9
O Abimelech kamell baro rai te well
1 Un o Abimelech, o Gideoneskro tchawo, djas an o foro Sichem pash i phralende peskri datar, un rakras lakre tsele menshentsa un penas: 2 “Penenn ap i tsele murshende an o foro Sichem: ‘Hoi kamenn tumer? Hi feteder tumenge, te hi efta-deesh mursha raja pral tumende, kol tsele tchawe o Gideonestar? Hi gar feteder, te hi jek mursh rai pral tumende? Un ma bistrenn, te hom me tumaro rat un mass.’”
3 Kote penan i phrala leskri datar kol tsele laba ap i tsele murshende an o foro Sichem. Un jon penan penge: “Job hi maro phraal.” Un wan ap leskri rig. 4 Un jon dan les efta-deesh rupene kotja dran o kheer, kai mangan le o debles Baal-Berit an. Kol lowentsa ginas o Abimelech diwje depangre, hoi leske palla djan. 5 Un lentsa djas lo an peskro dadeskro kheer an o foro Ofra, un das peskre phralen temerl. Kol efta-deesh mursh tchawen leskro dadestar Gideon das lo ap jek baro bar temerl. Kokres o Jotam atchas pral, o terneder tchawo o Gideonestar. Kowa khatras pes.
6 Un i tikno tsiro koi pal wan i tsele mursha dran o foro Sichem khetne, ninna lauter, hoi an o baro sorelo kheer djiwan. Khetne djan le glan o foro Sichem pash ko baro ruk, hoi pash o baro bar tardo hi. Kote tchiwan le o Abimeleches pral pende, te well lo lengro baro rai.
O Jotam rakrell i parmissaa, hoi kamell tchomone te penell
7 Har shunas o Jotam kowa, djas lo pral pre ap i berga Garizim, un das kotar tele ap lende gole, un penas:
Shunenn ap mande, murshale dran Sichem,
te shunell ninna o Dewel ap tumende!
8 His jek tsiro, kai djan i ruka koi,
te rodenn le, koon nai well rai pral pende;
un jaake penan le ap o djeteskro ruk:
Ab tu o rai pral mende!
9 Kote penas o djeteskro ruk:
Mukap me miro thulepen,
koleske i debla un i menshe man sharenna,
te djap koi, te hadap mire kashta pral i wawar ruka?
10 Un i ruka penan ap o faigetikro ruk:
Ab tu o rai pral mende!
11 Kote penas o faigetikro ruk:
Hidjap me buder gar gudle un latche rukengreb,
te djap koi, te hadap mire kashta pral i wawar ruka?
12 Un i ruka penan ap o drakengro ruk:
Ab tu o rai pral mende!
13 Kote penas o drakengro ruk:
Mukap me i drake, kolendar i mool kerdo well,
hoi i deblen un i menshen bachteles krell,
te djap koi, te hadap mire kashta pral i wawar ruka?
14 Un i tsele ruka penan ap o subjengro bur:
Ap tu o rai pral mende!
15 Kote penas o subjengro bur:
Kamenn tumer tchatchepah, te wap me rai pral tumende?
Palle awenn pash mande,
un khatrenn tumen tel mande glan o kham!
Un te krenn kowa gar,
palle djal jag win dran o subjengro bur,
un chatchrell i zedertikre ruka, hoi ap i berga Libanon tardo hi!
16 Un kanna penenn mange, rikran tumen ap o tchatchepen, har tchiwan o Abimeleches pral tumende, te well lo tumaro rai? Un kran tumer o latchepen ap o Gideon un ap leskro kheer? Kran tumer leske kowa pale, har job ap tumende his? 17 Miro dad djas tumenge an o kurepen, kai nai wals lo maredo, un las tumen win dran i wasta kolendar dran Midian. 18 Tumer hadan tumen kau diwes pral miro dadeskro kheer, un dan leskre tchawen temerl. Efta-deesh murshen dan ap jek baro bar temerl. Un tchiwan tumaro phrales, o Abimeleches, pral tumende, te well lo o rai pral o foro Sichem. Un leskri dai hi miro dadeskro budepaskretsa. 19 Te his kowa lauter mishto, hoi kran tumer ap o Gideon un ap leskro kheer, palle krenn dureder jaake un wenn bachteles khetne, tumer un o Abimelech!
20 Te his kowa gar mishto, hoi kran tumer, palle djal jag dran o Abimelech win, un koi jag chal hakenes pre, kai an o foro Sichem djiwella, ninna kolen, kai an o baro sorelo kheer djiwenna! Un lendar lauterendar djal jag win un chal o Abimeleches pre!
21 Un o Jotam nashas leskro phralestar Abimelech krik, un jon tapran les gar. Un job djas an o foro Beer, un atchas koi.
Tchingepen mank o Abimelech un kolende dran Sichem
22 Un o Abimelech his triin bersha o baro rai pral o Israel. 23 Un palle bitchras o Dewel i tchilatcho duchoc mashkral o Abimelech un i menshende an o foro Sichem. Un kolla rissran pen lestar tele, un rikran buder gar pash leste. 24 Jaake te well ko tchilatchepen ap leste pale, hoi job ap kol efta-deesh tchawende peskro dadestar Gideon kras. Un lengro rat te well ap lengro phraleste Abimelech, kai len temerl das, un ap kolende, kai an o foro Sichem djiwan un leskre wasta soreles kran.
25 Un kolla, kai an o foro Sichem djiwan, tchiwan pen khatemen pash i dromma ap i berge, un peran pral hakeneste, koon koi djal, un tchoran les win. Un kowa was o Abimelecheske penlo.
26 An ko tsiro was o Gaal, koleskro dad o Ebed hi, peskre phralentsa an o foro Sichem. Un i menshe, kai an Sichem djiwenn, tchiwan pengro patsepen ap leste. 27 Un jon djan win an i drakengre themma un anan i drake dren, un anan len koi, kai le mool lendar krenn. Palle wan le bachteles khetne un djan an pengro debleskro kheer un chan un pijan, un praassan o Abimeleches.
28 Un o Gaal, koleskro dad o Ebed hi, penas: “Koon hi o Abimelech, te mukas mer les maro rai te well, mer, i menshe dran o foro Sichem? Leskro dad hi o Gideon. Doleske hi lo gar tchatchepah jek mendar. Un job tchiwas peskro budepaskres, o Sebul, pral mende, te dell job jak ap mende. Mer te tchiwas i murshes dran o kheer Hamor pral mende, te well job maro rai, un gar o Abimelech! O Hamor hi o dad maro forestar Sichem. 29 Te wals man penepaske kate, palle tradoms me o Abimeleches un penoms ap leste: ‘De tire kurepangre khetne gole un ab win, un kure tut mentsa!’”
30 Har o Sebul, ko pralstuno pral o foro, shunas, hoi o Gaal penas, kote chatchras i choli an leste pre.
31 Un job bitchras tchorchanes murshen pash o Abimelech un mukas leske te penell: “Dik, o Gaal un leskre phrala wan an o foro Sichem, un krenn, te wenn i menshe chojedo ap tute. 32 Doleske ab an i rat, tu un tire tsele kurepangre, un tchip tut pash o foro khatemen. 33 Un taissarlakro, te djal o kham pale pre, pere pral o foro dren! Un te well o Gaal peskre murshentsa palle win, te kurell lo pes tuha, kre les, har tiro wast les tut dell!”
34 Kote kras pes o Abimelech ap o drom an koi rat, job un peskre tsele kurepangre. Un jon tchiwan pen ap star platse trul o foro Sichem khatemen.
35 Un o Gaal djas win glan o foreskro baro wudar. Kote wan o Abimelech un leskre tsele kurepangre dran pengro khatepen win. 36 Un o Gaal dikas len un penas ap o Sebul: “Dik, koi wenn lurde i berga tele.”
O Sebul penas ap leste: “Tu dikeh o tamlepen, hoi i berge krenn, har te wans mursha.”
37 O Gaal rakras pale, un penas: “Dik koi! Lurde wenn i berga tele, un wawar wenn ap o drom, kai o mulno eichtikro ruk tardo hi.”
38 Kote penas o Sebul ap leste: “Kai hi kanna tiro baro mui? Tu penal: ‘Koon hi o Abimelech, te mukas mer les maro rai te well?’ Hi kolla gar kol lurde, pral kolende tu jaake sal? Dja kanna koi, un kure tut lentsa!”
39 Koi anas o Gaal i murshen, kai an o foro Sichem djiwenn, an o kurepen. Un jon kuran pen o Abimelecheha un leskre lurdentsa. 40 Un o Abimelech tradas les, jaake te nashas o Gaal lestar. Un bud mursha wan temerl dino un atchan tchiddo bis glan o foreskro baro wudar. 41 Un o Abimelech atchas an o gab Aruma. Un o Sebul tradas o Gaales un leskre phralen dran o foro Sichem.
O Abimelech dell o fores Sichem paash
42 Un o wawar diwes kaman i menshe win te djal dran o foro, te budrenn le ap lengri hachetikri phub. Har o Abimelech kowa shunas, 43 las lo peskre tsele lurde, kras lentsa triin gruppe, un tchiwas pes lentsa an i hachetikri phub khatemen. Un har dikas lo, te wenn le dran o foro, was lo peskre lurdentsa dran o khatepen, te perell lo ap lende. 44 Job un kol lurde, hoi pash leste hi, nashan pash o foreskro baro wudar un atchan kote tardo. Un kol wawar lurde peran pral kolende, kai ap i hachetikri phub hi, un dan len temerl.
45 Un o tselo diwes kuras pes o Abimelech i murshentsa dran o foro, un las o foro dren. Un i menshen, kai an o foro hi, das lo temerl. Un i khera kras lo paash, un witsras loon ap lende.d
46 Un har shunan kowa kol menshe, kai an o baro sorelo kheer djiwenn, nashan le an o baro isema, hoi hi tel o kheer lengro deblestar Baal-Berit.
47 Un har o Abimelech shunas, te wan le lauter kote khetne, 48 djas lo peskre tsele lurdentsa pre ap i berga Zalmon. Un o Abimelech las i tower an peskro wast, das leha jek kasht tele i rukestar, un tchiwas les peske ap i phik. Un penas ap i lurde, hoi pash leste his: “Kowa hoi tumer dikan, hoi me krom, sik krenn les har me!”
49 Un hakeno kol lurdendar das jek kasht tele. Un jon djan o Abimelecheske palla, un tchiwan pengre kashta ap koi bari isema, kai kolla pen khatran, un chatchran kol kashta pral lende. Un jaake meran i tsele menshe, hoi an ko baro sorelo kheer djiwan. Un kolla his jaake 1.000 (jek sero) mursha un djuwja.
O Abimelecheskro merepen
50 Un palle djas o Abimelech dureder pash o foro Tebez, un tchiwas pes peskre lurdentsa trul o foro, un las les dren. 51 An ko foro his i baro sorelo kheer. Un kote nashan i tsele menshe dran o foro, mursha un djuwja, te khatrenn le pen. Un jon kran o wudar pal pende pandlo, un djan pral pre ap o kheer.
52 Un o Abimelech was pash ko kheer, te lell lo les dren. Un job djas pash o baro wudar, te chatchrell lo les. 53 Kote witsras i djuwel i baro bar tele ap o Abimelecheskro shero un dukas les phares. 54 Koi das lo sik gole ap peskro budepaskro, kai leske o charo hidjrell, un penas ap leste: “Le tiro charo, un de man temerl, te penell kek mandar: ‘I djuwel das les temerl.’” Un leskro budepaskro das les tele tchurje, jaake te meras lo.
55 Un har i Israelitarja, kai lentsa hi, dikan, te hi o Abimelech mulo, djas hakeno lendar pale khere.
56 Jaake mukas o Dewel o tchilatchepen ap o Abimelech pale te well, hoi lo ap peskro dadeste kras, har mukas job peskre efta-deesh phralen temerl dell. 57 Un ninna o tchilatchepen, hoi i mursha dran o foro Sichem kran, mukas o Dewel ap lengre shere pale te well. Un jaake was koi bibacht pral lende, hoi o Jotam win rakras, koleskro dad o Gideon hi.