10
I tchatchepangre raja Tola un Jair
1 Un pal o Abimelech stas i mursh pre, te lell lo o Israel win dran i tchilatche wasta. Kowa his o Tola. Leskro dad his o Puwa, un koleskro dad his o Dodo i menshendar Issachar. O Tola djiwas an o foro Shamir an i berge Efrajim. 2 Un job his 23 (biish-te-triin) bersha o tchatchepaskro rai pral o Israel. Un palle meras lo, un was paskedo an o foro Shamir.
3 Un pal leste stas o Jair pre. Kowa hi i menshendar Gilead. Un job his 22 (biish-te-dui) bersha o tchatchepaskro rai pral o Israel. 4 Un koles his trijanda mursh tchawe, kai ap trijanda burikea klissan. Un len his trijanda forja. Kolla his an o them Gilead un kharenn gomme kau diwes: Jaireskre forja. 5 Un o Jair meras, un was an o foro Kamon paskedo.
O Debleskri choli well pral o Israel
6 Un i Israelitarja kran pale kowa, hoi tchilatches his glan o baro Debleskre jaka. Un jon mangan i wawar deblen an: ko debles, kai kharell Baal, un i debletsa, kai kharell Astarte, un kol deblen, kai mangenn kol menshe an, kai djiwenn an Syria, an Sidon, an Moab, an Ammon un an Filistia. Un i Israelitarja mukan o baro Debles un mangan les buder gar an.
7 Kote chatchas i bari choli pre an o baro Debleste ap i Israelitarja. Un job das len an i wasta i menshendar dran i themma Filistia un Ammon. 8 Un 18 (deesh-te-ochta) bersha lan jon kol Israelitarjen palla, kai djiwenn ap i wawar rig o panjestar Jordan an o them Gilead, kai i Amorarja djiwan, un kran lenge o djipen phares. 9 Un i Ammonarja djan pral o Jordan, te marenn le pen i menshentsa dran Juda, Benjamin un Efrajim. Un jaake was i bari daar pral o Israel.
10 Un kote dan i Israelitarja ap o baro Debleste gole un penan: “Mer kram tchilatchepen ap tute, te mukam tut, maro Debles, un mangam o debles Baal an.” 11 Un o baro Dewel penas ap lende: “Hi gar jaake, te rikran tumen i Egiptarja tele un i Amorarja, i Ammonarja, i Filistarja, 12 i Sidonarja, i Amalekarja un i Maonarja? Un har tumer ap mande gole dan, lom me tumen dran lengre wasta win. 13 Un tumer, hoi kran tumer? Tumer mukan man un mangan wawar deblen an. Doleske kamau tumen buder gar win te lell dran i wasta kolendar, kai tumen tele rikrenn. 14 Djan koi un denn ap kol deblende gole, hoi tumer tumenge win rodan, te wenn kolla tumenge ap i rig an ko tsiro, kai tumaro djipen pharo hi.”
15 I Israelitarja penan ap o baro Debleste: “Mer lam bari doosh ap mende! Kre tu mentsa, har tu kameh. Kokres kau jek kopo le men gomme win dran kolengre wasta! 16 Un jon witsran kol wawar deblen pendar krik un mangan o baro Debles an. Koi khaitas les, te well o Israeleske jaake pharo kerdo.”
O tchatchepaskro rai Jefta
17 Un i Ammonarja wan khetne gole dino, un tchiwan pengre plachtene khera pre pash o foro Gilead. Un i Israelitarja wan khetne pash Mizpa. 18 Un i pralstune pral kol Israelitarja, kai djiwenn an Gilead, penan jek ap o wawareste: “Koon hi ko mursh, kai glan win djal, te marell lo pes i lurdentsa dran o them Ammon? Kowa te well o pralstuno pral lauterende, kai djiwenn an Gilead.”