahanajim kol lurdentsa o Sauleskro tchawestar, o Ish-Boshet. Un jon djan an o foro Gibeon. 13 Un o Joab, koleskri dai i Zeruja his, kowa djas kol lurdentsa o Davidestar ninna koi. Un jon tapran pen pash ko pani pash Gibeon, un atchan koi, kol jek ap kai rig, un kol wawar ap koi wawar rig ko panjestar.
14 O Abner penas ap o Joab: “Mu wenn kol terne mursha kai, te kurenn jon pen glan mende!”
Koi penas o Joab: “Awa, mishto!” 15 Koi wan deesh-te-dui lendar dran o kheer Benjamin, un his tardo ap koi rig o Sauleskro tchaweske o Ish-Boshet. Un wergel lende his deesh-te-dui mursha o Davidestar tardo. 16 Un hakeno tapras kol wawareskro shero, un das leske peskro charo an i rig. Un lauter meran koi. Doleske kharell ko kotar them “Helkat Hazzurim”a. Kowa hi pash o foro Gibeon.
17 Ko diwes djas i baro kurepen. Un o Abner un kol mursha dran Israel wan dino kol murshendar o Davidestar. 18 Koi pashel his ninna kol triin phrala, kolengri dai i Zeruja his: o Joab, o Abishai, un o Asahel. O Asahel his sik har i wesheskri busni ap peskre herja. 19 Un job las o Abneres palla, djas gar buder lestar krik. Te djas kowa tchatches, djas job tchatches. Te djas job serwes, djas job ninna koi. 20 Koi rissras pes o Abner trujel, un putchas: “Hal tu kowa, o Asahel?”
“Awa,” penas lo.
21 O Abner penas ap leste: “Dja tchatches oder serwes, un dja pash jek kol murshende, un kure tut leha un le leskre koola krik!”
Un o Asahel kamas gar lestar krik te djal. 22 Koi penas o Abner: “Muk man! Hoske dap tut, te peress ap i phub? Har nai dikoms me tiro phrales Joab an i jaka?”
23 O Asahel kamas gar peskre wasta lestar te mukell. Koi das o Abner les peskri witsepaskri tchurje an o per, jaake kai was kowa pal pale win. Un o Asahel peras un meras ap koi platsa. Un koon koi was, kai o Asahel mulo tchiddo hi, atchas tardo.
24 Un o Joab un o Abishai lan o Abneres palla. Un o kham djas tele, har wan le pash koi tikni berga Amma, kai glan Giach tardo hi, ap ko drom, kai djal an ko mulo them Gibeon. 25 Un i lurde dran o kheer Benjamin wan khetne pash o Abner, un his tardo trul leste pral ap koi tikni berga. 26 Un o Abner das ap o Joab gole, un penas: “Mukas mer gar tele te kuras men? Djineh tu gar, kai dran kowa tchi har ropen wella? Mer ham tumare phrala! Har rah kameh tu gar tire murshenge te penell, te mukenn le tele te lenn le men palla?”
27 O Joab penas: “Pash o Debleste, kowa hi tchatcho! Te penals tu kowa gar, tradans mire mursha tire murshen glan pende bis o wawar diwes taissarlakro.”
28 O Joab penas, te phurdenn le an i phurdepaskri. Un leskre tsele lurde atchan tardo, un lan i Israelitarjen gar buder palla, un kuran pen gar dureder.
29 O Abner djas peskre lurdentsa i tseli rat an o telstuno them, kai o pani Jordan nashell, un djan wergel o Jordan, un djan dureder o wawar diwes taissarlakro bis te wan le an Mahanajim.
30 Pal kowa har o Joab o Abneres leskre lurdentsa palla las, las lo peskre tsele lurden khetne. Koi his deesh-te-enja (19) mursha o Davidestar gar buder pashel, ninna o Asahel. 31 O Davideskre lurde dan 360 (triin-sheel-te-shob-deesh) lurden dran o kheer Benjamin mulo, kolendar, kai o Abnereha djan. 32 Jon hadan o Asaheles pre, un paskran les pash leskro dadeste an leskro mulengro kheer an o foro Betlehem. O Joab un leskre lurde djan dureder i tseli rat. Har wan le an o foro Hebron, djas o kham pre.