28
I bacht, hoi well ap kolende, kai shunenn ap o baro Debleste
1 Kau diwes penau tumenge o baro Debleskre tsele laba, pal kolende hunte djiwenn. Shunenn ap tumaro baro Debleste, un krenn pal kal laba! Palle krell tumendar tumaro baro Dewel i natsjona, hoi budeder an-diklo hi har i tsele wawar natsjone ap i phub. 2 Te shunenn tumer ap leste un krenn, hoi job tumendar kamella, well leskri bacht pral tumende an halauter:
3 Job dell tumen bacht an o foro un ap tumari hachetikri phub.
4 Job dell tumen bud tchawe, bud djob, bud grumja un bakre un busja.
5 Job dell tumen bud maro te chal.
6 Leskri bacht well ap tumaro drom, te djan ap i budi un te wenn khere.
7 O baro Dewel dell kolen, kai hadenn pen pral tumende, te kurenn le pen tumentsa. Ap jek drom wenn le, te djan le ap tumende, un ap hake rigja hunte nashenn le penge tumendar.
8 Tumaro baro Dewel bitchrell tumenge peskri bacht ap tumaro djob, te well tumen bud kolestar an tumare djobengre khera, un ap halauter, hoi tumer krenna. Un job dell tumen peskri bacht an ko them, hoi lo tumende dell.
9 Te shunenn tumer ap tumaro baro Debleste un djan ap leskre dromma, krell lo tumendar i natsjona, hoi leske hi jaake har lo pes sowel das te krell lo. 10 Palle dikenn le an i tsele themma ap i phub, te han o baro Debleskre wi-rodede menshe, un jon darenn tumendar.
11 Un o baro Dewel krell, te well tumen bud latchepen, budeder har doha. Job dell tumen bud tchawe un bud vieche. Bud djob un wawar koowa well baro ap tumari phub an ko them, kai o baro Dewel pes glan tumare phurende sowel das, te dell lo les tumende. 12 Job krell tumenge o bolepen pre un dell brishin an o tchatcho tsiro ap tumaro them, un tchiwell peskri bacht ap halauter, hoi tumer krenna. Un tumer patsenn i menshenge an bud themma. Lendar hunte patsenn tumenge tchi.
13 Un o baro Dewel krell te wess tu, Israel, o shero un gar i pori. Te shuneh tu ap i laba tiro baro Deblestar, hoi tuke kai diwes penau, palle weh tu baro un bareder un gar tikneder. 14 Tu tchiwess kek lab ap i rig, hoi tuke kau diwes penau. Tu djas gar tele leskro dromestar, gar tchatches un gar serwes. Un djas gar wawar deblenge palla, te mangess len an.
I bibacht, hoi well ap kolende, kai shunenn gar ap o baro Debleste
15 Shunenn tumer gar ap tumaro baro Debleste un krenn gar, hoi lo tumendar kamell, un rikrenn tumen gar ap leskre laba, hoi me tumenge kau diwes penom, palle well kai tseli bibacht pral tumende:
16 Bibacht well ap tumende an o foro un ap tumari hachetikri phub.
17 Bibacht well ap tumaro djob, te well tumen gar doha maro te chal.
18 Tumer lenna gar bud tchawe, gar bud djob, gar bud grumja un bakre.
19 Bibacht well ap tumaro drom, te djan ap i budi un te wenn khere.
20 Te mukenn tumer o baro Debles un djan ap tumaro tchilatcho drom, bitchrell lo mank tumende bibacht un daar an halauter, hoi tumer krenna, jaake te djinenn buder gar, hoi te krenn. Jaake merenn tumer un djan sik tele.
21 O baro Dewel mukell jek nasslepen pal o wawar ap tumende te well, bis te buder kek tumendar djiwell an ko them, an koleste tumer wan, te lenn les tumenge dren. 22 Job bitchrell tumen sawo nasslepen, hoi chal tumen pre, tumaro mass well lolo un tato, un i fibro chatchell an tumende. Un job rikrell o brishin pale an tumaro them. Un i tato ducho krell, te well o djob nasselo un merell tele. Un kowa halauter well pral tumende bis te mulo han. 23 Un dell kek brishin, un i phub tel tumende well jaake sorelo har bara. 24 Awa, brishin dell gar buder ap tumende tele. Na-a, tchik un santa phurdell o baro Dewel pral tumaro them, bis te han mulo.
25 O baro Dewel krell, te wenn kolla sorleder har tumer, kai kurenn pen tumentsa. Ap jek drom djan tumer ap lende pre, un ap hake rigja hunte nashenn tumenge lendar. Un i menshenge an hake themma ap i phub atchell o rakepen krik i trashatar, te dikenn le, har tumenge djala. 26 Un te han mulo koi tchiddo, palle wenn i tchirkle un i diwje vieche, te chan le tumaro mass. Un kek tradell len krik.
27 O baro Dewel bitchrell tumen sawo nasslepen, hoi lo glan i rah tsiro i Egiptarjen das: I djungelo nasslepen well ap tumaro mass, dukepen phagell pre, un tumaro mass chatchell un chandjrell. Un kek drabb hi koi, hoi nai krell tumen sasto. 28 Ninna krell lo tumen narwelo un korelo. Un tumer wenn nasselo an o shero. 29 Ap o diwes, kai o kham pralstunes tardo hi, rikrenn tumer tumare wasta glan tumende, te rodenn tumaro drom, har korele, kolenge hako tsiro har i rati hi. Tumen well kek bacht an tumaro djipen. Wawar menshe djan sorjah ap tumende pre un tchorenn tumen pale te pale win. Un kek well ap tumari rig.
30 Kowa mank tumende, kai putchas i terni tchai, te romedinerell li les, dikell, har i wawar mursh well un lell lat peske. Kowa, kai tchiwas peske i kheer pre, nai djiwell gar dren. Kowa, kai tchiwas drakengre ruka an i phub, nai chal gar lengre drake. 31 Tu dikeh har wawar tiri grumni marenn, un tu lell latar tchi te chal. Tiri burika well tuke randedo glan tire jaka, un well tut gar buder pale dino. Kol menshe, kai kurenn pen tuha lenn tire bakre un busja penge, un kek well ap tiri rig, te lell lo len dran lengre wasta win. 32 Tire mursh tchawe un tire tcha wenn i menshenge an i wawar them dino, te budrenn le lenge. Un tire jaka dikenn kowa, un tiro dji nashell pal lende un phagella. Un an tire wasta atchell buder kek soor.
33 Lauter, hoi ap tiri hachetikri phub baro was, koleske tu phares budral, chan sawe menshe, kai wenn dran i dur them. Un tu weh sorjah tele rikedo, un hunte budress tel duka tiro tselo djipen. 34 Un tu weh dinelo pral kowa lauter, hoi tire jaka hunte dikenn.
35 O baro Dewel krell, te phagell djungelo dukepen pre ap tumare herja. Awa, tumare pirendar bis ap tumare sherja han pherdo dukepen, un nai wenn gar sasto kolestar.
36 O baro Dewel tradell tumen un ko rajes, koles tumer pral tumende tchiwan, pash i menshende an i wawar them, kai tumer an kek tsiro djiwan, witar gar tumare phure. Un kote mangenn tumer un barrengre deblen an. 37 Te dikenn i menshe an i themma, hoi trul tumende hi, har tumenge djal, atchell lenge o rakepen krik i trashatar pral kowa. Un jon rakrenn un sanenn pral tumende.
38 Tumer witsrenn bud djob ap tumari phub win, un anenn kokres i wast pherdo dren. I stepangre chan halauter pre. 39 Tumer tchiwenn drakengre ruka an i phub, un denn garda ap lende. Un kirme wenn un chan i drake pre. Un tumer nai lenn kek drake dren, un nai pijenn kek mool lendar. 40 Djeteskre ruka hi an tumaro tselo them. Tumen well kek djet. I tsele djeteskre drake perenn tele, glan te hi le pesse.
41 Tumen wenn mursh tchawe un tcha. Un jon atchenn tumenge gar. Pandles wenn le krik anlo.
42 Tumare tsele ruka un halauter hoi an tumaro them bares was, chan i stepangre.
43 Kol wi-themarja, kai mank tumende djiwenn, wenn sorleder un sorleder pral tumende. Un tumer nashrenn tumari soor pral lende. 44 Jon patsenn tumenge lowe, tumer patsenn lenge nai kek lowe. Jon wenn o shero, tumer wenn o pori.
45 Te shunenn tumer gar ap tumaro baro Debleste un leskre laba, un krenn gar, hoi lo tumendar kamell un tumenge penas, well kai tseli bibacht pral tumende, un lell tumen palla, bis te mulo han. 46 Hako tsiro, kai well kai bibacht pral tumende, well diklo, te hi o baro Debleskro praassepen ap tumende tchiddo.
47 Tumaro baro Dewel das tumen bud latcho koowa, awa, budeder har doha lauterestar. Un tumer hans gar leske koi i bachtelo djijeha. 48 Doleske bitchrell o baro Dewel wawar menshen pral tumende, kai kamenn tumen tele te rikrell. Un tumer hunte budrenn lenge, un bokenn un trushenn koi pashel. Tumen well gar doha an-ripaske, tchitchestar well tumen doha. O baro Dewel rikrell tumen jaake tele, har te wals i sasterni gustri trul tumari meen, bis te tumer mulo han.
49 Menshen dran i dur them, fun i wawar rig i phubjatar, anell lo pral tumende. Sik har i baro tchirklo wenn le pral tumende. Lengro rakepen haiwenn tumer gar. 50 Len hi kek dji tumenge. Ninna i phure un i tchawe khaitenn len gar. 51 Un jon chan tumare viechen. Un halauter, hoi ap tumari phub bares was, chan le pre. Tumenge mukenn le tchi pral, kek djob, kek mool, kek djet un witar kek terne tumare grumjendar, bakrendar un busjendar. Jaake hunte merenn tumer i bokatar, bis te kek tumendar buder koi hi.
52 Un jon tchiwenn pen trul tumare forja, un mukenn kekes dren un kekes win, bis te kol bare un sorele forjengre massurja tele phagedo hi, kolendar tumer patsan, te well kek wergel. Kowa krenn le tumare tsele forjentsa an tumaro tselo them, hoi tumaro baro Dewel tumen das.
53 An ko tsiro, kai han jaake dren pandlo an tumare forja, well tumen sawi bok, te chan tumer tumare tchawen, ko mass tumare mursh tchawendar un tchendar, kolen tumaro baro Dewel tumen das. 54-55 I mursh tumendar, koles hako tsireske doha ap halauter his, un railes djiwas, ninna kowa chal peskre tchawen, un dikell pherdo silwepen ap peskro phraleste un ap peskri romjate un ap peskro wawar tchaweste, hoi leske gomme atchas, te lenn jon tchi ko massestar. Tchi wawar har kau mass atchas leske leskro tselo brawlepastar. Jaake baro hi koi daar un koi bok an tumare tsele forja, kai han dren pandlo kolendar, kai kurenn pen tumentsa. 56-57 Un i djuwel tumendar, kolat hako tsireske doha ap halauter his, un jaake railes djiwas, te mukas pes li te hidjrell, un peskre pire gar ap i phub tchiwas, – jaake railes was li peske glan, un sau brawelo djipen djiwas li – ninna koi djuwel chal peskro ternepen un kowa hoi gomme pal kowa win well dran late, har anas li o ternepen ap i phub. Tchorchanes chal li kowa un dikell pherdo silwepen ap peskro romeste un peskri tchat, te lenn jon tchi kolestar. Tchi wawar atchas lake chapaske. Jaake baro hi koi daar un koi bok an tumare tsele forja, kai han dren pandlo kolendar, kai kurenn pen tumentsa.
Ninna kowa well pral i Israelitarja, te shunenn le gar ap pengro Debleste
58 Un o Mose penas dureder: Doleske denn jak, te djan ap o drom tumaro baro Deblestar! Un rikrenn leskre tsele laba, hoi an kau liil dren tchinlo hi! Un dikenn ap leste pre, ap tumaro rajeste, kai jaake baro koowa krell, kai darenn i menshe lestar. 59 Te shunenn tumer gar ap leste, dell o baro Dewel tumen un tumare tchawen, un bitchrell tumenge bud dukepen un pharo nasslepen, ko jek gomme djungleder har ko wawar. Un kowa atchell i rah tsiro ap tumende. 60 Ko tselo djungelo nasslepen, hoi lo pral i Egiptarjen anas, un kolendar tumen sawi daar his, anell lo palle ap tumende. Un tumer wenn gar sasto lestar. 61 Un ninna ko tselo wawar nasslepen un dukepen, hoi hi gar tchinlo an kau tchatchepaskro liil, mukell lo pral tumende te well, jaake rah bis te tumer mulo han.
62 Tumer hans jaake bud menshe har i momlia an o bolepen. Te shunenn gar ap tumaro baro Debleste, atchenn tumendar kokres i wast pherdo djido. 63 Un jaake har o baro Debleske shukar his, te krell lo tumenge latchepen, un te krell lo tumendar bud menshe, jaake well leske palle shukar, te krell lo tumenge tchilatchepen, bis te atchenn gar bud tumendar pral. Un dran ko them, kai kanna dren djan, te lenn les tumenge dren, wenn tumer palle win tserdedo.
64 Un job tradell tumen mank i menshende an i tsele themma ap kai phub, kolen kate, un kol wawaren kote. Lengre deblen dran kasht un bar mangenn tumer kote an. Kol deblen prindjrenn tumer gar un prindjran witar gar tumare phure. 65 Mank kol menshende hatsenn kek platsa, kai khere han un atchenn nashte. Un o baro Dewel dell tumen kote i dji, hoi o tselo tsiro darell. An tumare jaka hi kek djipen buder. Un tumer kamenn buder gar te djiwell. 66 Hako tsiro hi tumen o merepen glan i jaka. Diwes un rati hunte darenn tumaro djipaske. 67 Tumen well sawi daar, un tumare jaka hunte dikenn sawo djungelo koowa, kai penenn taissarlakro: Kamaus, te wals rati! Un rati penenn tumer: Kamaus te wals tsalla!
68 Un o baro Dewel anell tumen ap i shiffe pale an o them Egiptia, ap ko drom, kolestar me penom: “Kote hunte djan tumer gar pale!” Un kote kamenn tumer kolenge te budrell, kai dikenn tchilatches ap tumentsa. Lenge kamenn tumen te bikrell, te wenn lengre budepangre. Un kek kamell tumen te ginell.
O baro Dewel djal i sowel dren i Israelentsa
69 Kawa hi kowa, hoi o baro Dewel i Israelentsa win kras, har djas lo lentsa i sowel dren. Kal laba penas lo o Moseske an o them Moab. Kal laba hi gar kol emlige laba, hoi kras lo lentsa win pash i berga Horeb.